যোৱা ২১ ফেব্ৰুৱাৰিৰ দিনা বিষাক্ত চুলাই-মদ সেৱন কৰি বৰ্তমানলৈকে শতাধিক লোকে মৃত্যুক সাবটি ল’বলগীয়া হোৱা ঘটনাক কেন্দ্ৰ কৰি ৰাজ্যৰ চাৰিওদিশে তীব্ৰ প্ৰতিক্ৰিয়া চলি থকাৰ সময়তে শেহতীয়াকৈ প্ৰতিক্ৰিয়া প্ৰকাশ কৰিছে প্ৰব্ৰজন বিৰোধী মঞ্চৰ আহ্বায়ক উপমন্যু হাজৰিকাই।
নৰ্থ ইষ্ট নাওলৈ প্ৰেৰণ কৰা এক প্ৰেছ বিজ্ঞপ্তিযোগে চাহ শ্ৰমিকক সস্তীয়া মদ খাবলৈ চৰকাৰে বাধ্য কৰোৱা বুলি দাবী কৰে হাজৰিকাই।
হাজৰিকাই কয়, ‘চাহ বাগিচাত কৰ্মৰত দৰিদ্ৰ সীমাৰেখাৰ তলৰ শ্ৰমিকক যেতিয়া চৰকাৰে ১৬৭ টকা বা তাতকৈও কম দৈনিক মজুৰি দিয়ে, তেনেকুৱা পৰিস্থিতিত কঠোৰ পৰিশ্ৰমৰ অন্তত চাহ শ্ৰমিক সকলে মানসিক মনোৰঞ্জনৰ নামত চুলাই খাবলৈ বাধ্য হৈ পৰে।‘
ইপিনে, কঠোৰ পৰিশ্ৰমী এই শ্ৰমিক সকলৰ মনোৰঞ্জন আৰু মানসিক বিকাশৰ কাৰণে যেতিয়া চৰকাৰে ইতিবাচক পদক্ষেপ আৰু চৰকাৰী আঁচনি হাতত নলয় তেতিয়া দিনটোৰ পৰিশ্ৰমৰ পাছত এই শ্ৰমিকসকলে কৰিব কি ? এইবুলি চৰকাৰক প্ৰশ্ন কৰে হাজৰিকাই।
তেওঁ আৰু কয়, ‘যোৱা বছৰ ৰাজ্যিক বাজেটত যেতিয়া অবৈধভাবে বিক্ৰী হোৱা চুলাই মদক বৈধ কৰি ৰাজহ সংগ্ৰহৰ পথ হিচাবে ব্যৱহাৰ কৰিবলৈ গৈ চুলাই উৎপাদন আৰু বিক্ৰীত কোনো ধৰণৰ নিয়ন্ত্ৰণ ৰাখিব নোৱাৰিলে তেতিয়া এনেকুৱা দুখজনক ঘটনা সংঘটিত হৈয়ে থাকিব ।‘
‘হিন্দু বাংলাদেশীক নিজৰ সৰ্বোচ্চ অগ্ৰাধিকাৰ দিয়া অসমৰ বিজেপি চৰকাৰে এই মানুহখিনিৰ কথা ভাবিবলৈ সময় পাবনে?’ চৰকাৰক এইদৰে প্ৰশ্ন কৰে হাজৰিকাই।
আনহাতে, শতাধিক লোকৰ মৃত্যু আৰু বহু জনৰ জীৱন চিৰকালৰ বাবে ৰুগীয়া কৰি তোলা এই ঘটনাৰ বাবে বৰ্তমানৰ চৰকাৰে মাথোঁ দুজনমান আবকাৰী বিষয়াক নিলম্বিত কৰিয়ে দায় সাৰিব বিচাৰিছে বুলিও তেওঁ বিজ্ঞপ্তিত কয়।
হাজৰিকাৰ মতে ‘এই দুখজনক ঘটনাৰ বাবে দায়ী চৰকাৰৰ সোপাঢিলা আবকাৰী নীতি আৰু নিষ্ক্ৰিয়তা।‘
তদুপৰি, চৰকাৰৰ আবকাৰী মন্ত্ৰী পৰিমল শুক্লবৈদ্যক পদত্যাগ কৰি নৈতিক দায়িত্ব পালন কৰিবৰ বাবে আহ্বান জনায় উপমন্যু হাজৰিকাই।