ঝাৰখণ্ডত পৰীক্ষাৰ ব্যাপক খেলিমেলিক লৈ তীব্ৰতৰ হৈ পৰা ছাত্ৰ আন্দোলনৰ অন্ত পেলাবলৈ ৰাজ্য চৰকাৰ আৰু প্ৰতিবাদকাৰীৰ মাজত বৰ্তমান ষষ্ঠ লানি গুৰুত্বপূৰ্ণ আলোচনা চলি আছে। বিগত দুসপ্তাহ ধৰি চলা তীব্ৰ প্ৰতিবাদ আৰু পূৰ্বৰ পাঁচলানি বৈঠক ব্যৰ্থ হোৱাৰ পাছত অৱশেষত চৰকাৰে ছাত্ৰ-ছাত্ৰীৰ ক্ষোভ ন্যায্য বুলি স্বীকাৰ কৰিছে। ইয়াৰ লগতে আন্দোলনকাৰীৰ দাবী মানি সমগ্ৰ কেলেংকাৰীৰ তদন্ত বলৱৎকৰণ সঞ্চালকালয়ক (ED) অৰ্পণ কৰাৰো পৰিকল্পনা কৰিছে ৰাজ্য চৰকাৰে।
ৰাজ্যিক মন্ত্ৰী দীপিকা পাণ্ডে সিঙে পূৰ্বে জানিবলৈ দিছিল যে মুখ্যমন্ত্ৰী হেমন্ত ছোৰেণক ছাত্ৰ-ছাত্ৰীসকলৰ দাবী আৰু আলোচনাৰ পৰা ওলাই অহা মতামত সন্দৰ্ভত অৱগত কৰা হৈছে। আনহাতে, কালি মুখ্যমন্ত্ৰীৰ সৈতে হোৱা বৈঠকৰ পাছত আন এগৰাকী মন্ত্ৰী সঞ্জয় প্ৰসাদ যাদৱে ছাত্ৰ-ছাত্ৰীসকলৰ সৈতে পৰৱৰ্তী পৰ্যায়ৰ আলোচনা অনুষ্ঠিত কৰাৰ সিদ্ধান্ত লোৱা বুলি প্ৰকাশ কৰিছিল।
ৰাঁচীৰ জয়পাল সিং মুণ্ডা ষ্টেডিয়ামত চলি থকা ছাত্ৰ-ছাত্ৰীসকলৰ এই প্ৰতিবাদে আজি ১৬ সংখ্যক দিনত ভৰি দিছেহি। প্ৰতিবাদকাৰীসকলৰ মূল দাবী হৈছে যোৱা ২ জুলাইত ঝাৰখণ্ড লোকসেৱা আয়োগে (JPSC) অনুষ্ঠিত কৰা ১৪ সংখ্যক অসামৰিক সেৱা প্ৰাৰম্ভিক পৰীক্ষা বাতিল কৰা। ইয়াৰ লগতে পৰীক্ষাত হোৱা ব্যাপক খেলিমেলিৰ এক নিৰপেক্ষ তদন্তৰো তেওঁলোকে দাবী জনাইছে, যিটো চিবিআইৰ (CBI) দ্বাৰা বা এগৰাকী অৱসৰপ্ৰাপ্ত ন্যায়াধীশৰ নেতৃত্বত গঠিত পেনেলৰ দ্বাৰা কৰিবলৈ চৰকাৰক দাবী জনোৱা হৈছে।
