গুৱাহাটীৰ পৰা বেংগালুৰু অভিমুখী এখন ইণ্ডিগো বিমান আজি কলকাতাত জৰুৰীভাৱে অৱতৰণ কৰাবলগীয়া হয়।
যান্ত্ৰিক বিজুতিৰ বাবেই 6E-291 ইণ্ডিগো বিমানখন কলকাতাত অৱতৰণ কৰোৱা হয়। অৱতৰণ কৰোৱাৰ পাছতে অভিযন্তাসকলে বিমানখন পৰীক্ষা-নিৰীক্ষা কৰে।
বিমানখনত থকা শতাধিক যাত্ৰীক আন এখন বিমানেৰে বিমান কৰ্তৃপক্ষই গন্তব্য স্থানলৈ প্ৰেৰণ কৰে।
বাতৰি অনুসৰি, গুৱাহাটীৰ পৰা বেংগালুৰুলৈ শতাধিক যাত্ৰী কঢ়িয়াই নিয়া ইণ্ডিগো বিমানখন দিনৰ ১ বাজি ৫০ মিনিটত কলকাতাত জৰুৰীভাৱে অৱতৰণ কৰোৱা হয়। যাত্ৰীসকলক বিমানখনৰ যান্ত্ৰিক বিজুতি ঘটা বুলি জানিবলৈ দিয়ে।
বিমানখনৰ চালকে বিমানখনৰ ইঞ্জিনত কোনো বিজুতি ঘটাৰ সন্দেহ ব্যক্ত কৰে।
ইপিনে, বিমানখনৰ সকলো যাত্ৰী সম্পূৰ্ণ সুৰক্ষিত বুলি কোৱা হৈছে। সংশ্লিষ্ট কৰ্তৃপক্ষৰ কাৰিকৰী শাখাই বিমানখনৰ বিজুতিৰ সৱিশেষ পৰীক্ষা-নিৰীক্ষা কৰি আছে।