মন্ত্ৰী হিমন্ত বিশ্ব শৰ্মাই ‘ছাৰ, ছাৰ’ বুলি সম্বোধন কৰা এজন ব্যক্তি আগন্তুক দিনত স্বয়ং হিমন্তৰ বিৰুদ্ধে কংগ্ৰেছৰ পাশুপত অস্ত্ৰ হৈ পৰিব পাৰে। মন্ত্ৰীজনৰ এইজন ‘ছাৰ’ৰ প্ৰসংগেৰে প্ৰদেশ কংগ্ৰেছে আজি এই ইংগিত দাঙি ধৰিছে।
পিছে, কোন নো হিমন্ত বিশ্ব শৰ্মাৰ এই ‘ছাৰ’জন?
জ্যেষ্ঠ কংগ্ৰছ নেতা তথা প্ৰাক্তন মন্ত্ৰী ৰকিবুল হুছেইনে আজি ৰাজীৱ ভৱনত অনুষ্ঠিত যোগদান সমাৰোহত হিমন্তই ছাৰ বুলি সম্বোধন কৰা ব্যক্তিজনৰ সৈতে সকলোকে চিনাকি কৰাই দিছে। তেওঁ অসম চৰকাৰৰ অৱসৰপ্ৰাপ্ত অতিৰিক্ত মুখ্য সচিব এম জি ভি কে ভানু।
তৰুণ গগৈ নেতৃত্বাধীন কংগ্ৰেছ চৰকাৰৰ দিনত গগৈৰ অতি বিশ্বস্ত আমোলা হিচাপে পৰিচিত আছিল ভানু। ভাৰতীয় প্ৰশাসনিক সেৱাৰ বিষয়াজন আজিৰ যোগদান সমাৰোহত কংগ্ৰেছী হ’ল।
ভানুৰ কংগ্ৰেছ যাত্ৰাই এটা বিশেষ কাৰণত লাভান্বিত কৰিব পাৰে কংগ্ৰেছক। ভানুৱে কংগ্ৰেছত যোগদান কৰা অনুষ্ঠানটোতে নিজৰ ভাষণত এই সম্ভাৱনা দাঙি ধৰিছে ৰকিবুল হুছেইনে।
“মোৰ লগত ভানুৰ বৰ ভাল নাছিল। কিন্তু ভানুৰ সৈতে ভাল সম্পৰ্ক আছিল সেইজনৰ হে”, ব্যক্তি বিশেষক ইংগিত কৰি ৰকিবুল হুছেইনৰ এই মন্তব্য।
‘সেইজন’ যে মন্ত্ৰী হিমন্তৰ বাদে আন কোনো নহয় সেয়াও ৰকিবুল হুছেইনৰ ভাষণৰ পিছৰফালে স্পষ্ট হয়।
হুছেইনে কয়, “আমি যিহেতু মন্ত্ৰী আছিলো গতিকে ভানুৱে আমাক ‘ছাৰ’ বুলি সম্বোধন কৰিছিল। কিন্তু সেইজনে আকৌ ওলোটাই ভানুকহে ‘ছাৰ’ বুলি মাতিছিল। আৰু এই ‘ছাৰ’ ‘ছাৰ’ ইমানেই বেছি হৈ গৈছিল যে ‘ছাৰ’ৰ উৎপাতত আমি থাকিব নোৱাৰা হৈছিলো”।
“সেই সময়ত কংগ্ৰেছত ‘সেইজন’ৰ উৎপাতত এনেকুৱা শ্বাসৰুদ্ধকৰ পৰিস্থিতি হৈছিল যে আনবোৰ বিব্ৰত হ’ব লগীয়া হৈছিল। কিন্তু এতিয়া ‘সেইজনে’ই কংগ্ৰেছৰ বিৰুদ্ধে কয়”, হুছেইনৰ মন্তব্য।
এম জি ভি কে ভানুৱে কংগ্ৰেছত যোগ দিয়াত ভালপোৱা বুলি জানিবলৈ দি ৰকিবুল হুছেইনে কয় যে হিমন্তৰ লগত সু-সম্পৰ্কৰ সুবাদতে ভানুৱে তেওঁৰ (হিমন্তৰ) বহু কথাই জানে।
“আজি ভানু ডাঙৰীয়া আহিছে মই ভাল পাইছো। মইতো তেওঁৰ (হিমন্তৰ) বিৰুদ্ধে বহু কথাই জানো। ভানুৱেও তেওঁৰ বিৰুদ্ধে বহু কথাই জানে। গতিকে যিবিলাক কথা ক’লে ৰাইজৰ উপকাৰ হ’ব, ভানু ডাঙৰীয়াক কওঁ, আপুনি আন্তৰিকতাৰে ৰাইজৰ বাবে কোনবিলাক বেয়া কাম তেওঁ কৰিছিল সেয়া নিঃস্বাৰ্থভাৱে ৰাইজক জনাব”, হুছেইনৰ আহ্বান ভানুলৈ।
ৰকিবুল হুছেইনে একেটা ভাষণতে হিমন্ত বিশ্ব শৰ্মাক এজন ‘ভাল মন্ত্ৰী’ বুলিও উল্লেখ কৰে। কিন্তু হুছেইনৰ মতে তেওঁ যেতিয়া কংগ্ৰেছ চৰকাৰৰ দিনত তৰুণ গগৈৰ হৈ বিধানসভাত বিত্ত বিভাগৰ উত্তৰ দিছিল সেই মন্ত্ৰীজনৰ লগত আজিৰ বিত্ত মন্ত্ৰী হিমন্তক তুলনা কৰিলে তেওঁ ফেইল কৰিব বুলিও উল্লেখ কৰে।
তৰুণ গগৈৰ আঙুলিত ধৰি ৰাজনীতি শিকি এতিয়া তৰুণ গগৈকে গালি পৰা, ড০ হীৰেন গোহাঁইৰ দৰে ব্যক্তিক গালি পৰা হিমন্তৰ দম্ভালি বেছিদিন নচলে বুলিও ৰকিবুলে ভাষণত কয়।
উল্লেখযোগ্য যে অসমত দীৰ্ঘদিন সেৱা আগ বঢ়োৱা ভানু শোণিতপুৰ জিলাত উপায়ুক্ত হৈ থাকোতে বিশ্বনাথ চাৰিআলিৰ এছ ডি অ’ (চিভিল) আছিল অসম প্ৰদেশ কংগ্ৰেছৰ সভাপতি ৰিপুণ বৰা। গতিকে ৰিপুণ বৰাৰ সৈতে নতুন কংগ্ৰেছী ভানুৰ সম্পৰ্কটো কেনেকুৱা হ’ব সেয়া সময়েহে ক’ব।
