বুধবাৰে কেৰলা উচ্চ ন্যায়ালয়ে এটা মেনেজমেন্ট কোম্পানীৰ প্রৱঞ্চনা গোচৰত অভিযুক্ত চানী লিওনসহ অন্য দুগৰাকী ব্যক্তিক সাময়িক সকাহ প্ৰদান কৰিছে।
বলিউদৰ অভিনেত্ৰী চানী লিওনসহ অন্য দুয়োগৰাকী ব্যক্তিক গ্ৰেপ্তাৰত বাধা আৰোপ কৰিছে কেৰলাৰ উচ্চ ন্যায়ালয়ে। ন্যায়াধীশ অশোক মেননে চানী লিওনৰ অন্তৱৰ্তীকালীন জামিনৰ শুনানি গ্ৰহণ কৰি আজি এই নিৰ্দেশ প্ৰদান কৰিছে।
উল্লেখ্য যে মেনেজমেন্ট কোম্পানীটোৱে অভিযোগ কৰি আহিছিল যে যোৱা ২০১৯ চনৰ এটা কাৰ্যসূচীত অংশগ্ৰহণৰ বাবে চানী লিওনয়ে ২৯ লাখ টকা অগ্ৰীম ধন লোৱাৰ পিছতো উক্ত কাৰ্যসূচীত উপস্থিত হোৱা নাছিল।
ইয়াৰ পিছতে প্ৰতিষ্ঠানটোৱে দাখিল কৰা এজাহাৰ ভিত্তিত ভাৰতীয় দণ্ডবিধি আইনৰ ধাৰা ৪২০ৰ অধীনত আৰক্ষীয়ে চানী লিওনসহ তেওঁৰ সহযোগীৰ বিৰুদ্ধে প্ৰৱঞ্চনাৰ এক গোচৰ পঞ্জীয়ন কৰিছিল।
কিন্তু ন্যায়ালয়ে অপৰাধ শাখাক চিআৰপিচি ৪১(এ)(আৰক্ষীৰ সন্মুখত উপস্থিত হোৱাৰ জাননী)ৰ অনুসৰি জাননী লাভ নকৰা পৰ্যন্ত অভিযুক্তক গ্ৰেপ্তাৰ কৰিব নোৱাৰিব বুলি নিৰ্দেশ প্ৰদান কৰিছে।
ইয়াৰ ফলত প্ৰৱঞ্চনা গোচৰত অভিযুক্ত অভিনেত্ৰীগৰাকীয়ে সাময়িক সকাহ লাভ কৰিছে।