কেন্দ্ৰীয় চৰকাৰে সোমবাৰে এক গুৰুত্বপূৰ্ণ ঘোষণা কৰি জনাইছে যে অহা ১ জুলাইৰ পৰা সমগ্ৰ দেশতে নতুন বিকশিত ভাৰত — গেৰাণ্টি ফৰ ৰোজগাৰ এণ্ড আজীৱিকা মিছন (গ্ৰামীণ) চমুকৈ ভিবি-জি ৰাম জি আইন কাৰ্যকৰী হ’ব। এই নতুন আইনে বৰ্তমানৰ মহাত্মা গান্ধী ৰাষ্ট্ৰীয় গ্ৰামীণ নিয়োগ গেৰাণ্টি আইন বা মনৰেগাক সম্পূৰ্ণৰূপে প্ৰতিষ্ঠাপন কৰিব। গ্ৰামোন্নয়ন মন্ত্ৰালয়ে জাৰি কৰা এক জাননী অনুসৰি দেশৰ সকলো ৰাজ্য আৰু কেন্দ্ৰীয় শাসিত অঞ্চলত এই নতুন নিয়ম ১ জুলাইৰ পৰাই বলবৎ কৰা হ’ব। চৰকাৰে আন এক নিৰ্দেশনাত স্পষ্ট কৰি দিছে যে ২০০৫ চনৰ পুৰণি মনৰেগা আইনখন বাতিল কৰি তাৰ ঠাইত এই নতুন ব্যৱস্থাটো কাৰ্যকৰী কৰা হ’ব যদিও ইয়াৰ ফলত শ্ৰমিকসকলৰ কোনো অসুবিধা নহয়।
চৰকাৰে ৰাইজক আশ্বস্ত কৰিছে যে মনৰেগাৰ পৰা এই নতুন ব্যৱস্থালৈ পৰিৱৰ্তনৰ প্ৰক্ৰিয়াটো অতি সূচাৰুৰূপে সম্পন্ন কৰা হ’ব যাতে শ্ৰমিকসকলে কামৰ ক্ষেত্ৰত কোনো বাধাৰ সন্মুখীন নহয়। জাননীখনত উল্লেখ কৰা অনুসৰি অহা ৩০ জুনলৈকে মনৰেগাৰ অধীনত চলি থকা সকলো কাম নতুন ব্যৱস্থাৰ মাজলৈ স্বয়ংক্ৰিয়ভাৱে স্থানান্তৰ কৰা হ’ব। বৰ্তমান যিসকল শ্ৰমিকৰ ওচৰত ই-কেৱাইচি কৰা মনৰেগা জব কাৰ্ড আছে, সেইসমূহ তেতিয়ালৈকে বৈধ হৈ থাকিব যেতিয়ালৈকে তেওঁলোকক নতুন গ্ৰামীণ ৰোজগাৰ গেৰাণ্টি কাৰ্ড প্ৰদান কৰা নহয়। চৰকাৰে এইটোও স্পষ্ট কৰি দিছে যে কেৱল ই-কেৱাইচি নথকাৰ বাবে কোনো শ্ৰমিককে কামৰ পৰা বঞ্চিত কৰা নহব আৰু যিসকলৰ এতিয়াও জব কাৰ্ড নাই তেওঁলোকে পঞ্চায়ত পৰ্যায়ত নিজৰ নাম পঞ্জীয়ন কৰিব পাৰিব।
বৰ্তমান গ্ৰামোন্নয়ন মন্ত্ৰালয়ে ৰাজ্য আৰু কেন্দ্ৰীয় শাসিত অঞ্চলসমূহৰ সৈতে আলোচনা কৰি মজুৰি আদায়, অভযোগ নিষ্পত্তি আৰু অন্যান্য নীতি-নিয়মৰ খচৰা প্ৰস্তুত কৰি আছে। এই নিয়মাৱলীসমূহ অতি সোনকালে ৰাজহুৱা কৰি জনসাধাৰণৰ মতামত গ্ৰহণ কৰা হ’ব। চৰকাৰৰ মতে গাঁও পঞ্চায়তসমূহ হ’ল গ্ৰাম্য অঞ্চলৰ পৰিৱৰ্তনৰ মূল স্তম্ভ আৰু এই নতুন আইনখনে গাঁৱৰ আন্তঃগাঁথনি উন্নয়নৰ লগতে নিয়োগ সৃষ্টিত বিশেষ সহায় কৰিব। ইয়াৰ জৰিয়তে গাঁৱৰ মানুহ অধিক স্বাৱলম্বী হ’ব পাৰিব বুলি চৰকাৰে আশা প্ৰকাশ কৰিছে।
