কেন্দ্ৰীয় চৰকাৰে পেট্ৰল আৰু ডিজেল ক্ৰয়ৰ ক্ষেত্ৰত এক গুৰুত্বপূৰ্ণ নিৰ্দেশনা জাৰি কৰিছে। বৰ্তমানৰ পৰা উদ্যোগিক, ব্যৱসায়িক আৰু বিভিন্ন প্ৰতিষ্ঠানৰ বাবে পেট্ৰল পাম্পৰ পৰা ইন্ধন ক্ৰয় কৰাৰ ওপৰত সাময়িকভাৱে নিষেধাজ্ঞা আৰোপ কৰা হৈছে। এই নিৰ্দেশ অনুসৰি, উক্ত ব্যৱহাৰকাৰীসকলে এতিয়াৰ পৰা কেৱল চৰকাৰে অনুমোদিত পাইকাৰী বিক্ৰী কেন্দ্ৰৰ পৰাহে নিজৰ প্ৰয়োজনীয় ইন্ধন সংগ্ৰহ কৰিব পাৰিব। এই নতুন ব্যৱস্থাটো প্ৰাৰম্ভিক পৰ্যায়ত ৯০ দিনৰ বাবে বলবৎ থাকিব।
পেট্ৰলিয়াম আৰু প্ৰাকৃতিক গেছ মন্ত্ৰালয়ে এই বিশেষ নিৰ্দেশনা জাৰি কৰিছে। চৰকাৰৰ তৰফৰ পৰা জনোৱা হৈছে যে পেট্ৰল আৰু ডিজেলৰ খুচুৰা তথা পাইকাৰী মূল্যৰ মাজত প্ৰাৰ্থক্য থকাৰ বাবে বহু বাণিজ্যিক প্ৰতিষ্ঠানে পাইকাৰী কেন্দ্ৰৰ সলনি সাধাৰণ পেট্ৰল পাম্পৰ পৰাই ইন্ধন ক্ৰয় কৰি আছিল, যাৰ ফলত সাধাৰণ গ্ৰাহকৰ বাবে ইন্ধনৰ নাটনি হোৱাৰ সম্ভাৱনা সৃষ্টি হৈছিল। এতিয়াৰ পৰা কোনো কোম্পানীয়ে পেট্ৰল পাম্পৰ পৰা ইন্ধন ভৰাই নিজৰ ব্যৱসায়িক কামত ব্যৱহাৰ কৰিব নোৱাৰিব।
ইয়াৰ লগতে সাধাৰণ গ্ৰাহকৰ বাবেও ডিজেল ক্ৰয়ৰ ক্ষেত্ৰত কিছু কঠোৰ নিয়ম বান্ধি দিয়া হৈছে। এতিয়াৰ পৰা পেট্ৰল পাম্পত ডিজেল কেৱল বাহনৰ ইন্ধন টেংকীত বা চৰকাৰীভাৱে অনুমোদিত পাত্ৰতহে দিয়া হ’ব। কোনো এজন গ্ৰাহকে এদিনত সৰ্বাধিক দুশ লিটাৰ ডিজেলহে ক্ৰয় কৰিব পাৰিব আৰু সেই ক্ৰয় কৰা ডিজেল পুনৰ বিক্ৰী কৰিবলৈ অনুমতি দিয়া নহ’ব। এই পদক্ষেপৰ মূল উদ্দেশ্য হৈছে বজাৰত ইন্ধনৰ কৃত্রিম নাটনি ৰোধ কৰা আৰু ক’লা বজাৰী প্ৰতিহত কৰা।
এই নিৰ্দেশনা কাৰ্যকৰী কৰাৰ দায়িত্ব ৰাজহুৱা খণ্ডৰ তেল বিপণন কোম্পানীসমূহক দিয়া হৈছে। ৰাজ্য চৰকাৰ আৰু কেন্দ্ৰীয় শাসিত অঞ্চলসমূহক নিৰ্দেশ দিয়া হৈছে যাতে ইন্ধনৰ মজুতকৰণ, ক’লা বজাৰী আৰু অবৈধ সৰবৰাহ ৰোধ কৰিবলৈ কঠোৰ পদক্ষেপ গ্ৰহণ কৰা হয়। যদি কোনো ব্যক্তিয়ে এই নিয়ম উলংঘা কৰে, তেন্তে আৱশ্যকীয় সামগ্ৰী আইনৰ অধীনত তেওঁলোকৰ বিৰুদ্ধে বিহিত ব্যৱস্থা গ্ৰহণ কৰা হ’ব বুলি চৰকাৰে স্পষ্ট কৰি দিছে। প্ৰয়োজন হ’লে চৰকাৰে এই সময়সীমা পাছলৈ বৃদ্ধি কৰিব পাৰে।
