অসামৰিক সেৱাৰ পৰীক্ষাত নিৰ্বাচিত হোৱাক লৈ বিতৰ্কৰ মাজতে মঙলবাৰে মহাৰাষ্ট্ৰত পৰীক্ষামূলক আই এ এছ বিষয়া পূজা খেড়কাৰৰ প্ৰশিক্ষণ স্থগিত ৰখা হয়। অসামৰিক সেৱাৰ পৰীক্ষাত উত্তীৰ্ণ হ’বলৈ বিশেষ সক্ষমতাৰ প্ৰমাণ পত্ৰ জাল কৰাৰ অভিযোগত তদন্তৰ আওতাত আছে খেডকাৰ।
লাল বাহাদুৰ শাস্ত্ৰী নেচনেল একাডেমী অৱ এডমিনিষ্ট্ৰেচনে (এল বি এছ এন এ এ), মৌছুৰীয়ে এক পত্ৰযোগে পূজা দিলীপ খেড়কাৰৰ প্ৰশিক্ষণ কাৰ্যসূচী স্থগিত ৰখাৰ সিদ্ধান্ত লোৱাৰ লগতে অধিক প্ৰয়োজনীয় ব্যৱস্থা গ্ৰহণৰ বাবে তাৎক্ষণিকভাৱে পুনৰ আহিবলৈ আহ্বান জনাইছে বুলি জানিবলৈ দিয়ে।
১৬ জুলাইৰ এল বি এছ এন এ এৰ আনুষ্ঠানিক জাননী অনুসৰি বৰ্তমান মহাৰাষ্ট্ৰৰ ৱাছিমত ছুপাৰ নিউমেৰী এচিষ্টেণ্ট কলেক্টৰ হিচাপে কৰ্মৰত পূজা খেড়কাৰক মহাৰাষ্ট্ৰৰ প্ৰশিক্ষণৰ কৰ্তব্যৰ পৰা অব্যাহতি দিয়া হৈছে।
তেওঁ যিমান পাৰি সোনকালে একাডেমীলৈ ৰিপৰ্ট দিবলৈ কোৱা হৈছে৷
মহাৰাষ্ট্ৰ কেডাৰৰ ২০২৩ বেচৰ আই এ এছ বিষয়া পূজা খেড়কাৰে পুনে কালেক্টৰৰ কাৰ্যালয়ৰ পৰা বিশেষ বিশেষাধিকাৰ বিচৰা বুলি অভিযোগ উত্থাপন কৰাৰ পিছতে সংবাদ মাধ্যমৰ চকুত পৰিছিল। তাৰ পাছত মহাৰাষ্ট্ৰ চৰকাৰে পুনেৰ পৰা ৱাছিমলৈ বদলি কৰে।
কিন্তু ক্ষমতাৰ অপব্যৱহাৰৰ অভিযোগক লৈ বিতৰ্কৰ ফলত অসামৰিক সেৱাৰ পৰীক্ষাত তেওঁৰ প্ৰচেষ্টাৰ সবিশেষ উন্মোচন হয়। ইউ পি এছ চি নিৰ্বাচনৰ সময়ত বিশেষ ৰেহাই লাভ কৰিবলৈ কেন্দ্ৰীয় লোকসেৱা আয়োগক দাখিল কৰা শপতনামাত তেওঁ আংশিকভাবে দৃষ্টিহীন আৰু মানসিকভাৱে অসুস্থ বুলি দাবী কৰা বুলি প্ৰকাশ পাইছে। পৰীক্ষাত কম নম্বৰ পোৱাৰ পাছতো এই ৰেহাইৰ বাবে পৰীক্ষাত উত্তীৰ্ণ হোৱাটো সম্ভৱ হৈ উঠিছিল, আৰু অল ইণ্ডিয়া ৰেংক (এআইআৰ) ৮২১ লাভ কৰিছিল।তেওঁ দাখিল কৰা প্ৰমাণ পত্ৰৰ সত্যতা তদন্তৰ অধীনত আছে।
