নগাঁও জিলাৰ পুৰণিগুদাম আৰক্ষী চকীৰ অধীনৰ চলচলি নলবৰা গাঁৱত আজি বিয়লি প্ৰায় তিনি বজাত হোৱা এক শোকাবহ পথ দুৰ্ঘটনাত পতিত হৈ জীৱন গায়ন (৫৫) নামৰ এজন লোকৰ মৃত্যু হয়।
জানিব পৰা মতে, পুৰণিগুদাম চলচলি পথেৰে চাইকেলেৰে পুৰণিগুদাম দিশে গৈ থকা অৱস্থাত বিপৰীত দিশৰ পৰা অহা এ.এচ. ০২বি.চি. ০৮৯২ নম্বৰৰ এখন তীব্ৰ বেগী ডাম্পাৰে লোকজনক খুন্দা মাৰে।
ডাম্পাৰখন লোকজনৰ ওপৰেৰে পাৰ হৈ যোৱাৰ বাবে লোকজন গুৰুতৰভাৱে আহত হয়।
দুৰ্ঘটনা সংঘটিত হোৱাৰ পিছতে স্থানীয় লোকে পৰিয়ালৰ সহযোগত গুৰুতৰভাৱে আহত লোকজনক সংকটজনক অৱস্থাত নগাঁও ভোগেশ্বৰী ফুকননী অসামৰিক চিকিৎসালয়ত ভৰ্তি কৰে।
কিন্তু চিকিৎসালয়তে লোকজনৰ মৃত্যু হয়।
স্থানীয় মুঢ়ানি গাঁৱৰ বাসিন্দা জীৱন গায়নৰ মৃত্যুত সমগ্ৰ পুৰণিগুদাম অঞ্চলত শোকৰ ছাঁ পৰিছে।
বামুনী চাপানালা পথ নিৰ্মাণৰ বাবে সামগ্ৰী কঢ়িয়াই নিয়া ডাম্পাৰখনৰ চালকজনৰ ভুলৰ বাবেই লোকজনে অকালতে মৃত্যুক সাৱটি লব লগা হয় বুলি একাংশ স্থানীয় লোকে অভিযোগ উত্থাপন কৰিছে।
