Maharashtra assembly speaker polls মহাৰাষ্ট্ৰ বিধানসভাত আজি নতুন অধ্যক্ষর বাবে নিৰ্বাচন অনুষ্ঠিত হয়। মহাৰাষ্ট্ৰত ক্ষমতা দখল কৰাৰ পিছত একনাথ সিন্দে আজি তেওঁৰ প্ৰথমটো প্ৰত্যাহ্বানত জয়লাভ কৰিবলৈ সক্ষম হৈছে। বিজেপি বিধায়ক ৰাহুল নৰ্ৱেকাৰ মহাৰাষ্ট্ৰ বিধানসভাৰ নতুন অধ্যক্ষ হিচাপে নিৰ্বাচিত হৈছে।
আজি অনুষ্ঠিত মহাৰাষ্ট্ৰ বিধানসভাৰ অধ্যক্ষ নিৰ্বাচনত বিৰোধী প্ৰাৰ্থীয়ে ১০৭ টা ভোট লাভ কৰে। ৰাহুল নৰ্ৱেকাৰে ১৬৪ টা ভোট লাভ কৰি মহাৰাষ্ট্ৰ বিধানসভাৰ অধ্যক্ষ নিৰ্বাচিত হয়।
শিৱসেনাৰ নেতা আদিত্য ঠাকৰেৰ ঘনিষ্ঠ ৰাহুল নৰ্ৱেকাৰ এইবাৰ বিজেপিৰ পৰা প্ৰতিদ্বন্দ্বিতা কৰি প্ৰথমবাৰৰ বাবে বিধায়ক হৈছিল।
মহাৰাষ্ট্ৰ বিধানসভাৰ অধ্যক্ষ নিৰ্বাচনত আজি এআইএমআইএম আৰু সমাজবাদী পাৰ্টীয়ে ভোটদানৰ পৰা বিৰত থাকে।
সম্পূৰ্ণ প্ৰত্যাশিতভাৱেই মহাৰাষ্ট্ৰ বিধানসভাত আজি কোনো আচৰিত ঘটনা দেখা পোৱা নগ’ল। বিজেপিৰ ৰাহুল নৰ্ৱেকাৰে ১৬৪ টা ভোটলাভ কৰি বিধানসভাৰ অধ্যক্ষ নিৰ্বাচিত হোৱাৰ লগে লগে একনাথ সিন্দেৰ বাবে কাইলৈ আস্থা ভোটৰ অংক একেবাৰে সহজ হৈ পৰিল।