এক নৃসংশ হত্যাকাণ্ড পোহৰলৈ আহিছে। এজন যুৱকে নিজৰ প্ৰেয়সীক হত্যা কৰি শৰীৰটো ৩৫ টুকুৰা কৰি বিভিন্ন স্থানত খণ্ডকৈ খণ্ডকৈ পেলাই দিয়াৰ অভিযোগ উঠিছে। যোৱা শনিবাৰে ঘটনা সন্দৰ্ভত আৰক্ষীয়ে অভিযুক্ত যুৱকজনক গ্ৰেপ্তাৰ কৰিছে।
আৰক্ষীয়ে প্ৰকাশ অনুসৰি আফতাব আমিন পুনাৱাল্লাই যোৱা ১৮ মে’ত এই লোমহৰ্ষক হত্যাকাণ্ড সংঘটিত কৰিলেও অতি শেহতীয়াকৈহে ঘটনাটো পোহৰলৈ আহিছে।
আৰক্ষীৰ তথ্য অনুসৰি মুম্বাইৰ এটা কল চেণ্টাৰ কৰ্মৰত ২৬ বছৰীয়া শ্ৰদ্ধাৰ সৈতে পুনাৱাল্লা নামৰ যুৱকজনৰ প্ৰেমৰ সম্পৰ্ক আৰম্ভ হয়। কিন্তু এই সম্পৰ্কক শ্ৰদ্ধাৰ পৰিয়ালে মানি লোৱা নাছিল। তাৰ পাছতে দুয়ো মুম্বাইৰ পৰা দিল্লীলৈ পলায়ন কৰে।
লগতে পঢ়ক: দৌৰি তৎ পোৱা নাই নাড্ডা-শ্বাহ! গুজৰাটত নতুন, দলত্যাগীসকলক টিকট দি সংকটত বিজেপি
দিল্লীত এটা ফ্লেট ভাৰা কৰি লিভ-ইনত থাকিবলৈ আৰম্ভ কৰে প্ৰেমিক যুগলে। লিভ-ইনৰ সময়তো শ্ৰদ্ধাৰ পৰিয়ালে তেওঁলোকৰ প্ৰেমৰ সম্পৰ্কক মানি নোলোৱা বিষয়টোলৈ দুয়োৰে মাজত প্ৰায়ে কাজিয়াৰ সূত্ৰপাত হ’বলৈ ধৰে।
প্ৰেমিক পুনাৱাল্লাই শ্ৰদ্ধাক বিবাহ কৰাবলৈ জোৰ কৰিলেও শ্ৰদ্ধাই পৰিয়ালৰ অসন্মতিত বিবাহপাশত আৱদ্ধ হ’বলৈ অস্বীকাৰ কৰে। এই কথাটোক কেন্দ্ৰ কৰিয়ে যোৱা ১৮ মে’ত দুয়োৰে মাজত পুনৰ কাজিয়াৰ সূত্ৰপাত হয় আৰু প্ৰেমিক পুনাৱাল্লাই প্ৰেমিকা শ্ৰদ্ধাক হত্যা কৰি শৰীৰটো ৩৫ টা খণ্ডত বিভিক্ত কৰি প্ৰথমে ফ্ৰীজত থৈ দিয়ে। ফ্ৰীজত থোৱাৰ ১৮ টা দিনৰ পিছত ৰাতি ২ বজাত দিল্লীৰ বিভিন্ন স্থানত সেই টুকুৰাবোৰ পেলাই দিয়ে অভিযুক্ত প্ৰেমিকগৰাকীয়ে।
ইফালে কে’বাদিনো কন্যাৰ সৈতে মোবাইলেৰে যোগাযোগ কৰিবলৈ চেষ্টা কৰিও শ্ৰদ্ধাৰ পিতৃ ব্যৰ্থ হয়। অৱশেষত উপায়হীন হৈ শ্ৰদ্ধাৰ পিতৃয়ে কন্যাৰ সন্ধানত দিল্লীত উপস্থিত হয়। পিতৃয়ে শ্ৰদ্ধাৰ ফ্লেটলৈ গৈ দেখে ফ্লেটটো তলা বন্ধ। ইয়াৰ পাছতে শ্ৰদ্ধাৰ পিতৃয়ে দিল্লীৰ মেহৰৌলী আৰক্ষী থানাত উপস্থিত হৈ পুনৱাল্লা নামৰ যুৱকজনৰ বিৰুদ্ধে কন্যাক অপহৰণ কৰাৰ অভিযোগ তুলি এখন এজাহাৰ দাখিল কৰে।
লগতে পঢ়ক: শ্বাহৰ অধিবক্তা হোৱাৰ পুৰস্কাৰ নাছিল পদ; ৰিজিজুৰ কলেজিয়াম প্ৰশ্নৰো উত্তৰ প্ৰাক্তন মুখ্য ন্যায়াধীশৰ
আৰক্ষীয়ে উক্ত এজাহাৰৰ ভিত্তিত তদন্ত আৰম্ভ কৰাৰ পিছতে এই নৃশংস হত্যাকাণ্ডটো পোহৰলৈ আহে। ইতিমধ্যে আৰক্ষীয়ে ঘটনা সন্দৰ্ভত অভিযুক্ত প্ৰেমিকগৰাকীক গ্ৰেপ্তাৰ কৰি তদন্ত অব্যাহত ৰাখিছে।
