মধ্যবিত্ত শ্ৰেণীৰ সস্তাৰ ঋণৰ অপেক্ষাত সদ্যহতে চেঁচা পানী ঢালিলে দেশৰ ৰিজাৰ্ভ বেংকে। জুন মাহৰ মুদ্ৰানীতিৰ বৈঠকৰ শেষত ভাৰতীয় ৰিজাৰ্ভ বেংকে ৰেপো ৰেট সলনি নকৰাৰ সিদ্ধান্ত ঘোষণা কৰে। ফলত বৰ্তমান দেশত ৰেপো হাৰ অপৰিৱৰ্তিত হৈ আছে ৫.২৫ শতাংশতে। বুধবাৰৰ পৰা (৩ জুন) আৰম্ভ হোৱা ভাৰতীয় ৰিজাৰ্ভ বেংকৰ মুদ্ৰানীতি সমিতিৰ তিনিদিনীয়া বৈঠক আজি শুকুৰবাৰে (৫ জুন) সমাপ্ত হয়।
সাধাৰণ মানুহৰ মনত এটা প্ৰশ্ন উত্থাপন হ’ব পাৰে, এই ৰেপ’ ৰেট কি আৰু সাধাৰণ মানুহৰ পকেটৰ সৈতে ইয়াৰ কি সম্পৰ্ক? সহজ ভাষাত ক’বলৈ গ’লে ৰেপো ৰেট হৈছে এক প্ৰকাৰৰ সুতৰ হাৰ, য’ত আৰ বি আইয়ে দেশৰ বিভিন্ন বাণিজ্যিক বেংকক ধন ধাৰে দিয়ে। ফলত যদি ৰেপো ৰেট কমি যায় তেন্তে কম সুতৰ হাৰত বাণিজ্যিক বেংকসমূহেও ধন লাভ কৰে আৰু গ্ৰাহকৰ গৃহ ঋণ বা গাড়ী ঋণৰ দৰে বিভিন্ন ঋণৰ সুতৰ হাৰ বা ই এম আই হ্ৰাস পোৱাৰ সম্ভাৱনা থাকে।
কিন্তু যিহেতু জুন মাহৰ বৈঠকত সুতৰ হাৰ অপৰিৱৰ্তিত ৰখা হৈছে, সেয়েহে বজাৰ বিশেষজ্ঞৰ মতে জনসাধাৰণৰ বাবে ঋণৰ মাহিলী কিস্তি আপাততঃ হ্ৰাস পোৱাৰ কোনো লক্ষণ দেখা যোৱা নাই।
মন কৰিবলগীয়া যে ২০২৫ চনৰ আৰম্ভণিৰে পৰা ৰিজাৰ্ভ বেংকে দেশৰ বজাৰত সুতৰ হাৰ ধাৰাবাহিকভাৱে হ্ৰাস কৰি আহিছে।২০২৫ চনৰ ফেব্ৰুৱাৰী মাহত দেশৰ ৰেপো ৰেট আছিল ৬.৫০ শতাংশ। তাৰ পাছত দেশৰ অৰ্থনৈতিক অৱস্থাৰ কথা মনত ৰাখি একাধিক পৰ্যায়ত মুঠ ১২৫ বেচিছ পইণ্ট বা ১.২৫ শতাংশ সুতৰ হাৰ হ্ৰাস কৰা হ’ল। যাৰ বাবে ২০২৫ চনৰ শেষলৈকে ৰেপ’ ৰেট ৫.২৫ শতাংশলৈ হ্ৰাস পায়।
২০২৫ চনত একেৰাহে ৰেহাই দিয়াৰ পিছতো ২০২৬ চনত ৰিজাৰ্ভ বেংকে সম্পূৰ্ণ বিপৰীত পথ গ্ৰহণ কৰিছে। এই বছৰৰ ফেব্ৰুৱাৰী আৰু এপ্ৰিলৰ পিছত এইবাৰ জুন মাহত আৰ বি আইয়ে একেৰাহে তিনিখন মুদ্ৰানীতিৰ বৈঠকত সুতৰ হাৰ কৰ্তন কৰা নাই।
অৰ্থনৈতিক বিশেষজ্ঞৰ এটা অংশৰ মতে, যদিও এই মুহূৰ্তত দেশৰ মুদ্ৰাস্ফীতি নিয়ন্ত্ৰণত আছে, তথাপিও আন্তঃৰাষ্ট্ৰীয় পৰ্যায়ত ভূ-ৰাজনৈতিক অস্থিৰতা আৰু বিশ্ব বজাৰত ইন্ধনৰ মূল্যৰ অনিশ্চয়তাৰ বাবে ৰিজাৰ্ভ বেংক চিন্তিত হৈ পৰিছে। আৰু সেইবাবেই গৱৰ্ণৰ সঞ্জয় মালহোত্ৰাই কোনো খৰখেদা নকৰাকৈ সদ্যহতে অতি সতৰ্ক স্থিতি অক্ষুণ্ণ ৰাখিছে।
