ঠিকাভিত্তিক শিক্ষকৰ চাকৰি নিয়মীয়াকৰণৰ নামত মুখ্যমন্ত্ৰী হিমন্ত বিশ্ব শৰ্মাৰ নেতৃত্বাধীন বিজেপি চৰকাৰখনে শিক্ষকসকলৰ প্ৰতি ডাঙৰ প্ৰবঞ্চনা আৰু অন্যায় কৰিবলৈ ওলাইছে। এই অভিযোগ ভাৰতৰ গণতান্ত্ৰিক যুৱ ফেডাৰেছন চমুকৈ ডি ৱাই এফ আইৰ।
ডি ৱাই এফ আইৰ অসম ৰাজ্যিক কমিটিয়ে বেতন সুৰক্ষা নিশ্চিত নকৰাকৈ এই নিয়মীয়াকৰণ প্ৰক্ৰিয়াৰ বিৰোধিতা কৰি মুখ্যমন্ত্ৰীক এই অন্যায় বন্ধ কৰিবলৈ দাবী জনাইছে।
এক বিবৃতি যোগে সংগঠনটোৱে কয় যে সমগ্ৰ ৰাজ্যতে সৰ্বশিক্ষাৰ অধীনত ২৫,৫০০ জন আৰু ষ্টেট পুলৰ অধীনত ৯,৫০০ জনসহ সৰ্বমুঠ ৩৫ হাজাৰ শিক্ষকে প্ৰাথমিক আৰু উচ্চ প্ৰাথমিক বিদ্যালয়ত কৰ্মৰত হৈ আছে।
ইয়াৰ উপৰি উচ্চ মাধ্যমিক বিদ্যালয়ত প্ৰায় ৪,৫০০ শিক্ষকে ঠিকাভিত্তিক শিক্ষক হিচাপে কৰ্মৰত হৈ আছে বুলিও আঙুলিয়াই দিয়ে সংগঠনটোৱে।
শিক্ষক সংগঠন, ডি ৱাই এফ আইৰ লগতে অন্য বিভিন্ন সংগঠনে ঠিকাভিত্তিক শিক্ষকৰ চাকৰি নিয়মীয়াকৰণৰ দাবী জনাই আহিছে বুলি উল্লেখ কৰি সংগঠনটোৱে ২০১৬ চনত বিজেপি দলেও শাসনলৈ আহিলে ঠিকাভিত্তিক শিক্ষকৰ চাকৰি নিয়মীয়াকৰণৰ প্ৰতিশ্ৰুতি দিছিল বুলি সোঁৱৰাই দিয়ে।
সংগঠনটোৰ দাবী, ধাৰাবাহিক আন্দোলনৰ হেঁচাত চৰকাৰখনে অৱশেষত নিয়মীয়াকৰণৰ কথা ঘোষণা কৰিছে যদিও যি চৰ্তৰ ভিত্তিত নিয়মীয়াকৰণ কৰিবলৈ লৈছে সেয়া মুঠেও গ্ৰহণযোগ্য নহয়।
ঠিকাভিত্তিক শিক্ষকসকলে ১২/১৩ বছৰ চাকৰি কৰাৰ পাছত বছৰেকীয়া দৰমহা বৃদ্ধিৰ ফলত বৰ্তমানে যি দৰমহা লাভ কৰে নিয়মীয়াকৰণ হ’লে সেয়া সম্ভৱ নহ’ব বুলি দাবী কৰে ডি ৱাই এফ আই- এ।
লগতে শিক্ষকসকলৰ এই দীঘলীয়া চাকৰিকালো নিয়মীয়া চাকৰিত বিবেচনালৈ নাহিব আৰু এয়া সম্পূৰ্ণ নতুন নিযুক্তি বুলি গণ্য কৰা হ’ব বুলি সংগঠনটোৱে অভিযোগ কৰে।
“উচ্চ মাধ্যমিক বিদ্যালয়ত কৰ্মৰত ঠিকাভিত্তিক শিক্ষকসকল ২০/২২ বছৰ ধৰি শিক্ষক হিচাপে কৰ্মৰত হৈ আছে। চৰকাৰৰ এই হঠকাৰী সিদ্ধান্তই এই শিক্ষকসকলকো নতুন নিযুক্তি হিচাপে দেখুৱাব।”- বিবৃতিটোত এইদৰে কয় সংগঠনটোৱে।
ডি ৱাই এফ আইৰ মতে, এয়া শিক্ষক সমাজৰ প্ৰতি প্ৰবঞ্চনাই নহয়, এয়া ডাঙৰ অন্যায় আৰু ইয়াৰ ফলত বছৰ বছৰ ধৰি নিষ্ঠাৰে শিক্ষা সেৱাত ব্ৰতী হৈ থকা ঠিকাভিত্তিক শিক্ষকসকলে বৃহৎ আৰ্থিক ক্ষতিৰ সন্মুখীন হোৱাৰ লগতে ডাঙৰ মানসিক আঘাত পাব।
সেয়ে বেতন সুৰক্ষাসহ ঠিকাভিত্তিক শিক্ষকৰ চাকৰি নিয়মীয়া কৰাৰ লগতে পূৰ্বৰ যোগদান কৰা দিনৰ পৰাই চাকৰি কাল নিশ্চিত কৰিবলৈ দাবী জনাইছে ডি ৱাই এফ আইয়ে।
