কানাডাত ‘ভাৰত বিৰোধী’ বিদ্বেষ বৃদ্ধি পাইছে। ‘ভাৰত বিৰোধী’ কাৰ্যকলাপো সংঘটিত হোৱা দেখা হৈছে। এনে পৰিস্থিতিত ভাৰতৰ বৈদেশিক পৰিক্ৰমা মন্ত্ৰালয়ে কানাডাত বাস কৰা দেশৰ শিক্ষাৰ্থীসকললৈ এক সতৰ্কবাণী জাৰি কৰিছে।
শুকুৰবাৰে বৈদেশিক পৰিক্ৰমা মন্ত্ৰালয়ে এই সন্দৰ্ভত এক নিৰ্দেশনা জাৰি কৰে। বৈদেশিক পৰিক্ৰমা মন্ত্ৰালয়ে কয় যে নতুন দিল্লীয়ে শেহতীয়া সাম্প্ৰদায়িক হিংসা, ঘৃণামূলক অপৰাধ আৰু ভাৰত বিৰোধী কাৰ্যকলাপৰ বিষয়ে ইতিমধ্যে কানাডা চৰকাৰৰ সৈতে কথা পাতিছে। ভাৰত চৰকাৰেও এই ঘটনাবোৰৰ তদন্ত আৰু ইয়াৰ ওপৰত ভিত্তি কৰি কঠোৰ ব্যৱস্থা গ্ৰহণৰ দাবী জনাইছে।
নিৰ্দেশনাটোত লগতে কোৱা হৈছে, “কানাডাত ভাৰতীয়সকলৰ প্ৰতি ঘৃণাৰ বাবে সংঘটিত অপৰাধত দোষী সকলৰ বিৰুদ্ধে এতিয়ালৈকে কোনো ব্যৱস্থা লোৱা হোৱা নাই।‘’
লগতে পঢ়ক: যৌনতাৰ প্ৰস্তাৱত সন্মত নোহোৱাৰ বাবে যুৱতীক ‘হত্যা’! গ্ৰেপ্তাৰ বিজেপি নেতাৰ পুত্ৰ
ভাৰতীয় শিক্ষাৰ্থীসকলক সতৰ্ক কৰি দি কোৱা হৈছে, “সাম্প্ৰতিক পৰিস্থিতিৰ প্ৰতি লক্ষ্য ৰাখি কানাডাত ভাৰতীয় শিক্ষাৰ্থী আৰু পৰ্যটকসকলক অধিক সতৰ্ক হ’বলৈ অনুৰোধ জনোৱা হৈছে। অটাৱাত থকা ভাৰতীয় উচ্চায়োগ বা টৰণ্টো বা ভেংকুভাৰৰ ভাৰতৰ কনচুলেট জেনেৰেলৰ ৱেবছাইটত নিজৰ নাম পঞ্জীয়ন কৰক। ইয়াৰ উপৰিও, ভাৰতীয় নাগৰিকসকলে ভাৰত চৰকাৰৰ ৱেবছাইটত madad.gov.in নিজৰ নাম পঞ্জীয়ন কৰিব পাৰে, যাতে জৰুৰী পৰিস্থিতিত নাগৰিকসকলৰ সৈতে সহজে যোগাযোগ কৰিব পাৰি।‘’
উল্লেখ্য যে যোৱা এপ্ৰিলত টৰণ্টোৰ পাতাল ৰে’লষ্টেচনৰ প্ৰৱেশদ্বাৰৰ সন্মুখত এজন ভাৰতীয় ছাত্ৰক গুলীয়াই হত্যা কৰা হৈছিল। বৈদেশিক পৰিক্ৰমা মন্ত্ৰী এছ জয়শংকৰে ঘটনাটোত শোক প্ৰকাশ কৰিছিল।
লগতে পঢ়ক: ডিমাচা চলচ্চিত্ৰ ‘ছেমখোৰ’ৰ বিষয়বস্তুক লৈ আইনী সমস্যাত অভিনেত্ৰী আইমী বৰুৱা
শেহতীয়াকৈ টৰণ্টোৰ স্বামীনাৰায়ণ মন্দিৰৰ সন্মুখত ভাৰত বিৰোধী শ্ল’গানক লৈ এক ব্যাপক প্ৰতিক্ৰিয়াৰ সৃষ্টি হৈছিল।