Rape and confinement allegations against Gujarat Ministerমহিলাক উঠাই নি বন্দী কৰি ৰাখি ধৰ্ষণৰ কৰাৰ দৰে গুৰুতৰ অভিযোগ উত্থাপিত হৈছে গুজৰাটৰ বিজেপি চৰকাৰৰ এগৰাকী মন্ত্ৰীৰ বিৰুদ্ধে। প্ৰাক্তন পঞ্চায়তৰ মুৰব্বীয়ে তেওঁৰ পত্নীৰ সম্পৰ্কত দাখিল কৰা লিখিত অভিযোগৰ ভিত্তিত আৰক্ষীয়ে গুজৰাটৰ মন্ত্ৰীজনৰ বিৰুদ্ধে তদন্ত আৰম্ভ কৰিবলৈ আগবাঢ়িছে।
গুজৰাটৰ গ্ৰামোন্নয়ন মন্ত্ৰী অৰ্জুনসিং চৌহান এই অভিযোগৰ বাবে প্ৰশ্নৰ সন্মুখীন হোৱাৰ সম্ভাৱনা আছে। খেৰা জিলা আৰক্ষীৰ উপ আৰক্ষী অধীক্ষকে এই কথা জানিবলৈ দিছে।
গুজৰাটৰ মহামেদাবাদৰ হালদাৰৱাছ গাঁৱৰ প্ৰাক্তন পঞ্চায়ত মুৰব্বীয়ে ডিএছপিৰ ওচৰত এটা লিখিত অভিযোগ দাখিল কৰিছিল যে মন্ত্ৰী অৰ্জুন সিং চৌহানে তেওঁৰ পত্নীক উঠাই নি অবৈধভাৱে বন্দী কৰি ৰাখিছিল। কেৱল সেয়াই নহয়, তেওঁৰ পত্নী ধৰ্ষণৰো বলি হৈছে।
তেওঁ কৈছিল যে অৰ্জুনসিং চৌহানে ২০১৫ চনত তেওঁৰ পত্নীলৈ এখন পত্ৰ প্ৰেৰণ কৰিছিল য’ত তেওঁক অৱগত কৰা হৈছিল যে তেওঁ নিৰ্বাচনত তালুকা পঞ্চায়তৰ প্ৰাৰ্থী হিচাপে নিৰ্বাচিত হৈছে। সেই সময়ত, তেওঁ জিলা বিজেপিৰ সভাপতি আছিল।
তেওঁৰ পত্নীয়ে সেই নিৰ্বাচনত প্ৰতিদ্বন্দ্বিতা কৰি জয়ী হৈছিল। পৰৱৰ্তী বছৰৰ পৰা মন্ত্ৰীগৰাকীয়ে বাৰে বাৰে তেওঁৰ পত্নীক দলীয় সভাৰ নামত মাতি পঠাইছিল। তদুপৰি, ঘৰৰ পৰা বহু দূৰৰ ঠাইলৈ লৈ গৈছিল আৰু যৌন সম্পৰ্কত লিপ্ত হৈছিল। কেৱল সেয়াই নহয়, তেওঁ অভিযোগকাৰীৰ পত্নীক আন প্ৰভাৱশালী নেতাসকলৰ শয্যাসংগী হ’বলৈও বাধ্য কৰিছিল।
সেইদৰে, কৰ’নাকালীন পৰিস্থিতিৰ মাজত মহিলাগৰাকীৰ ওপৰত নিৰ্যাতন আৰু বাঢ়ি গৈছিল। প্ৰাক্তন পঞ্চায়ত মুৰব্বীজনে অভিযোগ মতে তেওঁৰ পত্নীয়ে তেওঁক অৰ্জুন সিং চৌহানে কেনেকৈ তেওঁৰ ওপৰত নিৰ্যাতন চলাইছিল সেয়া জনাইছিল। লকডাউনৰ সময়ত বৰ্তমানৰ মন্ত্ৰীগৰাকীয়ে তেওঁক কামৰ নামত মাতি নি প্ৰায়েই তেওঁৰ ঘৰত বন্দী কৰি ৰাখি নিৰন্তৰ যৌন উৎপীড়ন চলাইছিল।
অভিযোগকাৰীৰ ভাষ্য মতে, “সকলোবোৰ জনাৰ পিছত মই মোৰ পত্নীক মন্ত্ৰীগৰাকীৰ বিৰুদ্ধে আৰক্ষীৰ ওচৰত অপৰাধৰ অভিযোগ দাখিল কৰিবলৈ কৈছিলো। কিন্তু তেওঁ সন্মত হোৱা নাছিল। তেওঁ মোক বুজাইছিল যে অৰ্জুন সিং চৌহান ইমান প্ৰভাৱশালী যে আৰক্ষীৰ ওচৰত অভিযোগ কৰিলে গোটেই পৰিয়ালটোৰ ডাঙৰ ক্ষতি হ’ব পাৰে।”
কিন্তু তেওঁৰ পত্নীৰ সৈতে ইমান ডাঙৰ অন্যায় কৰা হোৱা দেখি হালদাৰৱাছ গাঁৱৰ প্ৰাক্তন পঞ্চায়ত মুৰব্বীজন মৌন হৈ থাকিব নোৱাৰিলে। দুমাহ পূৰ্বে তেওঁৰ পত্নীয়ে মন্ত্ৰীগৰাকীৰ ঘৰৰ পৰা পলাই গৈ আন এখন গাঁৱত আশ্ৰয় লয়। তাৰ পিছত তেওঁ পোনে পোনে জিলাখনৰ ডিএছপিগৰাকীৰ ওচৰলৈ যায় আৰু মন্ত্ৰীগৰাকীৰ বিৰুদ্ধে লিখিত অভিযোগ দাখিল কৰে।
উক্ত অভিযোগৰ ভিত্তিত ডিএছপিগৰাকীয়ে মন্ত্ৰীগৰাকীৰ বিৰুদ্ধে তদন্ত কৰা হ’ব বুলি আশ্বাস দিয়ে। বাতৰি অনুসৰি আৰক্ষীয়ে অৰ্জুনসিং চৌহানৰ বিৰুদ্ধে এই গুৰুতৰ অভিযোগৰ তদন্ত কৰিবলৈ প্ৰস্তুতি চলাইছে। অৱশ্যে সংবাদ মাধ্যমে যোগাযোগ কৰিলেও মন্ত্ৰীগৰাকীয়ে কোনো প্ৰতিক্ৰিয়া ব্যক্ত কৰা নাই।
