সোমবাৰে ন্যায়াধীশ সূৰ্য কান্তই ভাৰতৰ নতুন মুখ্য ন্যায়াধীশ হিচাপে শপত গ্ৰহণ কৰে। তেওঁ সদ্য অৱসৰপ্ৰাপ্ত মুখ্য ন্যায়াধীশ বি আৰ গাভাইৰ স্থলাভিষিক্ত হৈছে।
শপত গ্ৰহণ অনুষ্ঠানৰ অন্তত ৰাষ্ট্ৰপতি ভৱনত এক আকৰ্ষণীয় তথা বিৰল ঘটনা দেখিবলৈ পোৱা যায়। শপত গ্ৰহণৰ পাছতে নতুন মুখ্য ন্যায়াধীশ সূৰ্য কান্তই উচ্চতম ন্যায়ালয়লৈ যাবলৈ ওলাই আহে আৰু ৰাষ্ট্ৰপতি ভৱনৰ পৰ্টিক’ত থিয় হয়। তেনেতে মুখ্য ন্যায়াধীশৰ বাবে আবণ্টিত মাৰ্চিডিজ বেঞ্জ গাড়ীখন তেওঁৰ কাষলৈ অহা দেখা যায়। যিহেতু কিছুসময় আগতে বিদায়ী মুখ্য ন্যায়াধীশ বি আৰ গাভাই সেইখন গাড়ীতে আহিছিল, সেয়েহে সূৰ্য কান্তই কিছু সংকোচত থমকি ৰয়।
কিন্তু পৰিস্থিতি সহজ কৰি গাড়ীৰ চালকজন নামি আহে আৰু নতুন মুখ্য ন্যায়াধীশক গাড়ীত উঠিবলৈ অনুৰোধ জনায়। চালকজনে জানিবলৈ দিয়ে যে বিদায়ী মুখ্য ন্যায়াধীশ বি আৰ গাভাইয়ে সেই চৰকাৰী বাহন ইতিমধ্যে ত্যাগ কৰিছে।
গাভাইয়ে স্পষ্ট কৰি দিছে যে তেওঁ চৰকাৰী গাড়ীৰে ৰাষ্ট্ৰপতি ভৱনলৈ আহিছে যদিও, ঘৰলৈ উভতিব নিজৰ ব্যক্তিগত বাহনেৰে। তেওঁৰ ইচ্ছা আছিল যে নৱনিযুক্ত মুখ্য ন্যায়াধীশগৰাকীয়ে যাতে প্ৰথম দিনাৰ পৰাই সেই চৰকাৰী বাহনেৰে আদালতত উপস্থিত হ’ব পাৰে।
উচ্চতম ন্যায়ালয়ৰ সূত্ৰৰ মতে, বি আৰ গাভাইৰ এই সিদ্ধান্ত এক বিৰল নজিৰ। নিয়ম অনুসৰি, নতুন মুখ্য ন্যায়াধীশে শপত গ্ৰহণ নকৰালৈকে বিদায়ীজনে নিজৰ পদবী আৰু সুবিধা ভোগ কৰিব পাৰে। সেই অনুসৰি সোমবাৰে পুৱা উচ্চতম ন্যায়ালয়ৰ সচিবালয়ে চৰকাৰী গাড়ীখন গাভাইৰ বাসভৱনলৈ প্ৰেৰণ কৰিছিল। কিন্তু গাভাইয়ে নিজৰ ব্যক্তিগত গাড়ীখনো কনভয়ৰ লগত লৈ আনিছিল আৰু ৰাষ্ট্ৰপতি ভৱনৰ পৰা ওলাই চালকক ধন্যবাদ জনাই নিজৰ গাড়ীতে ঘৰলৈ উভতি গৈছিল।
এই উদাৰতাৰ জৰিয়তে ন্যায়াধীশ গাভাইয়ে সেইসকল ক্ষমতাশালী লোকলৈ এক শক্তিশালী বাৰ্তা প্ৰেৰণ কৰিছে, যিসকলে অৱসৰৰ পিছতো চৰকাৰী সা-সুবিধা এৰিব নিবিচাৰে।
অভিযোগ অনুসৰি, এই তালিকাত দুৰ্ভাগ্যজনকভাৱে প্ৰাক্তন মুখ্য ন্যায়াধীশ ডি ৱাই চন্দ্ৰচুদৰ নামো সাঙোৰ খাইছে, যিয়ে অৱসৰৰ পিছতো এটা দীঘলীয়া সময় চৰকাৰী বাংলোত কটাইছিল বুলি অভিযোগ উত্থাপন হৈছে।
দিল্লীত অৱসৰৰ পিছত চৰকাৰী আৱাস-গাড়ী এৰি নোযোৱাৰ প্ৰৱণতা নতুন নহয়। কেতিয়াবা কেন্দ্ৰীয় চৰকাৰে আৰক্ষী প্ৰয়োগ কৰিও জবৰদস্তি ঘৰ খালী কৰিবলগীয়া হয়। ইয়াৰ এক উদাহৰণ হৈছে বৰ্তমানৰ কেন্দ্ৰীয় মন্ত্ৰী চিৰাগ পাছৱান। দুবছৰ পূৰ্বে তেওঁক দিল্লীৰ অভিজাত এলেকাৰ পিতৃ প্ৰয়াত ৰামবিলাস পাছৱানৰ চৰকাৰী বাংলোৰ পৰা বলপূৰ্বকভাৱে উচ্ছেদ কৰা হৈছিল, য’ত তেওঁ দলীয় কাৰ্যালয় খুলি লৈছিল।