কংগ্ৰেছৰ ৰাষ্ট্ৰীয় সভাপতি মল্লিকাৰ্জুন খৰ্গেয়ে ছাত্ৰ-ছাত্ৰীসকলৰ এই প্ৰতিবাদলৈ পূৰ্ণ সমৰ্থন আগবঢ়াইছে। তেওঁ কয় যে ছাত্ৰ-ছাত্ৰীয়ে য’তেই সমস্যা উত্থাপন নকৰক কিয়, তেওঁ আৰু বিৰোধী দলৰ দলপতি ৰাহুল গান্ধী তালৈ যাব। খৰ্গেয়ে কয় যে ছাত্ৰ-ছাত্ৰীসকল তেওঁলোকৰ বাবে সমান আৰু গুৰুত্বপূৰ্ণ, সেয়েহে ছাত্ৰ-ছাত্ৰীৰ স্বাৰ্থ সদায় সৰ্বোচ্চ। ৰাহুল গান্ধীয়েও কেন্দ্ৰ বা ৰাজ্য চৰকাৰসমূহক ছাত্ৰ-ছাত্ৰীৰ কথা শুনি শিক্ষা ব্যৱস্থাৰ পৰিৱৰ্তন কৰিবলৈ আহ্বান জনাইছে।
আনহাতে, বিজেপিৰ জ্যেষ্ঠ নেতা তথা কেন্দ্ৰীয় মন্ত্ৰী সঞ্জয় শেঠে কয় যে ৰাহুল গান্ধীয়ে এই বিষয়টোক লৈ কেৱল ৰাজনৈতিক মুনাফা আদায়ৰ চেষ্টা কৰিছে। ইয়াৰ পৰিৱৰ্তে তেওঁ ঝাৰখণ্ডৰ কংগ্ৰেছ মিত্ৰজোঁটৰ চৰকাৰখনক শীঘ্ৰে ব্যৱস্থা ল’বলৈ নিৰ্দেশ দিয়া উচিত। ছাত্ৰ-ছাত্ৰীসকলৰ দাবী ন্যায্য বুলি উল্লেখ কৰি তেওঁ ছোৰেণ চৰকাৰক অসংবেদনশীল বুলি সমালোচনা কৰে। শেঠে লগতে কয় যে ঝাৰখণ্ড চৰকাৰে চাকৰি কেলেংকাৰীক আশ্ৰয় দিছে আৰু প্ৰতিবাদকাৰী ছাত্ৰ-ছাত্ৰীসকলে চিবিআই বা ইডিৰ তদন্তৰ বাহিৰে আন একো মানি নলয়। গতিকে কংগ্ৰেছে ঝাৰখণ্ড চৰকাৰৰ পৰা সমৰ্থন প্ৰত্যাহাৰ কৰা উচিত।
ইফালে, ঝাৰখণ্ড চৰকাৰে এতিয়ালৈকে ৰাঁচীত বিভিন্ন প্ৰতিবাদী গোটৰ সৈতে পাঁচ লানি আলোচনা অনুষ্ঠিত কৰিছে যদিও কোনো সমাধান সূত্ৰ নোলোৱাত অচলাৱস্থা অব্যাহত আছে। দাবী পূৰণ নোহোৱা পৰ্যন্ত প্ৰতিবাদ চলাই যোৱাৰ হুংকাৰ দিছে ছাত্ৰ-ছাত্ৰীসকলে। যোৱা শুকুৰবাৰে চৰকাৰী প্ৰতিনিধিয়ে ঝাৰখণ্ড লোকতান্ত্ৰিক ক্ৰান্তিকাৰী মৰ্চাৰ নেতা দেৱেন্দ্ৰ নাথ মাহতোৰ নেতৃত্বৰ এটা দলৰ সৈতে প্ৰথমখন বৈঠকত মিলিত হৈছিল। যোৱা এসপ্তাহ ধৰি আমৰণ অনশনত বহা মাহতোৱে কয় যে সকলো সংগঠনৰ দাবী একেই আৰু চৰকাৰে সেয়া মানি ল’ব লাগে। ইয়াৰ লগতে চৰকাৰী পেনেলে তিনিটা কংগ্ৰেছ সমৰ্থিত ছাত্ৰ সংগঠন আৰু ‘জেপিএছচি-জেএছএছচি এচপিৰেণ্ট ন্যায় মঞ্চ’ৰ প্ৰতিনিধি দলৰ সৈতেও পৃথকে পৃথকে বৈঠকত মিলিত হৈছিল।
