মুম্বাই-আহমেদাবাদৰ উপৰি ভাৰতৰ আৰু ছটা পথত বুলেট ট্ৰেইন চলিব পাৰে, বাতৰিত প্ৰকাশ।
বৰ্তমান মুম্বাই-আহমেদাবাদ প্ৰকল্পৰ কাম দ্ৰুতগতিত চলি আছে। কিন্তু ভাৰতীয় ৰেলৱেই দেশৰ আন পথতো যাত্ৰী আৰু মালগাড়ী দুয়োবিধৰে গতি বৃদ্ধিৰ বাবে কাম কৰি আছে।
ৰেল মন্ত্ৰী পীয়ুশ গোৱেলে লোক সভাত জনোৱা মতে যোৱা বছৰ আগষ্টত দেশৰ দুটা ৰেলপথত গতি ১৬০ কি.মি.লৈ বৃদ্ধিত অনুমোদন জনোৱা হৈছে।
ৰেলপথ দুটা হৈছে নতুন দিল্লী-মুম্বাই আৰু নতুন দিল্লী-হাওৰা পথ।
বাতৰি মতে, ৰেল মন্ত্ৰ্যালয়ে ছটা উচ্চগতিৰ ৰেল কৰিডৰৰ বাবে ডি পি আৰ (Detailed Project Report) আহ্বান কৰিছে।
মন্ত্ৰী গোৱেলৰ মতে, এই কাম নেচনেল হাই স্পীড ৰেল কৰ্পৰেচন লিমিটেডক দিয়া হৈছে।
বুলেট ট্ৰেইনৰ সম্ভাৱ্য পথকেইটা হৈছে:
১. ৮৬৫ কি. মি. দৈৰ্ঘ্যৰ দিল্লী–নইডা–আগ্ৰা–কাণপুৰ– লক্ষ্ণৌ–বাৰাণসী
২. ৮৮৬ কি. মি. দৈৰ্ঘ্যৰ দিল্লী-জয়পুৰ-উদয়পুৰ-আহমেদাবাদ
৩. ৭৫৩ কি. মি. দৈৰ্ঘ্যৰ মুম্বাই-নাছিক-নাগপুৰ
৪. ৭১১ কি. মি. দৈৰ্ঘ্যৰ মুম্বাই-পুনে-হায়দৰাবাদ
৫. ৪৩৫ কি. মি. দৈৰ্ঘ্যৰ চেন্নাই-বেংগালুৰু-মাইছৰ
৬. ৪৫৯ কি. মি. দৈৰ্ঘ্যৰ দিল্লী-চণ্ডীগড়-লুধিয়ানা-জলন্ধৰ-অমৃতসৰ
মুম্বাই-আহমেদাবাদৰ মাজৰ নিৰ্মীয়মান বুলেট ট্ৰেইনে দুয়ো ঠাইৰ যাত্ৰাকাল মাত্ৰ দুঘণ্টালৈ কমাই আনিব।
প্ৰধান মন্ত্ৰী নৰেন্দ্ৰ মোদী আৰু জাপানী প্ৰধান মন্ত্ৰী শ্বিনজ’ আবেই ২০১৭ চনৰ ছেপ্তেম্বৰত প্ৰকল্পটোৰ শুভাৰম্ভ কৰিছিল।
