কটন বিশ্ববিদ্যালয়ৰ উন্নত ভাৰত অভিযান (ইউ বি এ) গোটে উন্নয়নৰ বাবে পৰিগ্ৰহণ কৰা কামৰূপ জিলাৰ চন্দ্ৰপুৰৰ নিজ পাণবাৰী অঞ্চলৰ কিছু পৰিয়ালৰ মাজত অত্যাৱশ্যকীয় সামগ্ৰী বিতৰণ কৰে৷
কামৰূপ মহানগৰ জিলা প্ৰশাসনৰ সহযোগত ইউ বি এৰ যুটীয়া সমন্বয়ক ড° নাৰায়ণ শৰ্মাৰ উপস্থিতিত ২৩ এপ্ৰিল তাৰিখে উক্ত অঞ্চলৰ লগতে গোটে পৰিগ্ৰহণ কৰা চক্ৰদেউ কলিতাপাৰা অঞ্চলতো সাহায্য বিতৰণ কৰে৷
এই কাৰ্য্যসূচীত নিজ পাণবাৰী গাঁৱৰ গাওঁবুঢ়া প্ৰশান্ত ৰংহাঙৰ তত্ত্বাৱধানত গাওঁবাসীয়ে সামাজিক দূৰত্ব বৰ্তাই ৰাখাৰ লগতে আশা কৰ্মীসকলে চেনিটাইজাৰে হাত ধোৱাৰ ব্যৱস্থা গ্ৰহণ কৰে৷
পৰিয়ালসমূহৰ মাজত চাউল, দালি, আলু, পিয়াঁজ, তেল, নিমখ, চেনী, চাহ, চাবোন ইত্যাদি বিতৰণ কৰা হয়৷
কটন বিশ্ববিদ্যালয়ৰ শিক্ষকসকলৰ আৰ্থিক সাহায্যৰ লগতে বিশ্ববিদ্যালয়ৰ ইউ বি এৰ সমন্বয়ক ড° সংগীতা বৰঠাকুৰৰ প্ৰচেষ্টাত এই সমগ্ৰ কাৰ্যসূচী ৰূপায়ণ কৰা হয়৷
বিশ্ববিদ্যালয়ৰ ইউ বি এ গোটে উন্নয়নৰ বাবে পৰিগ্ৰহণ কৰা পাঁচখন গাঁৱৰ ভিতৰত বাকী থকা তিনিখন গাঁৱতো সাহায্য বিতৰণৰ কাৰ্যসূচী হাতত লৈছে৷
