বিশিষ্ট বুদ্ধিজীৱী ড০ হীৰেন গোহাঁইৰ বিৰূদ্ধে লতাশিল থানাত দেশদ্ৰোহিতাৰ গোচৰ ৰুজু হোৱাৰ পাছত ৰাজ্যজুৰি ব্যাপক প্ৰতিক্ৰিয়া হৈছিল। কিন্তু ইয়াৰ পাছত চৰকাৰে এই বিষয়লৈ ‘মিছা’ৰ আশ্ৰয় লোৱাৰ অভিযোগ আনিছে প্ৰাক্তন মুখ্য মন্ত্ৰী তৰুণ গগৈয়ে।
বুধবাৰে সংবাদ মাধ্যমৰ আগত মন্তব্য প্ৰকাশ কৰি তৰুণ গগৈয়ে কয় যে মুখ্য মন্ত্ৰীৰ অনুমতি নোহোৱাকৈ ড০ হীৰেন গোহাঁইৰ বিৰুদ্ধে এই গোচৰ ৰুজু হ’ব নোৱাৰে।
গগৈয়ে কয়, ‘ড০ হীৰেন গোহাঁই অসমৰেই নহয় ভাৰতবৰ্ষৰ এজন মূধাফুটা বুদ্ধিজীৱী। তেনে এজন ব্যক্তিৰ বিৰুদ্ধে মুখ্য মন্ত্ৰীৰ অনুমতি নোহোৱাকৈ ডি জি পিয়েই হওক বা আন আৰক্ষী বিষয়াই হওক কাৰো গোচৰ ৰুজু কৰিবলৈ সাহস নাই। ডিজিপিয়েও তেনে সিদ্ধান্ত ল’বলৈ মুখ্য মন্ত্ৰীৰ পৰা অনুমতি লৈহে কাম কৰে। আমিয়ো চৰকাৰ চলাইছিলো, আমি এই কথা জানো’।
উল্লেখযোগ্য যে বিজেপিৰৰ লাহোৱাল সমষ্টিৰ বিধায়ক ঋতুপৰ্ণ বৰুৱাই সংবাদ মাধ্যমৰ আগত দুদিনমান পূৰ্বে মন্তব্য কৰিছিল যে মুখ্য মন্ত্ৰী সৰ্বানন্দ সোণোৱালে নজনাকৈয়ে তেওঁক অস্বস্তিত পেলাবলৈ গৃহ বিভাগৰ কোনো বিষয়াই ড০ গোহাঁইৰ বিৰুদ্ধে দেশদ্ৰোহিতাৰ গোচৰটো ৰুজু কৰিছিল। মুখ্য মন্ত্ৰী সোণোৱালৰ ইয়াত হাত নাছিল। কিন্তু ১৬ জানুৱাৰিত সংবাদ মাধ্যমৰ আগত প্ৰাক্তন মুখ্য মন্ত্ৰীজনে ইয়াক বিজেপিৰ এটা গোকাট মিছা’ আখ্যা দিয়ে।
গগৈৰ প্ৰশ্ন- ‘যদি মুখ্য মন্ত্ৰীক অস্বস্তিত পেলাবলৈয়ে গোহাঁইৰ বিৰূদ্ধে গোচৰ ৰুজু হৈছিল তেনেহ’লে সেই আৰক্ষী বিষয়াজনৰ বিৰূদ্ধে ব্যৱস্থা গ্ৰহণ হোৱা নাই কিয়?’
তেওঁ লগতে ইয়াকো কয় যে চৰকাৰে এই কথাৰ দ্বাৰা হীৰেন গোহাঁইয়ে আইন ভংগ কৰা নাই বুলি আওপকীয়াকৈ কোৱাটো হৈছে। কিন্তু তেওঁৰ বিৰূদ্ধে ৰুজু হোৱা গোচৰ প্ৰত্যাহাৰ নকৰাৰ বিষয়টোতো গগৈয়ে প্ৰশ্ন উত্থাপন কৰে।
উল্লেখ্য যে, যোৱা ৭ ডিচেম্বৰত গুৱাহাটীৰ আমবাৰীত নাগৰিকত্ব সংশোধনী বিধেয়কৰ বিৰোধিতাৰে অনুষ্ঠিত ‘ধিক্কাৰ দিৱস’ৰ কাৰ্যসূচীত স্বাধীন অসমৰ দাবী উঠোৱাৰ অভিযোগত ড০ হীৰেন গোহাই, মনজিৎ মহন্ত আৰু অখিল গগৈৰ বিৰূদ্ধে দেশদ্ৰোহিতাৰ অভিযোগ আনি আৰক্ষীয়ে এক নিজাববীয়া গোচৰ তৰিছিল। এই গোচৰৰ পাছতেই আৰক্ষী তথা অসম চৰকাৰৰ বিৰূদ্ধে ৰাজ্যজুৰি প্ৰতিবাদ সাব্যস্ত হৈছিল।
