হয় নাগৰিকত্ব বিধেয়ক বাতিল, নহয় মৃত্যুক বৰণ!
এই চৰম সংকল্পৰে নাগৰিকত্ব বিধেয়ক বাতিল নোহোৱা পৰ্য্যন্ত নতুন দিল্লীত আমৰণ অনশনত বহিবলৈ ওলাইছে অসম জাতীয়তাবাদী যুৱ ছাত্ৰ পৰিষদ, কৃষক মুক্তি সংগ্ৰাম সমিতিকে ধৰি ৰাজ্যৰ ৭০টা সংগঠন।
নতুন দিল্লীৰ সংসদ মাৰ্গত ৯ ডিচেম্বৰৰ পুৱা ১০ বজাৰ পৰা অনশনত বহিব এই ৭০টা “জাতীয়-জনগোষ্ঠীয়-সংখ্যালঘু” সংগঠনৰ প্ৰত্যেকৰে দুজনকৈ নেতা।
শুকুৰবাৰে গুৱাহাটীৰ গান্ধীবস্তিত কৃষক মুক্তি সংগ্ৰাম সমিতিৰ কেন্দ্ৰীয় কাৰ্য্যালয়ত সংবাদমেলযোগে এই কথা ঘোষণা কৰে উমৈহতীয়া মঞ্চটোৰ নেতা অখিল গগৈ আৰু পলাশ চাংমায়ে।
বিজেপি চৰকাৰ উত্থাপিত বিধেয়কখনে দেশলৈ আনিব পৰা সংকট সন্দৰ্ভত সমগ্ৰ দেশবাসীক অৱগত কৰাও এই অনশনৰ অন্যতম উদ্দেশ্য বুলি দাবী কৰে কৃষক মুক্তিৰ নেতা অখিল গগৈয়ে।
“নাগৰিকত্ব সংশোধনী বিধেয়ক গৃহীত কৰাৰ কৌশলত কেন্দ্ৰীয় আৰু ৰাজ্য চৰকাৰ উঠি-পৰি লাগিছে। উক্ত অনশনৰ জৰিয়তে সমগ্ৰ দেশবাসীক বিধেয়কখনে দেশলৈ কেনেধৰণে সংকট কঢ়িয়াই আনিব পাৰে সেই কথা জনাই দিব বিচৰা হৈছে,” দাবী গগৈৰ।
“কেৱল ৰাজনৈতিক উদ্দেশ্য” আগত ৰাখি কেন্দ্ৰীয় চৰকাৰে শীতকালীন অধিৱেশনতে বিধেয়কখন গৃহীত কৰি আইনৰ ৰূপ দিয়াৰ আশংকা কৰিছে যুৱ ছাত্ৰ পৰিষদৰ সাধাৰণ সম্পাদক পলাশ চাংমায়ে।
“চৰকাৰৰ ষড়যন্ত্ৰৰ তীব্ৰ বিৰোধিতা কৰি ৰাজপথলৈ অসমৰ জনসাধাৰণ ওলাই আহিছে। বিধেয়কখনক আইনৰ ৰূপ দিয়াত বাধা প্ৰদানৰ বাবেই এই আমৰণ অনশন কাৰ্য্যসূচী লোৱা হৈছে। এই অনশনৰ প্ৰতি সমগ্ৰ দেশবাসীক সমৰ্থন জনাবলৈ ৭০টা জাতীয় সংগঠনে আহ্বান জনাইছো,” চাংমাইৰ আহ্বান।
আনহাতে দেশৰ ১৪৯খন তৈলক্ষেত্ৰৰ লগতে অসমৰো ১১খন তৈলক্ষেত্ৰ ব্যক্তিগত খণ্ডৰ হাতত “গতাব” বিচৰা বিজেপি চৰকাৰৰ “সিদ্ধান্ত”ৰ বিৰুদ্ধেও হুংকাৰ দিছে সংগঠনকেইটাই।
“বিজেপি নেতৃত্বাধীন কেন্দ্ৰীয় চৰকাৰে কেৱল পুঁজিপতি গোষ্ঠীসমূহক সন্তুষ্ট কৰিবৰ বাবেই অসমৰ লাভজনক তৈলক্ষেত্ৰসমূহ ব্যক্তিগত খণ্ডক গতাব বিচাৰিছে। কোনো কাৰণতে অসমৰ তৈলক্ষেত্ৰ ব্যক্তিগত খণ্ডৰ হাতত গতাই দিবলৈ দিয়া নহ’ব,” হুংকাৰ পলাশ চাংমাইৰ।
