লুইতৰ বুকুৰে নৌ-পথেৰে গুৱাহাটী-উত্তৰ গুৱাহাটীৰ মাজত আহ-যাহ কৰা হাজাৰ হাজাৰ যাত্ৰীৰ বাবে অধিক সুচলতাৰ বাট মুকলি হোৱাৰ পথত। জলপথ ব্যৱহাৰকাৰীসকলৰ বাবে ইতিমধ্যে কলকাতাৰ পৰা গুৱাহাটী আহি পাইছে লুইতৰ বুকুত চলিব লগীয়া এখন ৰ’ৰ’ জাহাজ। ২৪ ফেব্ৰুৱাৰিৰ পৰা গুৱাহাটীৰ দুই পাৰৰ মাজত চলিব এম ভি শংকৰদেৱ নামৰ এই জাহাজখন।
ইয়াৰ উপৰি একেদিনাই চলাচল আৰম্ভ কৰিব আন তিনিখন সৰু জাহাজেও। সেইকেইখনৰ নাম আৰ পি এল পুঠিমাৰী, আৰ পি এল বুঢ়াদিয়া আৰু এম ভি বৰলীয়া।
মুখ্য মন্ত্ৰী সৰ্বানন্দ সোণোৱাল, মন্ত্ৰী ড০ হিমন্ত বিশ্ব শৰ্মা আৰু চন্দ্ৰমোহন পাটোৱাৰীয়ে ২৪ ফেব্ৰুৱাৰিত জাহাজকেইখনৰ যাত্ৰাৰ শুভাৰম্ভণি কৰিব। এই তথ্য অভ্যন্তৰীণ জল পৰিবহণৰ।
উল্লেখযোগ্য যে যোৱা বছৰৰ ৫ ছেপ্তেম্বৰত সংঘটিত নাও দুৰ্ঘটনাৰ পাছত অভ্যন্তৰীণ জলপৰিবহণ বিভাগে ব্ৰহ্মপুত্ৰত ভটভটী (যন্ত্ৰচালিত নাও)ৰ চলাচল বন্ধ কৰি দিছিল। ইয়াৰ পাছৰে পৰা গুৱাহাটী-উত্তৰ গুৱাহাটীৰ মাজত নাৱেৰে যাতায়াত কৰা যাত্ৰীসকলে অসুবিধাৰ সন্মুখীন হ’ব লগীয়া হৈছে।
আনহাতে, গুৱাহাটীৰ দুয়োটা পাৰৰ মাজত চলাচল কৰা ফেৰিসমূহ পুৰণি আৰু বহু ফেৰি বিকল হৈও গৈছে।
কিছুদিন পূৰ্বে গুৱাহাটীলৈ অনা এম শংকৰদেৱ নামৰ জাহাজখন ভাৰতীয় অভ্যন্তৰীণ জলপথ প্ৰাধিকৰণৰ তত্ত্বাৱধানত এ চি ৰয় এণ্ড কোম্পানী নামৰ কলকাতাৰ এটা প্ৰতিষ্ঠানে নিৰ্মাণ কৰিছে। জাহাজখনৰ দৈৰ্ঘ্য ৫৭ মিটাৰ, প্ৰস্থ ১৫.২০ মিটাৰ আৰু ইয়াৰ অন্তৰ্ভাগ ৩ মিটাৰ দ।
অসম চৰকাৰৰ অভ্যন্তৰীণ জল পৰিবহণ বিভাগে জানিবলৈ দিয়া মতে কেইবাকোটি টকা ব্যয়েৰে নিৰ্মাণ কৰা এই জাহাজখনে ২০০জন যাত্ৰী আৰু ১২খন বোজাইভৰ্তি ট্ৰাক কঢ়িয়াব পাৰিব। জাহাজখনত ৪০০ বি এইচ্ছ পিৰ ২টা ইঞ্জিন আছে আৰু ই ঘণ্টাত ৯ কিল’ নট গতিত যাত্ৰা কৰিব পাৰিব।
এম ভি শংকৰদেৱৰ উপৰি দেওবাৰৰ পৰাই গুৱাহাটী-উত্তৰ গুৱাহাটীৰ মাজত চলিব লগীয়া আন তিনিখন জাহাজো ইতিমধ্যেই সাজু হৈ উঠিছে।
১.৯০ কোটি টকা ব্যয়েৰে নিৰ্মাণ কৰা আৰ পি এল পুঠিমাৰী আৰু আৰ পি এল বুঢ়াদিয়া নামৰ জাহাজ দুখনৰ দৈৰ্ঘ্য ৩০ মিটাৰ আৰু প্ৰস্থ ০৭.৫০ মিটাৰকৈ। জাহাজ দুখনৰ প্ৰতিখনে এবাৰত ৫০জন যাত্ৰী আৰু ৪খন ভৰ্তি ট্ৰাকৰ সমপৰ্যায়ৰ ওজন পাৰাপাৰ হ’ব পাৰিব বুলি অভ্যন্তৰীণ জল পৰিবহণ বিভাগৰ সঞ্চালক ৰাহুল চন্দ্ৰ দাসে জানিবলৈ দিয়ে।
এম ভি বৰলীয়া নামৰ জাহাজখনেৰে ১২০জন যাত্ৰীৰ উপৰি ৭০-৮০খন দুচকীয়া বাহন ইপাৰ-সিপাৰ হ’ব পাৰিব বুলিও বিভাগৰ সঞ্চালকগৰাকীয়ে জনায়। ২৮ মিটাৰ দৈৰ্ঘ্য আৰু ১০ মিটাৰ প্ৰস্থৰ জাহাজখনৰ নিৰ্মাণ খৰচ ১.৮৬ কোটি টকা।
অৱশ্যে, জাহাজকেইখন কোনকেইটা ঘাটৰ মাজত চলিব সেয়া এতিয়াও নিশ্চিত হোৱা নাই বুলি বিভাগে জানিবলৈ দিয়ে।
