মধ্যপ্ৰাচ্যভিত্তিক সন্ত্ৰাসবাদী সংগঠন ইছলামিক ষ্টেট (আই এছ)ৰ মুৰব্বী আবু আল হুছেইন আল হুছেইনী আল কুৰেছী নিহত হৈছে। বৃহস্পতিবাৰে আই এছে তেওঁৰ মৃত্যুৰ খবৰ নিশ্চিত কৰিছে।
সংগঠনটোৱে জানিবলৈ দিয়া মতে, উত্তৰ-পশ্চিম ছিৰিয়াত সংঘটিত হোৱা সংঘৰ্ষত আল কুৰেছি নিহত হয়। ইয়াৰ মাজতে আই এছে তেওঁৰ উত্তৰাধিকাৰীৰ নাম ঘোষণা কৰিছে। তেওঁৰ নাম আবু হাফছ আল হাছিমি আল কুৰেছি।
আই এছৰ এগৰাকী মুখপাত্ৰই অডিঅ’ বাৰ্তাযোগে কয় যে ইডলিব প্ৰদেশত জেহাদী গোট হায়াত তাহৰিৰ আল শ্বামৰ সৈতে প্ৰত্যক্ষ সংঘৰ্ষত তেওঁলোকৰ নেতা নিহত হৈছে।
লগতে পঢ়ক: তুমুল হুলস্থুলৰ মাজতে লোকসভাত গৃহীত দিল্লী সেৱা বিধেয়ক; বিৰোধীৰ সদন ত্যাগ, নিলম্বিত আপ সাংসদ
বৃহস্পতিবাৰে সংগঠনটোৰ টেলিগ্ৰাম চেনেলত প্ৰকাশ কৰা হয় এই প্ৰি-ৰেকৰ্ডিং বাৰ্তা। কিন্তু আবু আল হুছেইন আল কুৰেছিক হত্যা কৰাৰ সময় বিশেষভাৱে উল্লেখ কৰা হোৱা নাই।
আই এছৰ মুখপাত্ৰগৰাকীয়ে লগতে কয় যে আবু হাফছ আল হাছিমি আল কুৰেছিয়ে আই এছৰ নতুন মুৰব্বী হিচাপে দায়িত্ব গ্ৰহণ কৰিছে। তেওঁ সংগঠনটোৰ পঞ্চমজন নেতা।
যোৱা এপ্ৰিল মাহৰ শেষৰ ফালে তুৰ্কীৰ ৰাষ্ট্ৰপতি ৰেচেপ টাইপ এৰদোগানে ঘোষণা কৰিছিল যে ছিৰিয়াত তুৰ্কীৰ চোৰাংচোৱা সংস্থা এম আই টিৰ অভিযানত আই এছৰ এজন সন্দেহযুক্ত নেতা নিহত হৈছে।
সেই সময়ত এৰদোগানে কৈছিল, “চিৰিয়াত এম আই টিৰ অভিযানত ডায়েছৰ সন্দেহযুক্ত নেতা (আই এছৰ আন এটা নাম) নিহত হৈছে। তেওঁৰ সাংকেতিক নাম আবু হুছেইন আল-কুৰেছি।‘’
লগতে পঢ়ক: টেইলৰৰ মহানুভৱতা! ৮২ লাখ টকাকৈ দিলে ৫০জন ট্ৰাক চালকক! দিলে বিশেষ কামৰ পুৰস্কাৰ
তুৰ্কীৰ সংবাদমাধ্যমত এটা অট্টালিকাৰ কিছু ছবি প্ৰকাশ পাইছে। ছিৰিয়াৰ আফ্ৰিন অঞ্চলৰ এখন পথাৰৰ মাজত অৱস্থিত এই অট্টালিকাটো। তুৰ্কীৰ সংবাদ মাধ্যমে দাবী কৰিছে যে কুৰেছিয়ে সেই অট্টালিকাটোত আত্মগোপন কৰি আছিল। আলেপ্পো প্ৰদেশত আছে এই আফ্ৰিন চহৰ।
আই এছৰ এগৰাকী মুখপাত্ৰই জনোৱা মতে, ইডলিব প্ৰদেশৰ বিদ্ৰোহীৰ অধীনস্থ অঞ্চল নিয়ন্ত্ৰণ কৰা সশস্ত্ৰ গোট হায়াত তাহৰিৰ আল-শ্বাম (এইচ টি এছ)ৰ সদস্যসকলে আই এছৰ মুৰব্বীজনক হত্যা কৰে। তেওঁৰ মৃতদেহ তুৰস্কক গতাই দিয়া হৈছে।
অৱশ্যে এইচ টি এছে আংকাৰাৰ স্বাৰ্থত আই এছ নেতাগৰাকীৰ বিৰুদ্ধে কোনো অভিযান চলোৱা সন্দৰ্ভত একো কোৱা নাই। আমেৰিকাকে ধৰি অন্যান্য পশ্চিমীয়া দেশসমূহে এইচ টি এছক সন্ত্ৰাসবাদী সংগঠন হিচাপে তালিকাভুক্ত কৰিছে।
লগতে পঢ়ক: অথলে গ’ল ৰিয়ান পৰাগৰ দৰ্শনীয় প্ৰদৰ্শন! দেওধৰ ট্ৰফীত ইষ্ট জ’নক পৰাস্ত কৰি চেম্পিয়ন ছাউথ জ’ন
যোৱা বছৰৰ নৱেম্বৰ মাহত আই এছে কৈছিল যে ইয়াৰ পূৰ্বৰ নেতা আবু হাছান আল হাছিমি আল কুৰেছিক হত্যা কৰা হৈছে। যোৱা বছৰৰ ফেব্ৰুৱাৰী মাহত ইডলিব প্ৰদেশত আমেৰিকান বাহিনীৰ অভিযানত তেওঁৰ পূৰ্বৰ আবু ইব্ৰাহিম আল কুৰেছি নিহত হৈছিল।
আনহাতে, ২০১৯ চনৰ অক্টোবৰ মাহত আই এছৰ প্ৰথম মুৰব্বী আবু বকৰ আল বাগদাদীক হত্যা কৰা হৈছিল।
