চৰকাৰ অথবা বিজেপিৰ বিৰুদ্ধে নহয় নিজ দলৰ নেতাৰ বিৰুদ্ধে ৰণচণ্ডী মূৰ্তি ধৰিলে কংগ্ৰেছ সভানেত্ৰী ছোনিয়া গান্ধীয়ে।
কংগ্ৰেছৰ ৱৰ্কিং কমিটিৰ বৈঠকত নিজ দলৰে 23-G নেতাসকলৰ বিৰুদ্ধে সৰৱ হ’ল সভানেত্ৰী ছোনিয়া গান্ধী।
শনিবাৰে অনুষ্ঠিত কংগ্ৰেছ ৱৰ্কিং কমিটিৰ বৈঠকত সভানেত্ৰী ছোনিয়া গান্ধীয়ে 23-G নেতাসকলক উদ্দেশ্য কৰি কয়, “মই দলৰ পূৰ্ণ পৰ্যায়ৰ সভানেত্ৰী আৰু হাতত হাত ধৰি কংগ্ৰেছক নেতৃত্ব দি আহিছো। কিবা বিষয়ে ক’বলৈ থাকিলে সংবাদ মাধ্যমৰ আগত নহয় মোক আহি কওক।”
উল্লেখ্য যে ২০১৯ৰ লোকসভা নিৰ্বাচনত কংগ্ৰেছৰ শোচনীয় পৰাজয়ৰ পিছতে সভাপতিৰ দায়িত্বৰ পৰা ৰাহুল গান্ধীয়ে অব্যাহতি লৈছিল আৰু ছোনিয়া গান্ধীক দলৰ ভাৰপ্ৰাপ্ত সভানেত্ৰীৰ দায়িত্ব অপৰ্ণ কৰা হৈছিল।
ইয়াৰ পিছতে দলৰ ২৩ গৰাকী শীৰ্ষ নেতাই দলটোক সাংগঠনিকভাৱে পুনঃ সংগঠিত কৰাৰ লগতে গান্ধী পৰিয়ালৰ প্ৰভাৱমুক্ত কৰাৰ বাবে ছোনিয়া গান্ধীলৈ এখন পত্ৰ প্ৰেৰণ কৰিছিল।
তেতিয়াৰ পৰাই কংগ্ৰেছ নেতৃত্ব আৰু 23-G নেতাসকলৰ মাজত দলৰ আভ্যন্তৰীণ বিষয়কলৈ মতানৈক্য অব্যাহত আছে।
ইয়াৰ মাজতে যোৱা ৩০ ছেপ্টেম্বৰ 23-G নেতা প্ৰাক্তন কেন্দ্ৰীয় মন্ত্ৰী কপিল ছিবালে দলৰ নেতৃত্বৰ বিৰুদ্ধে সোচ্চাৰ হৈ কৈছিল যে কংগ্ৰেছ এতিয়া গুৰীয়ালহীন, কোনেও নাজানে দলৰ সিদ্ধান্ত এতিয়া কোনে লয়।
এই মন্তব্যৰ পিছতে আজিৰ বৈঠকত ছোনিয়া গান্ধীয়ে নিৰ্বাচনৰ প্ৰতি লক্ষ্য ৰাখি দলক একগোট হৈ থকাৰ লগতে অনুশাসন মানি চলিবলৈও আহ্বান জনায়।
এক বিশেষ সূত্ৰ অনুসৰি ২০২২ চনৰ ছেপ্টেম্বৰত কংগ্ৰেছে দলৰ নতুন সভাপতি নিৰ্বাচন কৰা হ’ব আৰু দলে অক্টোবৰ মাহত নতুন সভাপতি লাভ কৰিব।
ইফালে কংগ্ৰেছৰ শীৰ্ষ কাৰ্যকৰী বৈঠকৰ ভাষণত ছোনিয়া গান্ধীয়ে দেশৰ বৈদেশিক নীতি ব্যৰ্থতা, মূল্যবৃদ্ধি, ভেকচিনৰ অনিয়ম, লখিমপুৰ কাণ্ড, কৃষক আন্দোলন, ৰাজহুৱা সম্পদ বিক্ৰী বিষয়ে উল্লেখ কৰি মোদী চৰকাৰক তীব্ৰ ভাষাৰে সমালোচনা কৰে।
