কংগ্ৰেছ নেতা ৰাহুল গান্ধীয়ে অসমত চলি থকা অবাধ দুৰ্নীতিৰ বাবে অসমৰ মুখ্যমন্ত্ৰী হিমন্ত বিশ্ব শৰ্মাক তীব্ৰ সমালোচনা কৰে। তেওঁ পুনৰ কয় যে শৰ্মা ভাৰতৰ আটাইতকৈ দুৰ্নীতিগ্ৰস্ত মুখ্যমন্ত্ৰী।
ভাৰতীয় জনতা পাৰ্টিৰ সৈতে একে সুৰ বজোৱাৰ বাবে অল ইণ্ডিয়া ইউনাইটেড ডেম’ক্ৰেটিক ফ্ৰণ্টৰ সভাপতি তথা অসমৰ বাবে জমিয়ত উলামা-ই-হিন্দৰ ৰাজ্যিক সভাপতি মৌলানা বদৰুদ্দিন আজমলকো গান্ধীয়ে লক্ষ্য কৰি লয়।
বুধবাৰে ধুবুৰীত এক বিশাল ৰাজহুৱা সভাত ভাষণ দি গান্ধীয়ে ৰাইজৰ আগত কয় যে ৰাজ্যৰ মানুহে ব্যৱহাৰ আৰু খোৱা সকলো বস্তুতে অসমৰ মুখ্যমন্ত্ৰীৰ অংশ আছে। আনকি কাজিৰঙা ৰাষ্ট্ৰীয় উদ্যান ভ্ৰমণ কৰিলেও শৰ্মা উপকৃত হয়, কিয়নো তেওঁ তাত ৰিজৰ্ট নিৰ্মাণ কৰিছে।
লগতে পঢ়কঃ অক্লান্ত যোদ্ধা! অলিম্পিক পদক বিজয়ী তথা ছয়বাৰৰ বিশ্ব চেম্পিয়ন বক্সাৰ মেৰী কমে ল’লে অৱসৰ
তেওঁ ৰাইজক উদ্দেশি কয় যে যেতিয়া তেওঁলোকে ৰাতিপুৱা উঠি চাহ খায় আৰু ঠিক দিনটোৰ শেষত যেতিয়া তেওঁলোকে হয়তো তামোল-পান চোবায়, সেই সকলোতে শৰ্মাৰ অংশ থাকে। আনকি মানুহে চোৱা টেলিভিছন চেনেল আৰু তেওঁলোকে পঢ়া বাতৰি কাকততো তেওঁৰ অংশীদাৰিত্ব আছে বুলি কংগ্ৰেছ নেতাগৰাকীয়ে লগতে কয়। তেওঁ লগতে মুখ্যমন্ত্ৰীৰ ব্যাপক আৰ্থিক স্বাৰ্থৰ কথাও উল্লেখ কৰে।
গান্ধীয়ে কয়, শৰ্মাৰ অধীনত ৰাজ্যখনত চলি থকা অবাধ আৰু ব্যাপক দুৰ্নীতিৰ বাবে অসমত হৈ থকা অন্যায়ৰ বিৰোধী এই ন্যায় যাত্ৰা। তেওঁ কয় যে, ৰাজ্যত দুৰ্নীতি আৰু ব্যাপক নিবনুৱা সমস্যাৰ বাবে ইতিমধ্যে মানুহ বিৰক্ত হৈ পৰিছে।
কংগ্ৰেছৰ প্ৰাক্তন সভাপতিগৰাকীয়ে এআইইউডিএফৰ বদৰুদ্দিন আজমলক কটাক্ষ কৰি তেওঁৰ দল বিজেপিৰ বি টিম বুলিও অভিহিত কৰে।
লগতে পঢ়কঃ পুৱাৰ খোজকঢ়াৰ অভ্যাস আপোনাৰ বাবে মহৌষধ: জানেনে ইয়াৰ গুণাগুণ?
তেওঁ ৰাইজক সকীয়াই দিয়ে যে এআইইউডিএফক ভোট দিয়া বা সমৰ্থন কৰাৰ অৰ্থ হ’ব বিজেপিক সমৰ্থন কৰা। তেওঁ বিশেষভাৱে স্পষ্ট কৰি দিয়ে যে এআইইউডিএফ বা বিজেপিৰ সৈতে কংগ্ৰেছৰ কোনো সম্পৰ্ক নাই কাৰণ তেওঁলোক একেটা মুদ্ৰাৰ ইপিঠি-সিপিঠি।
তেওঁ কয়, আজমলে অসমৰ মুখ্যমন্ত্রীয়ে বিচৰা কামহে কৰে৷ তেওঁ প্ৰায় স্পষ্ট কৰি দিয়ে যে কোনো আপোচ নহ’ব, বিজেপিৰ সৈতেও নহয়, আজমলৰ সৈতেও নহয়।
