ভাৰতী এয়াৰটেলে ইয়াৰ ৮ কোটিতকৈ অধিক গ্ৰাহকৰ প্ৰীপেইড পেকৰ ভেলিডিটি অহা ১৭ এপ্ৰিললৈকে বৃদ্ধি কৰিছে।
কোম্পানিটোৱে এই সময়চোৱাত গ্ৰাহকসকললৈ ১০ টকাৰ টকটাইমো আগবঢ়াব।
কৰ’নাভাইৰাছৰ বিৰুদ্ধে দেশজোৰা লকডাউনৰ পৰিপ্ৰেক্ষিতত গ্ৰাহকৰ সুবিধাৰ প্ৰতি লক্ষ্য ৰাখি কোম্পানিটোৱে এই সিদ্ধান্ত গ্ৰহণ কৰিছে।
কোম্পানিটোৱে সদৰী কৰা মতে পৰৱৰ্তী ৪৮ ঘণ্টাৰ ভিতৰত এই সিদ্ধান্ত কাৰ্য্যকৰী হ’ব।
তাৰোপৰি কোম্পানিটোৱে এই সময়চোৱাত গ্ৰাহকসকলৰ ইনকামিং সেৱাও অবিচ্ছিন্ন ৰাখিব।
উল্লেখযোগ্য যে ট্ৰায়ে লকডাউনত প্ৰীপেইড গ্ৰাহকসকল অসুবিধাত নপৰিবলৈ ভেলিডিটি পিৰিয়ড বঢ়াই দিয়াৰ বাবে টেলিকম কোম্পানিসমূহক নিৰ্দেশ দিছিল।
লকডাউনৰ সময়ত সকলো প্ৰিপেইড চাবস্ক্ৰাইবাৰে অবিচ্ছিন্ন সেৱা উপভোগ কৰিব পৰাতো নিশ্চিত কৰাৰ বাবে ভেলিডিটি পিৰিয়ড বৃদ্ধিকে ধৰি উপযুক্ত প্ৰয়োজনীয় পদক্ষেপ ল’বলৈ ট্ৰায়ে কোম্পানিসমূহক নিৰ্দেশ দিছিল।
কৰ’নাভাইৰাছক প্ৰতিহত কৰাৰ বাবে প্ৰধান মন্ত্ৰী নৰেন্দ্ৰ মোদীয়ে ২১ দিনীয়া লকডাউন ঘোষণা কৰিছে।
ভাৰতত কৰ’নাভাইৰাছত আক্ৰান্তৰ সংখ্যাই ১২০০ৰ সীমা অতিক্ৰম কৰিছে।
১১৮ গৰাকী লোক এই ৰোগৰ পৰা সুস্থ হোৱাৰ বিপৰীতে এতিয়ালৈকে দেশত ৪০ গৰাকী লোক মৃত্যুমুখত পৰিছে।
