পৰিৱেশ সংবেদনশীল অঞ্চলত ঘাইপথ আৰু মথাউৰিৰ ‘অবিবেচক’ নিৰ্মাণকাৰ্যৰ বিৰোধিতা কৰি তথা বৈজ্ঞানিক পৰামৰ্শ আওকাণ কৰাৰ অভিযোগ তুলি লক্ষ্ণৌৰ জিলা গংগা সমিতিৰ পৰা পদত্যাগ কৰিছে জ্যেষ্ঠ পৰিৱেশ বিজ্ঞানী অধ্যাপক ভেংকটেশ দত্তই। বাবাচাহেব ভীমৰাও আম্বেদকাৰ বিশ্ববিদ্যালয়ৰ পৰিৱেশ বিজ্ঞানৰ অধ্যাপকগৰাকীয়ে নদীৰ পাৰিপাৰ্শ্বিকতা ৰক্ষাৰ ক্ষেত্ৰত সমিতিখনে গুৰুত্বপূৰ্ণ সিদ্ধান্তবোৰত আওকাণ কৰা বুলি অভিযোগ উত্থাপন কৰিছে।
জিলা দণ্ডাধীশ তথা সমিতিৰ অধ্যক্ষ বিশাখ জি আৰু সদস্য সচিব সিতাংশু পাণ্ডেলৈ প্ৰেৰণ কৰা পদত্যাগ পত্ৰত অধ্যাপক দত্তই স্পষ্ট কৰি দিয়ে যে তেওঁ গোমতী নদীৰ প্লাৱনভূমিত প্ৰস্তাৱিত ‘গ্ৰীণ কৰিড’ৰ প্ৰকল্প’ৰ সম্প্ৰসাৰণৰ তীব্ৰ বিৰোধিতা কৰিছিল। কিন্তু তেওঁৰ অজ্ঞাতে সমিতিখনে এই প্ৰস্তাৱত অনুমোদন জনায়। তদুপৰি, প্ৰকল্পৰ সবিশেষ প্ৰতিবেদন আৰু পৰিৱেশ প্ৰভাৱ নিৰূপণ দস্তাবেজসমূহো সমিতিৰ সদস্যসকলক পৰ্যবেক্ষণৰ বাবে প্ৰদান নকৰাটো অত্যন্ত দুৰ্ভাগ্যজনক বুলি তেওঁ উল্লেখ কৰে।
উল্লেখযোগ্য যে গোমতী হৈছে গংগা নদীৰ এখন উপনৈ। মোদী চৰকাৰে আৰম্ভ কৰা ‘নমামী গংগে’ প্ৰকল্পৰ অধীনত এই নদীসমূহৰ পৰিষ্কাৰ আৰু পুনৰুজ্জীৱিতকৰণৰ কাম চলি আছে। কিন্তু লক্ষ্ণৌ উন্নয়ন কৰ্তৃপক্ষই চহৰখনৰ পূবৰ পৰা পশ্চিমলৈ যান-জঁটমুক্ত যাতায়াতৰ বাবে গোমতীৰ পাৰত ২৮ কিলোমিটাৰ দৈৰ্ঘ্যৰ এক চাৰিলেনযুক্ত ‘গ্ৰীণ কৰিড’ৰ’ নিৰ্মাণৰ প্ৰস্তুতি চলাইছে। পূৰ্বৰ সমাজবাদী পাৰ্টীৰ চৰকাৰৰ দিনতেই আৰম্ভ হোৱা এই বিতৰ্কিত প্ৰকল্পটোক লৈ চিবিআই তদন্তও চলি আছে। শেহতীয়াকৈ যোৱা জুলাই মাহত ৰাষ্ট্ৰীয় সেউজ ন্যায়াধিকৰণেও পৰিৱেশৰ নীতি উলংঘা কৰাৰ বাবে এই প্ৰকল্পৰ কাম বন্ধ কৰি দিছিল।
অধ্যাপক দত্তই সকীয়াই দিয়ে যে ২০১৫ চনৰ ৰিভাৰফ্ৰণ্ট প্ৰকল্পৰ বাবে গোমতী নদীয়ে ইতিমধ্যেই যথেষ্ট পাৰিপাৰ্শ্বিক ক্ষতিৰ সন্মুখীন হৈছে। এতিয়া প্লাৱনভূমিত নতুনকৈ ঘাইপথ আৰু মথাউৰি নিৰ্মাণ কৰিলে নদীখনৰ জলবিজ্ঞান সলনি হোৱাৰ লগতে বানপানী নিয়ন্ত্ৰণৰ ক্ষমতাও হ্ৰাস পাব। ইয়াৰ উপৰিও গোমতী নদীত পেলনীয়া পানী বা নলাৰ পানী পেলোৱা কাৰ্য আৰু প্ৰকল্প আৰম্ভ হোৱাৰ পাছতহে পৰিৱেশ সংক্ৰান্তীয় অনুমতি পত্ৰ বিচৰা প্ৰৱণতাক লৈও তেওঁ গভীৰ উদ্বেগ প্ৰকাশ কৰে।
