২১ৰ পৰা ২৪ এপ্ৰিললৈ ডোহাৰ খালিফা ষ্টেডিয়ামত অনুষ্ঠিত হ’ব লগীয়া ২৩ সংখ্যক এছিয়ান এথলেটিকছ চেম্পিয়নশ্বিপৰ বাবে বুধবাৰে ঘোষণা কৰা ভাৰতীয় দলত স্থান লাভ কৰিবলৈ সক্ষম হৈছে অসম সন্তান হিমা দাস।
পাটিয়ালাত অনুষ্ঠিত হৈ যোৱা ফেডাৰেশ্যন কাপ ছিনিয়ৰ এথলেটিকছ চেম্পিয়নশ্বিপত ৪০০ মিটাৰ দৌৰত হিমাই এছিয়ান চেম্পিয়নশ্বিপৰ বাবে যোগ্যতা অৰ্জনকাৰী মাপ স্পৰ্শ কৰিবলৈ সক্ষম নহ’ল। কিন্তু এথলীটগৰাকীৰ দুৰন্ত প্ৰতিভাৰ বাবেই দলত অন্তৰ্ভুক্ত কৰা হৈছে।
উল্লেখ্য যে যোৱা ১৮ মাৰ্চত পাঞ্জাৱৰ পাটিয়ালাত অনুষ্ঠিত হোৱা ফেডাৰেশ্যন কাপৰ ফাইনেলত হিমাই ৫২.৮৮ ছেকেণ্ডত ৪০০ মিটাৰ দৌৰি সোণৰ পদক অৰ্জন কৰিছিল। সেয়ে তেওঁক ভাৰতীয় দলত অন্তৰ্ভুক্ত কৰা বুলি এক শীৰ্ষ সূত্ৰই জনাইছে।
প্ৰতিযোগিতাখনৰ বাবে ২০ মাৰ্চত ৩৯জন সদস্যৰ ভাৰতীয় দল ঘোষণা কৰা হয়। হিমাৰ উপৰি এই সদস্যসকলৰ ভিতৰত আছে ৰাষ্ট্ৰীয় অভিলেখকাৰী মহম্মদ অনছ (৪০০ মিটাৰ), দুতী চান্দ (২০০ মিটাৰ), তাৰকা জেভলিন থ্ৰ’ৱাৰ নীৰজ চোপ্ৰা।
