৪২ সংখ্যক ছাব-জুনিয়ৰ নেচনেল একুৱাটিক চেম্পিয়নশ্বিপত অসমলৈ গৌৰৱ কঢ়িয়াই আনিছে কস্তুৰী গগৈয়ে। প্ৰতিযোগিতাখনত আজি ৫০ মিটাৰ ব্ৰেষ্টষ্ট্ৰোক ইভেণ্টত সোণৰ পদক জয় কৰি কস্তুৰীয়ে ৰাজ্যখনৰ হৈ তৃতীয়টো স্বৰ্ণ পদক অৰ্জন কৰে।
৬ আগষ্টৰ পৰা ৰাজস্থানৰ জয়পুৰস্থিত ছাৱাই মান সিং ষ্টেডিয়াম ছুইমিং পুলত অনুষ্ঠিত হৈ থকা প্ৰতিযোগিতাখনত কস্তুৰীয়ে ৫০ মিটাৰ ব্ৰেষ্টষ্ট্ৰোকত ৩৫.৫৭ ছেকেণ্ড সময় লৈ শীৰ্ষস্থান দখল কৰে। ইয়াৰ পূৰ্বেও তেওঁ প্ৰতিযোগিতাখনত দুটাকৈ সোণৰ পদক জয় কৰি অসমক সফলতা আনি দিছিল।
৯ আগষ্টত সামৰণি পৰা এই ৰাষ্ট্ৰীয় পৰ্যায়ৰ প্ৰতিযোগিতাখনত কস্তুৰীৰ ধাৰাবাহিক সফলতাই অসমৰ সাঁতোৰ জগতত নতুন আশাৰ সঞ্চাৰ কৰিছে।
অসম সাঁতোৰ সন্থাৰ সাধাৰণ সম্পাদক ভাস্কৰ ৰঞ্জন দাসে কস্তুৰীৰ এই সাফল্যত সন্তুষ্টি প্ৰকাশ কৰাৰ লগতে ৰাজ্যখনৰ বাবে তৃতীয়টো স্বৰ্ণ পদক জয় কৰাৰ বাবে তেওঁক অভিনন্দন জ্ঞাপন কৰে।
উল্লেখ্য যে কস্তুৰী গগৈয়ে বৰ্তমান গুৱাহাটীৰ সৰুসজাই ছুইমিং পুলত অভিজ্ঞ প্ৰশিক্ষক বাবুল গুৰুংৰ অধীনত উন্নত প্ৰশিক্ষণ গ্ৰহণ কৰি আছে।
