সদৌ অসম ছাত্ৰ সন্থাৰ দৰে জাতীয় সংগঠনৰ নেতৃত্ব দি অগপৰ মজিয়াই দি গৈ ৰাজ্যৰ মুখ্য মন্ত্ৰী হৈছে সৰ্বানন্দ সোণোৱাল। কিন্তু এতিয়া সোণোৱালৰ অসমীয়াত্বক লৈ উত্থাপিত হৈছে প্ৰশ্ন।
তৰুণ গগৈৰ মতে সৰ্বানন্দ সোণোৱাল ‘এক্সিডেন্টেল অসমীয়া’। কেৱল সোণোৱালেই নহয়, মন্ত্ৰী হিমন্ত বিশ্ব শৰ্মাও ‘এক্সিডেন্টেল অসমীয়া’। তেওঁলোক অসমী আইৰ সন্তান ভুলতেই হোৱা বুলিও গগৈয়ে মন্তব্য কৰে।
‘সৰ্বানন্দ সোণোৱাল এক্সিডেন্টেল অসমীয়া, মন্ত্ৰী হিমন্ত বিশ্ব শৰ্মাও এক্সিডেন্টেল অসমীয়াহে। হিমন্ত বিশ্ব শৰ্মা আৰু সৰ্বানন্দ সোণোৱালৰ জন্ম ভুলতে অসমত হ’ল এওঁলোকৰ জন্ম আচলতে বাংলাদেশতহে হ’ব লাগিছিল, সোণোৱালে আই অসমী ক’ব নালাগে, সোণোৱালে পদ্দাকহে আই বুলিব লাগে’, তৰুণ গগৈয়ে এইদৰে কয়।
দেওবাৰে গুৱাহাটীৰ ৰাজীৱ ভৱনত অনুষ্ঠিত এখন দলীয় সভাৰ পাছত সাংবাদিকৰ আগত মন্তব্য প্ৰকাশ কৰি এইদৰে কয় প্ৰাক্তন মুখ্য মন্ত্ৰীগৰাকীয়ে।
কেৱল সিমানেই নহয় অমিত শ্বাহৰ ধমক খাইহে নিমাতী কইনা মুখ্য মন্ত্ৰী সোণোৱালৰ মাত ফুটিছে বুলিও গগৈয়ে কটাক্ষ কৰে।
মন কৰিবলগীয়া যে, বিগত দিনবোৰত নাগৰিকত্ব সংশোধনী বিধেয়কৰ বিৰুদ্ধে ৰাজ্যত বিভিন্ন দল-সংগঠন আৰু সাধাৰণ ৰাইজে আন্দোলন কৰি থকাৰ বিপৰীতে বিজেপিৰ নেতাসকলে বিধেয়কৰ পক্ষত বিভিন্ন ধৰণৰ যুক্তি দাঙি ধৰিছিল। ইয়াৰ বিপৰীতে তেনে সময়ত এই সন্দৰ্ভত মুখ্য মন্ত্ৰী সেণোৱালে মুখ খুলি ক’তো একো মন্তব্য কৰা নাছিল। যাৰ বাবে আছুকে ধৰি বিভিন্ন সংগঠনে মুখ্য মন্ত্ৰীক স্থিতি স্পষ্ট কৰাৰ বাবেও দাবী জনাইছিল।
কিন্তু হঠাতে যোৱা দুদিন মানৰ পৰা বিধেয়কখনক লৈ কেইবাখনো সভাত মুখ্য মন্ত্ৰীয়ে বিশ্লেষণ আগবঢ়োৱা পৰিলক্ষিত হৈছে। তেওঁ আনকি বিভিন্ন জনে বিধেয়কখনৰ বিপক্ষে ৰাইজৰ মাজত ভুল বাৰ্তা বিয়পাই দিয়া বুলিও মন্তব্য কৰিছে।