আমেৰিকা যুক্তৰাষ্ট্ৰৰ এখন বিশেষ শুনানিত ভাৰতৰ তিনিগৰাকী মুখ্যমন্ত্ৰীৰ বিৰুদ্ধে একাংশ মানৱ অধিকাৰ কৰ্মী আৰু আন্তঃৰাষ্ট্ৰীয় অধিবক্তাই সৰৱ হৈ পৰিছে। আমেৰিকাৰ আন্তঃৰাষ্ট্ৰীয় ধৰ্মীয় স্বাধীনতা সম্পৰ্কীয় আয়োগৰ এই শুনানিত অসমৰ মুখ্যমন্ত্ৰী হিমন্ত বিশ্ব শৰ্মা, উত্তৰপ্ৰদেশৰ মুখ্যমন্ত্ৰী যোগী আদিত্যনাথ আৰু উত্তৰাখণ্ডৰ মুখ্যমন্ত্ৰী পুষ্কৰসিং ধামীৰ বিৰুদ্ধে কেতবোৰ গুৰুতৰ অভিযোগ উত্থাপন কৰা হৈছে। হিউমেন ৰাইটছ ৱাচ আৰু এমনেষ্টি ইণ্টাৰনেচনেলৰ দৰে সংস্থাৰ প্ৰতিনিধিসকলৰ লগতে কিছুসংখ্যক ভাৰতীয়-আমেৰিকীয় মানৱ অধিকাৰ কৰ্মীয়েও এই শুনানিত অংশ লৈ তিনিওগৰাকী মুখ্যমন্ত্ৰীৰ ওপৰত আমেৰিকাত নিষেধাজ্ঞা আৰোপ কৰিবলৈ দাবী জনাইছে।
শুনানিত অসমৰ মুখ্যমন্ত্ৰী হিমন্ত বিশ্ব শৰ্মাৰ বিৰুদ্ধে অভিযোগ কৰা হৈছে যে ৰাজ্যখনত চলোৱা উচ্ছেদ অভিযানসমূহৰ জৰিয়তে এক বিশেষ ধৰ্মীয় সংখ্যালঘু সম্প্ৰদায়ক লক্ষ্য কৰি লোৱা হৈছে। ইয়াৰ উপৰিও তেওঁৰ বিভিন্ন ৰাজহুৱা ভাষণত ডেম’গ্ৰাফী সলনি হোৱা বা মিঞা সমাজক লৈ কৰা মন্তব্যই ধৰ্মীয় মেৰুকৰণ আৰু উত্তেজনা বৃদ্ধি কৰিছে বুলি দাবী কৰা হৈছে। আনহাতে, উত্তৰ প্ৰদেশৰ মুখ্যমন্ত্ৰী যোগী আদিত্যনাথৰ বিৰুদ্ধে কোনো আইনী প্ৰক্ৰিয়া নোহোৱাকৈ কেৱল অভিযোগৰ ভিত্তিত বুলডজাৰৰে ঘৰ ভাঙি দিয়া কাৰ্য্যক মানৱ অধিকাৰ উলংঘন বুলি কোৱা হৈছে। লগতে ৰাজ্যখনৰ ধৰ্মান্তৰকৰণ বিৰোধী আইনখন সংখ্যালঘু আৰু আন্তঃধৰ্মীয় বিবাহ কৰা দম্পত্তিসকলক হাৰাশাস্তি কৰিবলৈ ব্যৱহাৰ কৰাৰ অভিযোগ উঠিছে। উত্তৰাখণ্ডৰ মুখ্যমন্ত্ৰী পুষ্কৰ সিং ধামীৰ বিৰুদ্ধেও ইউনিফৰ্ম চিভিল ক’ডৰ জৰিয়তে জনজাতীয় আৰু সংখ্যালঘুৰ অধিকাৰ ক্ষুণ্ণ কৰা আৰু পুৰণি মাজাৰ বা ধৰ্মীয় স্থানসমূহ অবৈধ বুলি উচ্ছেদ কৰাৰ অভিযোগ উত্থাপন কৰা হৈছে যাক তেওঁলোকে ধৰ্মীয় বৈষম্য বুলি অভিহিত কৰিছে।
এই অধিবক্তা আৰু মানৱ অধিকাৰ কৰ্মীসকলে আমেৰিকা চৰকাৰক দাবী জনাইছে যে এই তিনিগৰাকী নেতাক গ্ল’বেল মেগনিটস্কি এক্টৰ অধীনত বিশেষভাৱে চিন্তাজনক ব্যক্তি হিচাপে ঘোষণা কৰি তেওঁলোকৰ আমেৰিকা ভ্ৰমণ আৰু সম্পত্তিৰ ওপৰত নিষেধাজ্ঞা লগাব লাগে। ইয়াৰ মাজতে ছচিয়েল মিডিয়াত এটা উৰা বাতৰি বিয়পি পৰিছিল যে আমেৰিকাৰ চৰকাৰী পেনেলে নিজেই এই নিষেধাজ্ঞা লগাবলৈ পৰামৰ্শ দিছে, কিন্তু এই দাবী সম্পূৰ্ণ মিছা। পেনেলে নিজাকৈ মুখ্যমন্ত্ৰীসকলৰ বিৰুদ্ধে কোনো অফিচিয়েল পৰামৰ্শ দিয়া নাই, তেওঁলোকৰ লক্ষ্য আছিল মূলতঃ আৰ এছ এছ আৰু ভাৰতীয় চোৰাংচোৱা সংস্থা ৰ’ৰ সৈতে জড়িত কিছুমান বিশেষ বিষয়হে। এই নিষেধাজ্ঞা জাপি দিয়াৰ দাবীটো কেৱল বাহিৰৰ অধিকাৰ কৰ্মীসকলেহে উত্থাপন কৰিছিল আৰু বৰ্তমানলৈকে আমেৰিকা চৰকাৰে ভাৰতৰ কোনো মুখ্যমন্ত্ৰীৰ ওপৰত কোনো ধৰণৰ নিষেধাজ্ঞা লগোৱা নাই।
এই বাতৰি প্ৰকাশ পোৱাৰ লগে লগে ভাৰতৰ ৰাজনৈতিক মহলত তীব্ৰ প্ৰতিক্ৰিয়াৰ সৃষ্টি হৈছে। আমেৰিকাৰ মাটিত ভাৰতৰ নিৰ্বাচিত মুখ্যমন্ত্ৰীসকলৰ নাম সাঙুৰি এনেদৰে আলোচনা হোৱাটোক লৈ নতুন দিল্লীত অসন্তুষ্টিৰ সৃষ্টি হৈছে। ভাৰত চৰকাৰে আগৰে পৰাই এনে পদক্ষেপক পক্ষপাতদুষ্ট আৰু ভাৰতৰ আভ্যন্তৰীণ বিষয়ত হস্তক্ষেপ বুলি কৈ ইয়াক সম্পূৰ্ণৰূপে নাকচ কৰি আহিছে।
