অসম চৰকাৰে লকডাউনৰ বাবে দেশৰ বিভিন্ন ঠাইত আবদ্ধ ৰাজ্যৰ লোকসকলক ঘূৰাই অনাৰ বাবে সাতখন ৰেলৰ প্ৰস্তাৱ কৰিছে।
অসমৰ পৰিবহণ মন্ত্ৰী চন্দ্ৰ মোহন পাটোৱাৰীয়ে বুধবাৰে এই কথা সদৰী কৰিছে।
৭ মে’ৰ পৰা এই ৰেলসমূহৰ যাত্ৰা আৰম্ভ হ’ব বুলি আশা কৰা হৈছে।
ৰেলসমূহে ৰাজ্যৰ বাহিৰত বিভিন্ন ঠাইত আবদ্ধ শ্ৰমিক, শিক্ষাৰ্থী, তীৰ্থযাত্ৰী, পৰ্য্যটককে ধৰি সকলো লোককে ৰাজ্যলৈ ঘূৰাই আনিব।
ৰাজ্য চৰকাৰে ইতিমধ্যে এই সম্বন্ধীয় নিয়মাৱলী যুগুত কৰিছে।
ৰাজ্যৰ অতিৰিক্ত আৰক্ষী সঞ্চালকপ্ৰধান (আইন-শৃংখলা) জি পি সিঙৰ অধ্যক্ষতাত এখন সমিতিয়ে এই নিয়মাৱলী প্ৰস্তুত কৰি চৰকাৰক দাখিল কৰিছে।
এই সন্দৰ্ভত কেন্দ্ৰীয় গৃহ মন্ত্ৰ্যালয়ৰ নিৰ্দেশনাৰ পিছতে অসমৰ ক’ভিড-১৯ বিষয়ক ৰাজ্যিক পৰ্য্যায়ৰ ক্ষমতাসম্পন্ন সমিতিয়ে এই ছজনীয়া সমিতি এই সিদ্ধান্ত গ্ৰহণ কৰিছে।
সমিতিখনৰ ন’ডাল অফিচাৰ হিচাপে এডিজিপি জি পি সিং আৰু বিকল্প ন’ডাল অফিচাৰৰূপে এডিজিপি (ছিকিয়ৰিটি) হৰমীত সিঙক দায়িত্ব দিয়া হৈছে।
সমিতিখনৰ বাকী সদস্যসকল হৈছে—অসম ৰাজ্যিক দুৰ্য্যোগ ব্যৱস্থাপনা কৰ্তৃপক্ষৰ চি ই অ’ এম এছ মনিভান্নান, এ এছ টি চিৰ পৰিচালন সঞ্চালক এ পি তিৱাৰী, এন এইচ এমৰ পৰিচালন সঞ্চালক ডঃ লক্ষ্মণন এছ আৰু পৰিবহণ আয়ুক্ত আদিল খান।
অসমৰ ভিতৰত এই লোকসকলৰ যাতায়াতৰ বাবে পৰিবহণ বিভাগে এ এছ টি চিৰ সহযোগত বাছৰ যোগাৰ কৰিব আৰু এন এইচ এমে ইয়াৰ ব্যয় বহন কৰিব।
