জম্মু আৰু কাশ্মীৰত আৰ্টিকল ৩৭০ বাতিলৰ পিছতে নাগালেণ্ডতো আৰ্টিকল ৩৭১এৰ ভৱিষ্যতক লৈ সৃষ্টি হোৱা আশংকাৰ মাজতে ৰাজ্যপাল আৰ এন ৰৱিয়ে মঙলবাৰে এক বিবৃতিযোগে ৰাইজক এই বিষয়ত অলপো উদ্বিগ্ন নহ’বলৈ আহ্বান জনাইছে।
“মৰমৰ ভাই-ককাই, ভনী-বাই আৰু নাগালেণ্ডৰ শিশুসকল। কিছুমান লোকে জম্মু আৰু কাশ্মীৰৰ ঘটনাৱলীৱে নাগালেণ্ডৰ ওপৰত পেলাব পৰা প্ৰভাৱ সম্পৰ্কে আশংকা প্ৰকাশ কৰিছে,” নৱনিযুক্ত ৰাজ্যপালজনে কয়।
“মই আপোনালোক সকলোকে খাটাং আশ্বাস দিব খোজো যে আপোনালোকে এই লৈ উদ্বিগ্ন হোৱাৰ কোনো সকাম নাই। আৰ্টিকল ৩৭১এ নাগালেণ্ডৰ ৰাইজৰ প্ৰতি এক গহীন প্ৰতিশ্ৰুতি। ই এক পবিত্ৰ প্ৰতিশ্ৰুতি। এক খুব আগশাৰীৰ অৱস্থাত চলিত ৰাজনৈতিক প্ৰক্ৰিয়াটো সামৰণি মাৰিবলৈ আমি খুব কঠিন চেষ্টা কৰি আছো,” ৰৱিয়ে বিবৃতিত কয়।
এইটো ইয়াতে উল্লেখ কৰিব পাৰি যে, সোমবাৰে কেন্দ্ৰই কাশ্মীৰৰ ক্ষেত্ৰত আৰ্টিকল ৩৭০ উঠাই লোৱাৰ দৰেই নাগালেণ্ডতো ৩৭১এ উঠাব পাৰে এক আশংকা সৃষ্টি হৈছিল।
দেশৰ প্ৰাক্তন উপ ৰাষ্ট্ৰীয় নিৰাপত্তা উপদেষ্টা আৰু নাগা শান্তি আলোচনাত কেন্দ্ৰৰ প্ৰতিনিধি ৰৱি যোৱা ১ আগষ্টত নাগালেণ্ডৰ ৰাজ্যপালৰূপে যোগ দিছে। ৰৱিয়ে পি বি আচাৰ্য্যৰ স্থান লৈছে।
ৰাজ্যপালৰূপে যোগ দিয়াৰ পিছত ৰৱিয়ে কৈছিল যে, ভাৰত চৰকাৰে নাগা শান্তি আলোচনাটো যিমান পাৰি সোনকালে শেষ কৰিব খোজে।
