বিজ্ঞান আৰু প্ৰযুক্তিৰ জগতত অসমৰ আন এক গৌৰৱোজ্জ্বল সংযোজন! বেক্টেৰিয়াৰ দ্ৰুত চিনাক্তকৰণৰ বাবে গুৱাহাটীস্থিত ভাৰতীয় প্ৰযুক্তিবিদ্যা প্ৰতিষ্ঠানৰ গৱেষকৰ দলে উদ্ভাৱন কৰি উলিয়াইছে এবিধ অতি সুলভ আৰু সহজে কঢ়িয়াব পৰা বিশেষ যন্ত্ৰ। যুগান্তকাৰী এই উদ্ভাৱনে এতিয়াৰে পৰা বেক্টেৰিয়া চিনাক্তকৰণ প্ৰক্ৰিয়াটোক অধিক খৰতকীয়া কৰাই নহয়, বৰঞ্চ স্বাস্থ্যসেৱা আৰু পৰিৱেশ নিৰীক্ষণৰ ক্ষেত্ৰখনলৈকো কঢ়িয়াই আনিছে এক নতুন আশাৰ বতৰা।
আই আই টি গুৱাহাটীৰ ৰসায়ন বিজ্ঞান বিভাগৰ অধ্যাপক পৰমেশ্বৰ কে আয়াৰ আৰু জৈৱ-বিজ্ঞান তথা জৈৱ-প্ৰযুক্তিবিদ্যা বিভাগৰ অধ্যাপক সিদ্ধাৰ্থ এছ ঘোষৰ নেতৃত্বত এই যন্ত্ৰটো নিৰ্মাণ কৰা হৈছে। এই গৱেষক দলটোত নেন’টেকন’লজী কেন্দ্ৰৰ প্ৰাক্তন গৱেষক শিক্ষাৰ্থী অনামিকা দে, আশিস সিং আৰু দীপাঞ্জলী দত্তয়ো সক্ৰিয়ভাৱে অংশগ্ৰহণ কৰিছিল।
গৱেষক দলটোৱে জনোৱা মতে, এই যন্ত্ৰটোৰ মূল আধাৰ হৈছে ‘অৰ্গেনিক ফিল্ড ইফেক্ট ট্ৰেন্সিষ্টৰ’। এই বিশেষ প্ৰযুক্তিৰ জৰিয়তে যন্ত্ৰটোৱে দ্ৰুতভাৱে বেক্টেৰিয়া ধৰা পেলোৱাৰ লগতে ‘গ্ৰাম-পজিটিভ’ আৰু ‘গ্ৰাম-নেগেটিভ’ বেক্টেৰিয়াৰ মাজৰ পাৰ্থক্যও নিৰ্ণয় কৰিব পাৰে। সাধাৰণতে বেক্টেৰিয়া চিনাক্ত কৰিবলৈ পৰীক্ষাগাৰত এক দীঘলীয়া প্ৰক্ৰিয়াৰ মাজেৰে যাবলগীয়া হয়, য’ত বেক্টেৰিয়াৰ কালচাৰ কৰাৰ প্ৰয়োজন হয়। কিন্তু এই নতুন যন্ত্ৰটোৱে পৰীক্ষাগাৰৰ সেই জটিল আৰু সময়সাপেক্ষ প্ৰক্ৰিয়াটোক অতি সহজ কৰি তুলিছে।
এই গুৰুত্বপূৰ্ণ গৱেষণাটোক ইতিমধ্যে পেটেণ্ট প্ৰদান কৰা হৈছে। তদুপৰি, ৰয়েল ছ’চাইটি অৱ কেমিষ্ট্ৰীৰ সন্মানীয় ‘জাৰ্নেল অৱ মেটেৰিয়েলছ কেমিষ্ট্ৰী এ’ত এই গৱেষণা পত্ৰখন প্ৰকাশ পাইছে, যিয়ে ইয়াৰ বৈজ্ঞানিক গুৰুত্বক আন্তঃৰাষ্ট্ৰীয় পৰ্যায়ত প্ৰতিষ্ঠা কৰিছে।
কেৱল চিকিৎসালয় বা স্বাস্থ্যসেৱাৰ ক্ষেত্ৰতেই নহয়, বৰঞ্চ পৰিৱেশ নিৰীক্ষণ আৰু জৈৱ-সন্ত্ৰাসবাদ (anti-bioterrorism) প্ৰতিৰোধৰ দৰে গুৰুত্বপূৰ্ণ ক্ষেত্ৰতো এই প্ৰযুক্তি ব্যৱহাৰ কৰিব পৰা যাব। আই আই টি গুৱাহাটীৰ এই শেহতীয়া সাফল্যই বিজ্ঞান আৰু প্ৰযুক্তিবিদ্যাৰ জৰিয়তে বাস্তৱ জীৱনৰ সমস্যাসমূহ সমাধান কৰাৰ ক্ষেত্ৰত অসমৰ গৱেষণা প্ৰতিষ্ঠানসমূহৰ ক্ৰমৱৰ্ধমান অৱদানকে সুন্দৰভাৱে প্ৰতিফলিত কৰিছে।
