অৱশেষত কেন্দ্ৰৰ নৰেন্দ্ৰ মোডী নেতৃত্বাধীন এনডিয়ে চৰকাৰে বহু প্ৰত্যাশিত লোকপিয়ল আৰম্ভ কৰিবলৈ ওলাইছে। যদি সকলো ঠিকে থাকে তেন্তে প্ৰায় ১৩ বছৰৰ পাছত অহা মাহৰ পৰা লোকপিয়ল প্ৰক্ৰিয়া আৰম্ভ হ’ব।
জানিব পৰা মতে, গোটেই প্ৰক্ৰিয়াটো প্ৰায় ডেৰ বছৰ ধৰি চলিব। ২০২৬ চনৰ মাৰ্চ মাহৰ ভিতৰত লোকপিয়লৰ প্ৰতিবেদন প্ৰকাশ কৰাৰ লক্ষ্য লৈছে চৰকাৰে।
নিয়ম অনুসৰি প্ৰতি ১০ বছৰৰ মূৰে মূৰে লোকপিয়ল কৰা হয়। কিন্তু ২০১১ চনৰ পিছত দেশত কোনো লোকপিয়ল হোৱা নাছিল। ২০২১ চনত লোকপিয়ল অনুষ্ঠিত হ’ব লাগিছিল যদিও ক’ৰ’না মহামাৰীৰ বাবে স্থগিত ৰখা হৈছিল। ২০২৩ চনত লোকপিয়ল হ’ব পাৰে বুলি শুনা গৈছিল। কিন্তু নিৰ্বাচনৰ পূৰ্বে মোডী চৰকাৰে সেই পথত আগ নাবাঢ়িল।
লগতে পঢ়কঃ ডুৰাণ্ড কাপৰ কোৱাৰ্টাৰত শক্তিশালী ইষ্টবেংগলক হৰুৱাই ছেমি ফাইনেলত শ্বিলং লাজং
মুঠতে মোডীৰ শাসন কালত এটাও লোকপিয়ল হোৱা নাছিল। চৰকাৰৰ ভিতৰতে বিভিন্ন প্ৰশ্ন উত্থাপন হৈছিল। ১৮৭২ চনৰ পৰা আৰম্ভ হোৱা লোকপিয়ল প্ৰতি ১০ বছৰৰ মূৰে মূৰে কৰা হয়। কিন্তু মোডী চৰকাৰ অহাৰ পিছৰে পৰা লোকপিয়ল হোৱা নাই। আৰু তাতেই বিৰোধীয়ে ৰাজনীতিৰ গোন্ধ লৈছে।
অৰ্থনীতিবিদৰ এটা অংশৰ মতে এতিয়ালৈকে মোডী চৰকাৰৰ সকলো কাৰ্যসূচী বা পৰিকল্পনা ২০১১ চনৰ তথ্যৰ ওপৰত ভিত্তি কৰি কৰা হৈছে। ফলত চৰকাৰী বিষয়াসকলো সমস্যাৰ সন্মুখীন হৈছে। তদুপৰি ব্যয় আবণ্টনৰ ক্ষেত্ৰত চৰকাৰে সমস্যাৰ সন্মুখীন হ’বলগীয়া হৈছে। দৰাচলতে চৰকাৰৰ ভিতৰত লোকপিয়লৰ দাবীত হেঁচা বাঢ়ি আহিছিল।
অৱশেষত গৃহ পৰিক্ৰমা মন্ত্ৰালয়ে লোকপিয়ল প্ৰক্ৰিয়া আৰম্ভ কৰিবলৈ ওলাইছে। চৰকাৰী সূত্ৰৰ মতে, প্ৰায় ডেৰ বছৰত ঘৰে ঘৰে গৈ তথ্য সংগ্ৰহ আৰু বিশ্লেষণ সম্পূৰ্ণ কৰাৰ লক্ষ্য লোৱা হৈছে। সেই তথ্য ২০২৬ চনৰ মাৰ্চ মাহত প্ৰকাশ কৰা হ’ব। অর্থাৎ প্রায় ১৫ বছৰৰ পাছত লোকপিয়লৰ তথ্য প্রকাশ পাবলৈ গৈ আছে৷
লগতে পঢ়কঃ নাৰী নিৰ্যাতনত অভিযুক্ত দেশৰ ১৫১গৰাকী সাংসদ-বিধায়ক; ১৬গৰাকীৰ বিৰুদ্ধে আছে ধৰ্ষণৰ গোচৰ
উল্লেখ্য যে যোৱা লোকসভা নিৰ্বাচনত ৰাহুল গান্ধীয়ে জাতিগত পিয়লৰ দাবী উত্থাপন কৰিছিল। যাৰ প্ৰভাৱ পৰিছে হিন্দী মহলত। বিশেষকৈ উত্তৰ প্ৰদেশত বিজেপিয়ে তীব্ৰ আঘাতৰ সন্মুখীন হৈছে। এতিয়াও জাতিগত লোকপিয়লৰ বাবে চাপ দি আছে ৰাহুল গান্ধীয়ে। কিন্তু লোকপিয়লৰ সময়ত চৰকাৰে জাতিৰ কথা উল্লেখ কৰে নে নাই সেয়া লক্ষ্যণীয় হ’ব।
