মীৰাবাঈ চানু! কোটি কোটি ভাৰতীয়ৰ এক আশাৰ প্ৰদীপ মীৰাবাঈ। আন্ত:ৰাষ্ট্ৰীয় পৰ্যায়ত নিজৰ চমকপ্ৰদ ধাৰাবাহিকতা অক্ষুণ্ণ ৰাখি দেশবাসীক পুনৰ এবাৰ গৌৰৱান্বিত কৰি তুলিলে এইগৰাকী খেলুৱৈয়ে। বাৰ্মিংহাম কমনৱেলথ গেমছত ভাৰতৰ স্বৰ্ণ জয়ৰ অন্যতম আশা মীৰাবাঈ চানুৱে দেশবাসীৰ আশা-আকাংক্ষাক বাস্তৱায়িত কৰি ইতিহাস ৰচনাৰে জিনিলে স্বৰ্ণ পদক।
বাৰ্মিংহামত আজি মহিলাৰ ৪৯ কিলোগ্ৰাম শাখাৰ ভাৰোত্তোলনত প্ৰথম স্থান লাভেৰে কমনৱেলথ গেমছ ২০২২ ত দেশক প্ৰথমটো স্বৰ্ণ জয়ৰ সোৱাল দিলে মীৰাবাঈ চানুৱে।
অভিলেখ ২০১ কিলোগ্ৰাম উত্তোলন কৰি নতুন কমনৱেলথ ৰেকৰ্ড প্ৰতিষ্ঠা কৰা চানুৱে কমনৱেলথ গেমছত নিজৰ স্বৰ্ণ জয়ৰ ধাৰাবাহিকতা অক্ষুণ্ণ ৰাখে।
প্ৰথম প্ৰচেষ্টাত স্নেচত ৮৪ কিলোগ্ৰাম উত্তোলন কৰাৰ পিছত দ্বিতীয় প্ৰচেষ্টাত ৮৮ কিলোগ্ৰাম উত্তোলন কৰি এক নতুন কমনৱেলথ গেমছ ৰেকৰ্ড গঢ়ি তোলে চানুৱে।
ইয়াৰ পিছতে ক্লিন এণ্ড জাৰ্কত প্ৰথম প্ৰচেষ্টাত ১০৯ কিলোগ্ৰাম উত্তোলন কৰি দ্বিতীয় প্ৰচেষ্টাত ১১৩ কিলোগ্ৰাম উত্তোলনেৰে তাৰকা গৰাকীয়ে কমনৱেলথ স্বৰ্ণ নিশ্চিত কৰে।
উল্লেখ্য যে চলিত কমনৱেলথ গেমছত ভাৰতৰ এইয়া তৃতীয়টো পদক। ইতিপূৰ্বে ভাৰোত্তোলনতে সংকেত চাৰ্গাৰে পুৰুষৰ ৫৫ কিলোগ্ৰাম শাখাত ৰূপৰ পদক অৰ্জন কৰি ভাৰতৰ পদক তালিকা মুকলি কৰাৰ পিছত গুৰুৰাজা পূজাৰীয়ে পুৰুষৰ ৬১ কিলোগ্ৰাম শাখাত ব্ৰঞ্জৰ পদক অৰ্জন কৰিছিল।