বঙাইগাঁও জিলাত দ্বিতীয় পৰ্য়ায়ত অসম মাইক্ৰ’ফাইনেন্স উদগনি আৰু সকাহ আঁচনি- ২০২১ ৰ শুভাৰম্ভ কৰা হয় ৷
এই উপলক্ষে অসম চৰকাৰৰ বিত্ত বিভাগৰ উদ্যোগত আৰু বঙাইগাঁও জিলা প্ৰশাসনৰ সহযোগত স্থানীয় বঙাইগাঁও গান্ধী ময়দানত অনুষ্ঠিত অনুষ্ঠানত ৰাজ্যখনৰ বিত্ত আৰু সমাজ কল্যাণ বিভাগৰ মন্ত্ৰী অজন্তা নেওগ আৰু খাদ্য , অসামৰিক যোগান আৰু পঞ্চায়ত আৰু গ্ৰামোন্নয়ন তথা বঙাইগাঁও জিলাৰ অবিভাৱক মন্ত্ৰী ৰঞ্জিত দাসে বিধায়ক ফণীভূষণ চৌধুৰীৰ উপস্থিতিত আঁচনিখনৰ আনুষ্ঠানিকভাৱে শুভাৰম্ভ কৰে ৷
উল্লেখ্য যে বিগত বিধানসভা নিৰ্বাচনত দিয়া প্ৰতিশ্ৰুতি অনুসৰি অসমৰ তেতিয়াৰ বিত্ত মন্ত্ৰী আৰু বৰ্তমানৰ অসমৰ মুখ্যমন্ত্ৰী ডঃ হিমন্ত বিশ্ব শৰ্মাই ৰাজ্যখনৰ ক্ষুদ্ৰ ঋণ গ্ৰহণকাৰী দুখীয়া মহিলাসকলক সকাহ দিয়াৰ বাবে এই অসম মাইক্ৰ’ফাইনেন্স উদগনি আৰু সকাহ আঁচনি-২০২১ আঁচনিখনৰ ব্যৱস্থা কৰিছে।
ক্ষুদ্ৰ ঋণ লোৱা মহিলাসকলৰ ভিতৰত যিসকল মহিলাই সময়মতে তেওঁলোকৰ ঋণসমূহ ঘুৰাই দিছিল তেওঁলোকক উদগনি আৰু সকাহ দিয়াৰ বাবে অনুষ্ঠানত এককালীন ধনৰ চেক প্ৰদান কৰা হয় ৷
অনুষ্ঠানত খাদ্য,অসামৰিক যোগান তথা জিলাখনৰ অভিভাৱক মন্ত্ৰী ৰঞ্জিত দাসে কয় যে মহিলাসকলক দিয়া প্ৰতিশ্ৰুতি পূৰণ কৰি মহিলা সবলীকৰণত গুৰুত্ব দিছে মুখ্যমন্ত্ৰী ডঃ হিমন্ত বিশ্ব শৰ্মাই।
তদুপৰি অৰুণোদই আঁচনিখনো মহিলা সবলীকৰণৰ পদক্ষেপ মুখ্যমন্ত্ৰীগৰাকীৰ। মহিলাসকলে চৰকাৰৰ তৰফৰ পৰা পোৱা এই উদগনিমূলক ধনখিনি যাতে অবাবদ নষ্ট নকৰি উৎপাদনমূলক কামত ব্যৱহাৰ কৰে তাৰ বাবে আহ্বান জনায় মন্ত্ৰী ৰঞ্জিত দাসে।
ইপিনে সভাত উপস্থিত থাকি বিত্ত আৰু সমাজ কল্যাণ বিভাগৰ মন্ত্ৰী অজন্তা নেওগে কয় যে অসমৰ ৩ (তিনি) কোটি ৩০ (ত্ৰিশ) লাখ লোকৰ ভিতৰত ৪৯ শতাংশ মহিলা। গতিকে মহিলাসকল কিমান এটা ডাঙৰ শক্তি ৷
এখন ৰাজ্যত যেতিয়া মহিলাসকল ৰাজনৈতিক, অৰ্থনৈতিক, সামাজিকভাৱে সবল হ’ব তেতিয়াহে ৰাজ্যখন আগুৱাই যাব ৷ সেয়ে মহিলাসকল আৰ্থিকভাৱে সবল হ’ব লাগিব ৷
অৰুণোদই আঁচনিৰ জৰিয়তে দুখীয়া মহিলাসকলক পূৰ্বৰ ৮৩০ টকাৰ ঠাইত বৰ্তমানে ১০০০ (এহেজাৰ) টকা দিয়াৰ ব্যৱস্থা কৰা হৈছে। এয়া কৰা হৈছে মহিলা সবলীকৰণৰ বাবে।
বৰ্তমানলৈকে ৰাজ্যখনৰ ২০ লাখ মহিলাই বেংকৰ জৰিয়তে পোনপতিয়াকৈ এই ধন লাভ কৰিবলৈ সক্ষম হৈছে ৷
এই আঁচনিখনৰ বাবে চৰকাৰক বছৰেকত প্ৰায় ১৭ শ কোটি টকাৰ প্ৰয়োজন হ’ব ৷
বন্ধন বেংক,আই ডি বি আই বেংক, ই এচ এ এফ স্মল ফাইনেন্স বেংক, নাইটিংগেল বেংক আদি কৰি ১৬টা বেংক প্ৰতিষ্ঠানৰ ১৬ গৰাকী হিতাধিকাৰীক মন্ত্ৰীদ্বয়ে আনুষ্ঠানিকভাৱে চেক বিতৰণ কৰি আঁচনিখনৰ শুভাৰম্ভ কৰে ৷ অনুষ্ঠানত মুঠ ৫২৫১ গৰাকী হিতাধিকাৰীক এই চেক প্ৰদান কৰা হ’ব। বাকীখিনি হিতাধিকাৰীক উন্নয়ন খণ্ড কাৰ্যালয়ত পিছত চেকসমূহ প্ৰদান কৰা হ’ব