দক্ষিণ ভাৰতীয় ৰাজ্য তেলেংগানাত আজি এক অপ্ৰত্যাশিত পৰিস্থিতিৰ সন্মুখীন হয় অসমৰ মুখ্যমন্ত্ৰী হিমন্ত বিশ্ব শৰ্মা। হায়দৰাবাদত অনুষ্ঠিত হোৱা বিজেপিৰ এক দলীয় ৰেলীত অংশগ্ৰহণ কৰা হিমন্ত বিশ্ব শৰ্মাই ৰাজ্যখনৰ দলীয় নেতা-কৰ্মীৰ সৈতে মঞ্চত থাকোঁতেই এগৰাকী ব্যক্তিয়ে কাঢ়ি নিয়াৰ চেষ্টা চলায় সমুখৰ মাইক।
ব্যক্তিগৰাকীক পিছত ৰাজ্যখনৰ শাসকীয় দল তেলেংগানা ৰাষ্ট্ৰ সমিতি (টিআৰএছ) দলৰ কৰ্মী বুলি চিনাক্ত কৰা হয়।
অৱশ্যে হঠাতে সংঘটিত হোৱা এই ঘটনাৰ পিছতে লগে লগে উপস্থিত বিজেপি নেতা আৰু কৰ্মীসকলে ব্যক্তিগৰাকীক মঞ্চৰ পৰা আঁতৰাই নিয়ে।
অসমৰ মুখ্যমন্ত্ৰীগৰাকীয়ে আজি দিনৰ ভাগত পৰিয়ালকেন্দ্ৰিক ৰাজনীতিৰ বিষয় উত্থাপন কৰি তেলেংগানাৰ মুখ্যমন্ত্ৰী কে চন্দ্ৰশেখৰ ৰাওক তীব্ৰ সমালোচনা কৰিছিল।
“মুখ্যমন্ত্ৰী চন্দ্ৰশেখৰ ৰাৱে বিজেপি-মুক্ত ৰাজনীতিৰ বিষয়ে কয়। কিন্তু আমি পৰিয়ালতন্ত্ৰ-মুক্ত ৰাজনীতিৰ বিষয়ে কওঁ। আমি এতিয়াও হায়দৰাবাদত তেওঁৰ পুত্ৰ আৰু জীৰ ফটো দেখিছো। দেশৰ ৰাজনীতি পৰিয়ানতান্ত্ৰিক ৰাজনীতিৰ পৰা মুক্ত হ’ব লাগে।”- শৰ্মাই কয়।
মুখ্যমন্ত্ৰী হিমন্ত বিশ্ব শৰ্মা গণেশ উৎসৱ আৰু অন্যান্য অনুষ্ঠানত অংশগ্ৰহণৰ বাবে ভাগ্যনগৰ গণেশ উৎসৱ সমিতিৰ অতিথি হিচাপে হায়দৰাবাদত উপস্থিত আছে।
