দুগৰাকী ছাত্ৰ-ছাত্ৰীকে ধৰি কমেও আঠজন লোকে যোৱা ২৪ ঘণ্টাত অসমৰ বিভিন্ন ঠাইত সংঘটিত পথ দুৰ্ঘটনাত প্ৰাণ হেৰুৱাইছে।
তেজপুৰ, মৰিগাওঁ, ধুবুৰী আদি কেইবাখনো ঠাইত এই দুৰ্ঘটনাসমূহ সংঘটিত হৈছে।
ৰাজ্যত নতুন বছৰটোৰ প্ৰথমটো ভয়াৱহ বৃহৎ দুৰ্ঘটনা সংঘটিত হৈছে শনিবাৰে সন্ধিয়া মৰিগাঁৱৰ মৈৰাবাৰীত। এখন ট্ৰাকৰ খুন্দাত পাঁচজন লোকৰ মৃত্যু ঘটিছে।
দুৰ্ঘটনাটোত ওচমান আলি, ৱাহিদুৰ ৰহমান আৰু মজিবুৰ ৰহমান নামৰ তিনিজনৰ ঠাইতে মৃত্যু হোৱাৰ বিপৰীতে নেকিবুৰ ৰহমান আৰু জয়নাল আবেদিন নামৰ দুজনে চিকিৎসালয়লৈ নিয়া অৱস্থাতে প্ৰাণ হেৰুৱায়।
আহত গোলাম হুছেইন নামৰ আন এজনে বৰ্তমান চিকিৎসালয়ত মৃত্যুৰ সৈতে যুঁজি আছে।
“এই লোককেইজন এখন Celerio গাড়ীত বহি আছিল। ৪০৭ ট্ৰাক এখনে গাড়ীখন মহতিয়াই নিয়ে,” মৈৰাবাৰী আৰক্ষী থানাৰ ভাৰপ্ৰাপ্ত বিষয়া অজিত বড়োৱে কয়।
দেওবাৰে পুৱা তেজপুৰত সংঘটিত আন এক দুৰ্ঘটনাত একেটা পৰিয়ালৰ তিনি বাই-ভনীৰ এগৰাকীৰ প্ৰাণ কাঢ়ি নিছে। দুগৰাকী গুৰুতৰভাৱে জখম হৈছে।
নিহত অঞ্জলি ৰায় তেজপুৰ কলেজৰ ছাত্ৰী আছিল, আহত দুগৰাকী তেওঁৰ ভনীয়েক খুচবু ৰায় আৰু প্ৰিয়ংকা ৰায়।
এন চি চিয়ে আয়োজন কৰা এক চাইকেল ৰেলিত গৈ থকা অৱস্থাত কলিয়াভোমোৰা দলঙৰ সমীপত এখন বলেৰ’ ট্ৰাকে তেওঁলোকক মহতিয়াই নিয়ে।
দৰং কলেজৰ পৰা কাজিৰঙা অভিমুখে ৰেলিটো গৈ আছিল।
আহত দুগৰাকীক তেজপুৰৰ কনকলতা অসামৰিক চিকিৎসালয়ত ভৰ্তি কৰোৱা হৈছে। তেওঁলোকৰ ঘৰ তেজপুৰ গাৰোৱানপট্টিত।
একেদিনাই তেজপুৰতে সংঘটিত আন এক দুৰ্ঘটনাত পল্লৱ শইকীয়া নামৰ এজন অভিযান্ত্ৰিকৰ ছাত্ৰ নিহত হৈছে। গুৰুতৰভাৱে আহত টিংকু ডেকা নামৰ আনজনক চিকিৎসালয়ত ভৰ্তি কৰোৱা হৈছে।
ঘটনাৰ বিৱৰণীমতে তেজপুৰৰ বামপৰ্বতীয়াত পল্লৱৰ বাইকখনে টিংকুৰ স্কুটিত মুখামুখিকৈ খুন্দা মৰাৰ ফলত দুৰ্ঘটনাটো সংঘটিত হয়।
একেদিনাই মৰিগাঁৱত সংঘটিত আন এক পথ দুৰ্ঘটনাত এজন ট্ৰেক্তৰ চালক ঠাইতে নিহত হৈছে। ব্যক্তিজনৰ পৰিচয় এতিয়াও জানিব পৰা হোৱা নাই।
ঘটনাৰ বিৱৰণমতে, তেওঁ চলাই যোৱা মাটি পৰিবাহী ট্ৰেক্তৰখন নিয়ন্ত্ৰণ হেৰুৱাই চাৰণ বিলত বাগৰি পৰে আৰু তেওঁৰ ঘটনাস্থলীতে মৃত্যু হয়।
ধুবুৰী জিলাৰ গৌৰীপুৰত একেদিনাই সংঘটিত আন এক পথ দুৰ্ঘটনাত সাতজন লোক কম বেছি পৰিমাণে আঘাতপ্ৰাপ্ত হৈছে। ঘটনাটোৰ সবিশেষ এতিয়াও জানিব পৰা হোৱা নাই।
ইফালে দেওবাৰে পুৱাই গোৱালপাৰা জিলাৰ লক্ষীপুৰৰ ফলিমাৰীৰ সমীপৰ নৈত কাঠৰ দলং ভাগি পশ্চিম বংগৰ এখন মালবাহী দহচকীয়া ট্ৰাক (No. WB3C-7679) বাগৰি পৰিছে।
ট্ৰাকৰ চালক-কৰ্মচাৰী ঘটনাস্থলীৰ পৰা পলায়ন কৰিছে। কোনো হতাহতৰ বাতৰি পোৱা হোৱা নাই।
