ইজৰাইলী বায়ু সেনাই গাজাত প্রচণ্ড বোমাবর্ষণ কৰিছে। শুকুৰবাৰে ইজৰাইল প্ৰতিৰক্ষা বাহিনীৰ যুঁজাৰু বিমানে পেলেষ্টাইনী উগ্ৰপন্থী গোট ইছলামিক জিহাদৰ ঘাটিত এটাৰ পিছত এটাকৈ বোমাৰে আক্ৰমণ চলায়। এই আক্ৰমণত সংগঠনটোৰ এগৰাকী শীৰ্ষ কমাণ্ডাৰসহ ১০জন নিহত হয়।
আন্ত:ৰাষ্ট্ৰীয় সংবাদ সংস্থাৰ বাতৰি অনুসৰি ইজৰাইলী সামৰিক বাহিনীয়ে টুইটাৰত এই আক্ৰমণৰ কথা সদৰী কৰিছে। ইয়াক পেলেষ্টাইনী ইছলামিক জিহাদৰ মোকাবিলা কৰাৰ বাবে লোৱা এক পদক্ষেপ বুলি কোৱা হৈছে।
লগতে পঢ়ক: অৱশেষত মুকলি আকাশৰ তললৈ আহিল বক্সাৰ মাইনা চুতীয়া ওৰফে প্ৰণীতা চুতীয়া
চলিত সপ্তাহতে গাজাত এগৰাকী উগ্ৰপন্থী নেতাক গ্ৰেপ্তাৰ কৰা হৈছিল। তাৰ পিছৰে পৰাই ইজৰাইলে আক্ৰমণৰ প্ৰস্তুতি চলাই আহিছে। চাৰি দিন পূৰ্বে তেওঁলোকে গাজালৈ যোৱাৰ দুটা ক্ৰছিং বন্ধ কৰি দিছিল। ইজৰাইল চৰকাৰে গাজা সীমান্তত ভ্ৰমণ কৰা দেশখনৰ নাগৰিকসকলক সতৰ্ক কৰি দিছে।
এক বিবৃতিত ইছলামিক জিহাদে জনাইছে যে ইজৰাইলী আক্ৰমণত ইয়াৰ কমাণ্ডাৰ তাইচিৰ আল-জাবাৰী নিহত হৈছে। জাবাৰী সংগঠনটোৰ সশস্ত্ৰ বাহিনী ‘কাডছ ব্ৰিগেড’ৰ নেতৃত্বত আছিল।
পেলেষ্টাইনৰ স্বাস্থ্য মন্ত্ৰালয়ে জনায় যে ইজৰাইলী যুদ্ধবিমানত ১০ জন লোক নিহত হৈছে। নিহতসকলৰ ভিতৰত এটা পাঁচ বছৰীয়া শিশুও আছে।
লগতে পঢ়ক: Commonwealth Games 2022: ছেমিত থমকিল ধিং এক্সপ্ৰেছ; ০.০১ ছেকেণ্ডৰ বাবে ফাইনেল নাপালে হিমাই
ইজৰাইলৰ সামৰিক বাহিনীয়ে কয় যে জাবাৰীয়ে আইডিএফ সৈন্যক আক্ৰমণ কৰাৰ প্ৰস্তুতি চলাই আছিল। সেয়ে তেওঁক তাৰ পূৰ্বে হত্যা কৰা হ’ল। এই আক্ৰমণৰ সময়ত উগ্ৰপন্থী দলটোৰ দুটা এণ্টি-টেংক স্কোয়াডো ধ্বংস কৰা হৈছে।
ইপিনে জাবাৰীৰ মৃত্যুত ক্ষুব্ধ হৈ পেলেষ্টাইনী উগ্ৰপন্থীয়ে ইজৰাইলৰ ভূখণ্ডত এটাৰ পিছত এটাকৈ ৰকেট আক্ৰমণ চলাইছে। বৰ্তমান গাজাত এক যুদ্ধসদৃশ পৰিস্থিতিয়ে বিৰাজ কৰিছে।
