২০০ কোটি টকাৰ বিত্তীয় প্ৰৱঞ্চনাৰ গোচৰত এক নতুন মোৰ। দীৰ্ঘদিনীয়া এই গোচৰত বলীউডৰ অভিনেত্ৰী জেকলিন ফাৰ্নাণ্ডেজৰ বিৰুদ্ধে অভিযোগ গঠনৰ (চাৰ্জ ফ্ৰেম) কৰাৰ নিৰ্দেশ দিছে দিল্লীৰ আদালতে। কেৱল জেকলিনেই নহয়, অভিযুক্ত সুকেশ চন্দ্ৰশেখৰ, তেওঁৰ পত্নী লিনা মাৰিয়া পলকে ধৰি আন ১৪জন অভিযুক্তৰ তালিকাত আছে। ফলত দীৰ্ঘদিনীয়া বিতৰ্কিত এই গোচৰৰ বিচাৰৰ পথ অধিক স্পষ্ট হৈ পৰিছে।
শনিবাৰে দিল্লীৰ পাটিয়ালা হাউছ আদালতে কয় যে ইডিৰ তদন্তৰ পৰা ওলোৱা তথ্যৰ ভিত্তিত জেকলিনকে ধৰি মুঠ ১৭জন লোকৰ বিৰুদ্ধে অভিযোগ উত্থাপন কৰা হ’ব। অহা ৩ জুনত আনুষ্ঠানিকভাৱে এই অভিযোগনামাত স্বাক্ষৰ হোৱাৰ সম্ভাৱনা আছে।
কেইবছৰমান আগতে এই গোচৰটো আৰম্ভ হৈছিল। অভিযোগ অনুসৰি দিল্লীৰ তিহাৰ কাৰাগাৰত বন্দী হৈ থকাৰ সময়তে সুকেশ চন্দ্ৰশেখৰে ৰেনবেক্সীৰ প্ৰাক্তন বছ শিবিন্দৰ সিঙৰ পত্নী অদিতি সিঙৰ পৰা প্ৰায় ২০০ কোটি টকা আত্মসাৎ কৰিছিল। তদন্তকাৰীয়ে দাবী কৰিছে যে চৰকাৰী বিষয়াৰ ৰূপ লৈ আৰু সহযোগীৰ নেটৱৰ্ক ব্যৱহাৰ কৰি এই জালিয়াতি সংঘটিত কৰা হৈছিল।
তদন্তৰ সময়ত জেকলিন ফাৰ্নাণ্ডেজৰ নাম চৰ্চালৈ আহিছিল। সুকেশৰ পৰা বিলাসী সামগ্ৰী আৰু উচ্চ মূল্যৰ সম্পত্তিকে ধৰি কেইবাটাও দামী উপহাৰ লাভ কৰা বুলি অভিযোগ উত্থাপন কৰে ইডিয়ে। তদন্তকাৰী সংস্থাটোৱে দাবী কৰিছে যে এই উপহাৰসমূহ ক্ৰয় কৰিবলৈ ব্যৱহাৰ কৰা ধন ধন দাবী ৰেকেটৰ জৰিয়তে উপাৰ্জন কৰা ধনৰ অংশ আছিল।
অৱশ্যে জেকলিনে আৰম্ভণিৰে পৰাই তেওঁৰ বিৰুদ্ধে উত্থাপিত অভিযোগ অস্বীকাৰ কৰি আহিছে। অভিনেত্ৰীগৰাকীয়ে দাবী কৰে যে সুকেশে দিয়া ধন বা উপহাৰ যে কোনো অপৰাধমূলক কাৰ্যৰ সৈতে জড়িত সেই কথা তেওঁ নাজানিছিল।
গোচৰৰ তদন্তৰ সময়ত জেকলিনে ‘অনুমোদনকাৰী’ বা চৰকাৰী সাক্ষী হিচাপেও আৱেদন কৰিছিল। তেওঁ দাবী কৰে যে তেওঁৰ হাতত গুৰুত্বপূৰ্ণ তথ্য আছে যিয়ে তদন্তত সহায় কৰিব পাৰে। কিন্তু ইডিয়ে সেই আবেদনখনক সমৰ্থন কৰা নাছিল। সংস্থাটোৱে জনোৱা মতে, এই কাণ্ডত জেকলিন কোনো সাধাৰণ ভূমিকাত নাছিল, কিন্তু সুকেশে প্ৰতাৰণা কৰা বিপুল পৰিমাণৰ ধনৰ অন্যতম সুবিধাভোগী আছিল।
তদন্তকাৰীয়ে লগতে দাবী কৰে যে অভিনেত্ৰীগৰাকীয়ে সুকেশৰ অপৰাধমূলক অতীতৰ বিষয়ে জানিব পাৰিও তেওঁৰ সৈতে যোগাযোগ অক্ষুণ্ণ ৰাখিছিল। কিন্তু পিছত জেকলিনে অনুমোদনকাৰী হ’বলৈ কৰা আবেদন প্ৰত্যাহাৰ কৰে। এইবাৰ আদালতৰ নিৰ্দেশত অভিযোগ গঠন কৰাৰ প্ৰক্ৰিয়া আৰম্ভ হোৱাৰ লগে লগে গোচৰটো নতুন পৰ্যায়লৈ লৈ গৈছে। অভিযোগনামা সম্পূৰ্ণ হোৱাৰ পিছত জেকলিন, সুকেশ আৰু আন অভিযুক্তসকলৰ বিৰুদ্ধে আনুষ্ঠানিক বিচাৰ আৰম্ভ হ’ব।
