অসমৰ সামাজিক আৰু ৰাজনৈতিক প্ৰেক্ষাপটত এগৰাকী চোৰৰ জীৱনক আধাৰ হিচাপে লৈ নিৰ্মিত অসমীয়া চলচ্চিত্ৰ ‘মই এটি নিশাচৰ’য়ে আমেৰিকা যুক্তৰাষ্ট্ৰৰ সন্মানীয় একোলাড গ্ল’বেল ফিল্ম কম্পিটিশ্যনত ‘এৱাৰ্ড অৱ এক্সেলেন্স স্পেচিয়েল মেনশ্যন’ (Award of Excellence Special Mention) বঁটা লাভ কৰি ৰাজ্যখনলৈ গৌৰৱ কঢ়িয়াই আনিছে। ৰাষ্ট্ৰীয় বঁটাপ্ৰাপ্ত চলচ্চিত্ৰ নিৰ্মাতা বিদ্যুৎ কটকীৰ পৰিচালনা আৰু জ্যেষ্ঠ সাংবাদিক অনুৰাধা শৰ্মা পূজাৰীৰ এটি সত্য কাহিনীৰ ওপৰত আধাৰিত এই ছবিখনে আন্তঃৰাষ্ট্ৰীয় পৰ্যায়ত উচ্চ প্ৰশংসা লাভ কৰিবলৈ সক্ষম হৈছে।
পৰিচালক বিদ্যুৎ কটকীয়ে জানিবলৈ দিয়া মতে, আমেৰিকা যুক্তৰাষ্ট্ৰত অনুষ্ঠিত এই প্ৰতিযোগিতাখন ‘মুভি মেকাৰ‘ আলোচনীৰ মতে প্ৰৱেশ মূল্যৰ বিনিময়ত অংশগ্ৰহণ কৰিবলগীয়া বিশ্বৰ শীৰ্ষ ২৫ খন চলচ্চিত্ৰ মহোৎসৱৰ ভিতৰত অন্যতম। এই সন্মানে ছবিখনক সমগ্ৰ প্ৰতিযোগিতাখনৰ শীৰ্ষ ১০ খন শ্ৰেষ্ঠ ছবিৰ তালিকাত স্থান দিছে। কলাত্মক আৰু কাৰিকৰী দিশত সৰ্বোচ্চ মানদণ্ড স্থাপন কৰা প্ৰকল্পসমূহকহে এই স্বীকৃতি প্ৰদান কৰা হয় বুলি পৰিচালকগৰাকীয়ে মন্তব্য কৰে। তেওঁ লগতে কয় যে এই সন্মানে মানৱীয় আৱেগৰ কোনো মানৱসৃষ্ট ভৌগোলিক সীমাৱদ্ধতা নাই আৰু ই সকলোৰে বাবে একেই ভাষা কয় বুলি থকা বিশ্বাসক পুনৰ দৃঢ় কৰিছে। অসমৰ এখন দুৰ্গম গাঁৱৰ পটভূমিত নিৰ্মিত হ’লেও এই কাহিনীয়ে সাম্প্ৰতিক সময়ত বিশ্বৰ প্ৰায় প্ৰতিখন দেশতে দেখা পোৱা সামাজিক আৰু ৰাজনৈতিক প্ৰত্যাহ্বানসমূহক প্ৰতিফলিত কৰে।
