বিশ্বৰ শীৰ্ষস্থানৰ টেনিছ খেলুৱৈ ন’ভাক জ’ক’ভিচ ক’ৰ’নাত আক্ৰান্ত হৈছে। মঙলবাৰে ছাৰ্বিয়ান তাৰকা গৰাকীয়ে এই কথা নিজেই ৰাজহুৱা কৰে।
মহামাৰী ক’ৰ’নাৰ বাবে বহু দিন ধৰি টেনিছৰ পৰা আঁতৰি থকৰ পাছত কিছুদিন পূৰ্বে আয়োজন কৰা প্ৰদৰ্শনীমূলক আদ্ৰিয়া ট্যুৰ ইভেণ্টত ভাগ লোৱাৰ পিছতে ক’ভিড-১৯ত আক্ৰান্ত হৈছে খেলুৱৈগৰাকী।
এই সন্দৰ্ভত খেলুৱৈ গৰাকীয়ে কয়, ‘বেলগ্ৰেডত উপস্থিত হোৱাৰ পাছতে আমি পৰীক্ষা কৰিছিলো। মোৰ লগতে পত্নীও আক্ৰান্ত বুলি ধৰা পৰিছে। কিন্তু আমাৰ সন্তানসকলৰ পৰীক্ষাৰ ফল নিগেটিভ আহিছে’।
ছাৰ্বিয়ান তাৰকা গৰাকীৰ দেহত ক’ৰ’নাৰ কোনো লক্ষণ নাছিল বুলি জানিব পৰা যায়।
উল্লেখ্য যে, লকডাউনৰ নিয়ম শিথিল কৰাৰ পাছতেই ছাৰ্বিয়া আৰু ক্ৰ’ৱেছিয়াই এই টুৰ্ণামেণ্টৰ আয়োজন কৰিছিল সমস্যাত পৰা খেলুৱৈসকলৰ বাবে ধন সংগ্ৰহ কৰা লক্ষ্যৰে।
কিন্তু এই টুৰ্ণামেণ্টত অংশ লোৱা কোনো খেলুৱৈ তথা দৰ্শকে সামাজিক দূৰত্বৰ নিয়ম মানি চলা নাছিল। দৰ্শকেৰে পৰিপূৰ্ণ ষ্টেডিয়ামত অনুষ্ঠিত হৈছিল খেল।
ক’ৰ’না সংক্ৰমণৰ গতি ধাৰাবাহিকভাৱে বৃদ্ধি পাই থকাৰ সময়তে সামাজিক দূৰত্বৰ নিয়ম নামানি স্প’ৰ্টছ টুৰ্ণামেণ্ট আয়োজন কৰা ঘটনাক বহতো ক্ৰীড়া বিশেষজ্ঞই সমালোচনা কৰিছে।
