আমেৰিকা যুক্তৰাষ্ট্ৰৰ ৰাষ্ট্ৰপতি ডনাল্ড ট্ৰাম্পৰ ‘ব’ৰ্ড অৱ পিচ’ৰ তৰফৰ পৰা গাজাৰ বাবে আগবঢ়োৱা ১৫ দফীয়া শান্তি প্ৰস্তাৱ ইজৰাইলে পোনচাটেই প্ৰত্যাখ্যান কৰিছে। দেওবাৰে এখন কেবিনেট বৈঠকত অংশগ্ৰহণ কৰি ইজৰাইলৰ প্ৰধানমন্ত্ৰী বেঞ্জামিন নেতান্যাহুৱে স্পষ্ট কৰি দিয়ে যে যেতিয়ালৈকে হামাছ সম্পূৰ্ণৰূপে নিৰস্ত্ৰ নহয়, তেতিয়ালৈকে গাজাৰ পৰা ইজৰাইলী সেনা প্ৰত্যাহাৰ কৰা নহ’ব।
প্ৰধানমন্ত্ৰী নেতান্যাহুৱে ১৫ দফীয়া শান্তি প্ৰস্তাৱটো পোনচাটেই প্ৰত্যাখ্যান কৰি কয় যে হামাছ সম্পূৰ্ণৰূপে নিৰস্ত্ৰ নোহোৱা পৰ্যন্ত ইজৰাইলী প্ৰতিৰক্ষা বাহিনীয়ে কোনো কাৰণতে সেনা প্ৰত্যাহাৰ নকৰে। বৰঞ্চ দেশৰ সেনা আৰু নাগৰিকৰ নিৰাপত্তাৰ প্ৰতি থকা সকলো ভাবুকি নিৰ্মূল কৰাৰ অভিযান অব্যাহত ৰাখিব। নিৰস্ত্ৰীকৰণৰ বিষয়টো অধিক স্পষ্ট কৰি তেওঁ কয় যে হামাছে তেওঁলোকৰ লঘু আৰু গুৰু সকলো ধৰণৰ অস্ত্ৰ ত্যাগ কৰিব লাগিব, আৰু এই নিৰস্ত্ৰীকৰণ কেৱল নামত বা কাল্পনিক নহয়, বৰঞ্চ প্ৰকৃত অৰ্থত হ’ব লাগিব। ইয়াৰ উপৰি, তেওঁ শাসনত থকালৈকে গাজা বা পশ্চিম তীৰত কোনো স্বাধীন পেলেষ্টাইনী ৰাষ্ট্ৰ প্ৰতিষ্ঠা হ’বলৈ নিদিয়ে বুলিও নেতান্যাহুৱে দৃঢ়তাৰে প্ৰকাশ কৰে।
উল্লেখযোগ্য যে ইয়াৰ যোৱা সপ্তাহতেই ‘ব’ৰ্ড অৱ পিচ’ৰ পৰিচালক নিকোলাই মলাডেনভে নেতান্যাহুৰ সৈতে সাক্ষাৎ কৰি জনাইছিল যে হামাছৰ সম্পূৰ্ণ নিৰস্ত্ৰীকৰণৰ পিছতহে ইজৰাইলী সেনা প্ৰত্যাহাৰ হ’ব পাৰিব। ইয়াৰ বিপৰীতে, হামাছে ৮ আগষ্ট, শনিবাৰে আমেৰিকা সমৰ্থিত এই শান্তি প্ৰস্তাৱ মানি ল’বলৈ প্ৰস্তুত বুলি প্ৰকাশ কৰি চুক্তিখন কাৰ্যকৰী কৰাৰ বাবে ইজৰাইলৰ ওপৰত হেঁচা প্ৰয়োগ কৰিবলৈ আহ্বান জনাইছিল। হামাছে ট্ৰাম্পৰ ‘ব’ৰ্ড অৱ পিচ’ক অৱগত কৰিছিল যে তেওঁলোকে প্ৰস্তাৱটোৰ শেহতীয়া পৰ্যায়টোক সমৰ্থন কৰে। এই প্ৰস্তাৱ অনুসৰি, যুদ্ধবিধ্বস্ত গাজাত হামাছৰ সদস্যসকলে এখন নৱগঠিত পেলেষ্টাইনী শাসকীয় সমিতিৰ হাতত অস্ত্ৰ-শস্ত্ৰসমূহ অৰ্পণ কৰাৰ কথা উল্লেখ আছে।
শনিবাৰে হামাছৰ এগৰাকী বিষয়াই সংবাদ সংস্থা এ এফ পিক জনোৱা মতে, “হামাছ আৰু অন্যান্য গোটসমূহে মধ্যস্থতাকাৰীসকলক নিশ্চিত কৰিছে যে তেওঁলোক চুক্তিখন কাৰ্যকৰী কৰিবলৈ আৰু দ্বিতীয় পৰ্যায়লৈ যাবলৈ সাজু আছে। পিছে ইয়াৰ বাবে ইজৰাইলৰ সন্মতি লাগিব আৰু ইজৰাইলে প্ৰথমে চুক্তিখন কাৰ্যকৰী কৰিবলৈ আৰম্ভ কৰিব লাগিব।”
উল্লেখ্য যে, ইয়াৰ কেইদিনমান পূৰ্বে সংযুক্ত আৰব আমিৰশ্বাহী আৰু আন সাতখন মুছলমান সংখ্যাগৰিষ্ঠ দেশে এক যৌথ বিবৃতিত গাজা ষ্ট্ৰিপত ইজৰাইলৰ সামৰিক অভিযানক তীব্ৰ সমালোচনা কৰিছিল। তেওঁলোকে অভিযোগ কৰিছিল যে ইজৰাইলৰ এনে আক্ৰমণাত্মক পদক্ষেপে সংঘাত ওৰ পেলোৱাৰ উদ্দেশ্যে অনা ট্ৰাম্পৰ শান্তি প্ৰস্তাৱক ব্যৰ্থ কৰাৰ ভাবুকি কঢ়িয়াই আনিছে। গাজাত যোৱা অক্টোবৰত হোৱা যুদ্ধবিৰতি চুক্তিৰ পিছৰেপৰাও ইজৰাইলে প্ৰায় প্ৰতিদিনেই বিমান আক্ৰমণ অব্যাহত ৰখাৰ অভিযোগ উঠিছে।
