আজি বিধানসভাত বিত্ত মন্ত্ৰী হিমন্ত বিশ্বই দাখিল কৰা ২০১৯-২০ বৰ্ষৰ বাজেটত চমক দিয়াৰ চেষ্টা কৰা দেখা গ’ল মন্ত্ৰীজনক। যথেষ্ট নতুনত্ব থকা বাজেটখনত সমাজৰ বিভিন্ন স্তৰ আৰু বিভিন্ন শ্ৰেণীক সামৰি কেতবোৰ অভিলাষী আঁচনি লোৱা দেখা গৈছে। মুঠ ১৮খন ধ্বজ্জাবাহী আঁচনি বাজেটত ধৰা হৈছে।
বাজেট ভাষণত ৪৫ বছৰ অনূৰ্ধ্ব বিধৱাসকলৰ বাবে ২৫ হাজাৰ টকাকৈ এককালীন সাহায্য দিয়াৰ কথা ঘোষণা কৰে মন্ত্ৰীজনে।
ইয়াৰ উপৰি জ্ঞানদীপিকা শীৰ্ষক আঁচনিৰ অধীনত শিক্ষাৰ্থীসকলৰ বাবে বিভিন্ন সা-সুবিধা আগ বঢ়োৱা হৈছে বাজেটত। সন্তানৰ উচ্চশিক্ষাৰ ঋণ ঘূৰোৱাত সহায় কৰাৰ বাবে অভিভাৱকৰ একাউণ্টত ৫০ হাজাৰ টকাকৈ জমা দিয়া হ’ব। ইয়াৰ জৰিয়তে ২০ হাজাৰ অভিভাৱক উপকৃত হ’ব বুলি জনায় মন্ত্ৰীজনে।
চৰকাৰী বিদ্যালয়ৰ ছাত্ৰ-ছাত্ৰী সমৱেশ (য়ুনিফৰ্ম)ৰ বাবে দিয়া ধন প্ৰতিজনৰ বাবত পূৰ্বৰ ৪০০ টকাৰ পৰিৱৰ্তে ৬০০ টকালৈ বৃদ্ধি কৰা হৈছে। তাৰোপৰি পূৰ্বে প্ৰাথমিক বিদ্যালয়ৰ ছাত্ৰ-ছাত্ৰীকহে সমৱেশ দিয়া হৈছিল যদিও ২০১৯ বৰ্ষৰ পৰা দশম শ্ৰেণী পৰ্য্যন্ত ছাত্ৰ-ছাত্ৰীক এই আঁচনিয়ে সাঙুৰি ল’ব। নৱম-দশম শ্ৰেণীৰ সমৱেশৰ মূল্য ৭০০ টকা ধাৰ্য্য কৰা হৈছে।
এই আঁচনিৰ অধীনত ১ লাখ টকাতকৈ কম বাৰ্ষিক আয়ৰ অভিভাৱকৰ সন্তানৰ বাবে স্নাতক মহলালৈকে নামভৰ্তি বিনামূলীয়া হ’ব। তাৰোপৰি বিনামূলীয়া পাঠ্যপুথি স্নাতক মহলালৈকে দিয়া হ’ব।
বাজেটত বিত্ত মন্ত্ৰীজনে ধৰ্মীয় স্থান বা দেৱালয় বিলাকৰ বাবে ২ লাখ টকাকৈ বাৰ্ষিক ভাত্তাৰ ঘোষণা কৰে। ইয়াৰ জৰিয়তে ৰাজ্যত থকা ধৰ্মীয় অনুষ্ঠানবোৰে যথেষ্ট আৰ্থিক সকাহ পাব বুলি জনায় মন্ত্ৰীজনে।
ইয়াৰ উপৰি ৰাজ্যৰ ভেন্সাৰ শিক্ষানুষ্ঠান আৰু শিক্ষকসকলক প্ৰাদেশিককৰণৰ সিদ্ধান্ত চৰকাৰে গ্ৰহণ কৰিছে বুলি জনায় বিত্ত মন্ত্ৰীজনে।
