পেট্ৰ’ল-ডিজেলৰ লগতে অত্যাৱশ্যকীয় সামগ্ৰীৰ অভাৱনীয় মূল্যবৃদ্ধিৰ বিৰুদ্ধে আজি কামৰূপ মহানগৰ জিলা ছাত্ৰ সন্থাই এক প্ৰতিবাদী কাৰ্যসূচী গ্ৰহণ কৰে। গুৱাহাটীৰ চহিদ ন্যাসৰ সন্মুখত একত্ৰিত হৈ প্ৰতিবাদকাৰীসকলে কেন্দ্ৰীয় চৰকাৰৰ পেট্ৰ’লিয়াম মন্ত্ৰী ধৰ্মেন্দ্ৰ প্ৰধানৰ পুত্তলিকা দাহেৰে মূল্যবৃদ্ধিৰ বিৰুদ্ধে তীব্ৰ প্ৰতিবাদ সাব্যস্ত কৰে।
কামৰূপ মহানগৰ জিলা ছাত্ৰ সন্থাৰ সভাপতি ৰজমিল আলিয়ে কয়, ”পেট্ৰ’ল-ডিজেল আৰু ৰন্ধন গেছৰ মূল্যবৃদ্ধিয়ে সাধাৰণ ৰাইজক কোঙা কৰি পেলাইছে। তৎসত্বেও বিজেপি নেতৃত্বাধীন কেন্দ্ৰ আৰু ৰাজ্য চৰকাৰ নিমাত। মূল্যবৃদ্ধি নিয়ন্ত্ৰণত সম্পূৰ্ণৰূপে ব্যৰ্থ হৈছে অসম চৰকাৰ।”
তেওঁ লগতে ইন্ধনৰ মূল্যবৃদ্ধি ৰোধ কৰিব নোৱাৰিলে আন আন অত্যাৱশ্যকীয় সামগ্ৰীৰ মূল্যবৃদ্ধি হৈয়ে থাকিব বুলি তাপৰ্যমূলক মন্তব্য কৰে।
ইয়াৰ উপৰি ৰাজ্য চৰকাৰক কৰ হ্ৰাস কৰি হলেও অত্যাৱশ্যকীয় সামগ্ৰীৰ দাম হ্ৰাস কৰাৰ দাবী উত্থাপন কৰে প্ৰতিবাদকাৰীসকলে।
ইপিনে ৰাজ্য চৰকাৰৰ নিষেধাজ্ঞাৰ পাছতো আজি বি বৰুৱা কলেজ, দিচপুৰ মহাবিদ্যালয় আদিকে ধৰি কেইবাখনো শিক্ষানুষ্ঠানৰ ছাত্ৰ-ছাত্ৰীয়ে আজিৰ এই প্ৰতিবাদী কাৰ্যসূচীত অংশ লোৱা দেখা যায়।
ৰাজ্য চৰকাৰৰ এই নিষেধাজ্ঞা সন্দৰ্ভত কামৰূপ মহানগৰ জিলা ছাত্ৰ সন্থাৰ সাধাৰণ সম্পাদক দিব্যজ্যোতি মেধিয়ে কয়, “গণতান্ত্ৰিক দেশ এখনত চৰকাৰে কাৰো কন্ঠ ৰোধ কৰিব নোৱাৰে। মূল্যবৃদ্ধিৰ ফলত ছাত্ৰ-ছাত্ৰীও সমস্যাত ভূগিব লগিয়া হৈছে। গতিকে তেওঁলোক প্ৰতিবাদৰ বাবে ওলাই আহিবলৈ বাধ্য হৈছে।”
তেওঁ লগতে এচাম মধ্যভোগীয়ে ইন্ধনৰ মূল্যবৃদ্ধিৰ সুযোগ লৈ অত্যাৱশ্যকীয় সামগ্ৰীৰ দাম বৃদ্ধিৰ চেষ্টা চলাই থকা বুলিও অভিযোগ কৰে।