‘মই এটি নিশাচৰ’ ছবিখনৰ কাহিনীভাগ কদুৱা নামৰ এজন চতুৰ আৰু প্ৰত্যুৎপন্নমতি গাঁৱলীয়া চোৰৰ জীৱনৰ ওপৰত আধাৰিত। নিজৰ জীৱনধাৰণৰ মান উন্নত কৰাৰ বাবে কদুৱাই কৰা সৎ প্ৰচেষ্টাসমূহ কেনেদৰে স্থানীয় ক্ষমতাশালী লোকৰ খেয়াল-খুচি আৰু নিৰ্দেশনাত বাৰে বাৰে বাধাগ্ৰস্ত হয়, সেয়াই ছবিখনৰ মূল উপজীৱ্য। এই সন্মান লাভ কৰি আপ্লুত পৰিচালক কটকীয়ে কয় যে এই বঁটা কদুৱাৰ পৃথিৱীখনক জীৱন্ত ৰূপ দিয়া সমগ্ৰ সৃষ্টিশীল দলটোৰ প্ৰাপ্য। ছবিখনৰ শেষত দৰ্শকৰ মনত ‘প্ৰকৃত চোৰ কোন’ বুলি এক গভীৰ প্ৰশ্নৰ উদয় হ’ব বুলি তেওঁ উল্লেখ কৰে। ছবিখনৰ মুখ্য চৰিত্ৰত বিশিষ্ট নাট্যশিল্পী গুণমণি বৰুৱাই অভিনয় কৰাৰ লগতে অসমীয়া চলচ্চিত্ৰ জগতৰ কেইবাগৰাকীও জ্যেষ্ঠ আৰু কনিষ্ঠ শিল্পীয়ে গুৰুত্বপূৰ্ণ ভূমিকাত অৱতীৰ্ণ হৈছে।
মুম্বাই নিবাসী চলচ্চিত্ৰ নিৰ্মাতাগৰাকীয়ে লগতে প্ৰকাশ কৰে যে ছবিখন আমেৰিকাৰ ২০২৬ বৰ্ষৰ ক’ভেলাইট ইণ্টাৰনেচনেল ফিল্ম ফেষ্টিভেললৈকো নিৰ্বাচিত হৈছে। মহোৎসৱখনত ছবিখন চোৱাৰ পিছত চলচ্চিত্ৰ নিৰ্মাতাসকলে ইয়াক দৰ্শকক বাৰুকৈয়ে আকৰ্ষণ কৰিব পৰা এখন মনোমহা ছবি বুলি অভিহিত কৰিছে। কান বা ছানডান্সৰ দৰে বৃহৎ মহোৎসৱ নহ’লেও গুণগত মান, বৈচিত্ৰ্য আৰু সমগ্ৰ বিশ্বৰ স্বাধীন চলচ্চিত্ৰ নিৰ্মাতাসকলৰ সৃষ্টিৰাজিক তুলি ধৰাৰ ক্ষেত্ৰত এই মহোৎসৱৰ যথেষ্ট সুনাম আছে। নেশ্যনেল ফিল্ম ডেভেলপমেণ্ট কৰ্পৰেচন (এন এফ ডি চি) আৰু ৰেড ৰিভাৰ এণ্ড ব্লু হিলছৰ প্ৰযোজনাত নিৰ্মিত এই ছবিখন অহা কেইমাহমানৰ ভিতৰত অসমত ব্যৱসায়িকভাৱে মুক্তি দিয়া হ’ব আৰু ৰাজ্যবাসীয়েও ইয়াক আদৰি ল’ব বুলি পৰিচালকগৰাকীয়ে আশা প্ৰকাশ কৰিছে। আৰু বিশ্বৰ ভিন্ন প্ৰান্তৰ স্বাধীন নিৰ্মাতাসকলৰ কৰ্মৰাজিক তুলি ধৰাৰ ক্ষেত্ৰত এই মহোৎসৱৰ যথেষ্ট সুনাম আছে। নেশ্যনেল ফিল্ম ডেভেলপমেণ্ট কৰ্পৰেচন (এন এফ ডি চি) আৰু ৰেড ৰিভাৰ এণ্ড ব্লু হিলছৰ প্ৰযোজনাত নিৰ্মিত এই ছবিখন অহা কেইমাহমানৰ ভিতৰত অসমত ব্যৱসায়িকভাৱে মুক্তি দিয়া হ’ব আৰু ৰাজ্যবাসীয়েও ইয়াক আদৰি ল’ব বুলি পৰিচালকগৰাকীয়ে আশা প্ৰকাশ কৰিছে।
