যুদ্ধোন্মাদ ৰাছিয়াত থকা বিদেশী নাগৰিক সকলক ৰাছিয়াৰ হৈ যুদ্ধ কৰিবলৈ বাধ্য কৰাইছে ৰাছিয়াৰ চৰকাৰে। বিভিন্ন দেশৰ পৰা গৈ ৰাছিয়াত থকা নাগৰিক সকল অনিচ্ছুক হৈও ৰাছিয়াৰ চৰকাৰৰ নিৰ্দেশ অনুসৰি যুদ্ধত নামিবলৈ বাধ্য হৈ পৰিছে।
ৰাছিয়াত যুদ্ধ কৰিবলৈ বাধ্য হোৱা ৭ জন ভাৰতীয়ই চৰকাৰৰ সহায় বিচাৰিছে। তেওঁলোকে চলিত সপ্তাহত দুটাকৈ ভিডিঅ’ মুকলি কৰিছে, ভিডিঅ’ৰ যোগে তেওঁলোকে তেওঁলোকক ৰাছিয়াৰ পৰা স্বদেশলৈ ঘূৰাই আনিবলৈ ভাৰত চৰকাৰৰ সহায় বিচাৰিছে। জানিব পৰা মতে, তেওঁলোক ৰাছিয়া-ইউক্ৰেইন সীমান্তত আৱদ্ধ হৈ আছে।
ৰাছিয়াত আৱদ্ধ হৈ থকা ৭ গৰাকী ভাৰতীয় হৈছে – গগনদীপ সিং (২৪), লাভপ্ৰীত সিং (২৪), নৰেইন সিং (২২), গুৰপ্ৰীত সিং (২১), গুৰপ্ৰীত সিং (২৩), হৰ্ষ কুমাৰ (২০) আৰু অভিষেক কুমাৰ (২১)। ইয়াৰে পাঁচজন শ্ৰমিক পঞ্জাৱৰ আৰু দুজন হাৰিয়ানাৰ।
এজন লোকে কয় যে তেওঁলোক পৰ্যটন ভিছাত ৰাছিয়াত উপস্থিত হৈছিল আৰু আৰক্ষীয়ে তেওঁলোকক “স্লিপ” নথকাৰ বাবে আটক কৰাৰ পিছত ৰাছিয়ান সেনাবাহিনীত “সহায়ক” হিচাপে যোগদান কৰিবলৈ বাধ্য কৰিছিল।
লোককেইজনে অভিযোগ কৰে যে আৰক্ষীয়ে তেওঁলোকক ৰাছিয়ান সেনাবাহিনীত যোগদান কৰিবলৈ বাধ্য কৰাইছিল নহ’লে ১০ বছৰৰ কাৰাদণ্ডৰ সন্মুখীন হ’ব বুলি ভাবুকি প্ৰদান কৰিছিল।
‘আমাক কোৱা হৈছিল যে আমি কেৱল সহায়ক হিচাপে কাম কৰিব লাগিব। কিন্তু তেওঁলোকে আমাক অস্ত্ৰ আৰু গোলাবাৰুদৰ প্ৰশিক্ষণৰ দি ইউক্ৰেইনলৈ পঠিয়াবলৈ সাজু হৈছে। তেওঁলোকে আমাক বাধ্য কৰিবৰ বাবে ভোকত ৰাখিছিল আৰু আমাৰ ফোন কাঢ়ি লৈ গৈছিল।’ -পাঞ্জাবী ভাষা কোৱা এজন লোকে ৩ মাৰ্চত এটা ভিডিঅ’ত এইদৰে কয়।
তেওঁ লগতে কয় যে ৰাছিয়ানসকলক তেওঁলোকে সহায় কৰিবৰ বাবে বাৰে বাৰে অনুৰোধ জনোৱাৰ পিছতো কোনো সুফল লাভ কৰা নাই।
“ৰাছিয়ান সেনাই আমাক কয় যে আমি এবছৰৰ পিছতহে যাব পাৰিম। তেওঁলোকে আমাক যুদ্ধত জয়ী হোৱাত সহায় কৰিবলৈ কৈছে। আমি তেওঁলোকক কেনেকৈ সহায় কৰিব পাৰো নাজানো৷ যদি আমি নকৰোঁ তেন্তে হয়তো আমি বাচি নাথাকো।’ -২০ বছৰীয়া অভিষেক কুমাৰে এইদৰে কয়।
এজন শ্ৰমিকে হিন্দীত কৈছে: “আমি আগতেও আপোনালোকক আমাৰ দুৰ্দশাৰ বিষয়ে অৱগত কৰিছিলোঁ। ইউক্ৰেইন বা ৰাছিয়াত আবদ্ধ হৈ আছে বহু ভাৰতীয়। ভাৰতীয় দূতাবাস আৰু ভাৰত চৰকাৰক আমাক সহায় কৰিবলৈ অনুৰোধ জনাইছোঁ। এইটো আমাৰ শেষ ভিডিঅ’ হ’ব পাৰে, তেওঁলোকে আমাক ইউক্ৰেইনৰ যুদ্ধক্ষেত্ৰলৈ পঠিয়াইছে।”
ইয়াৰ পূৰ্বে প্ৰকাশিত আন এটা বাতৰি অনুসৰি তিনিজন ভাৰতীয়ই ৰাছিয়া-ইউক্ৰেইন সীমান্তত দেশখনৰ বাহিনীৰ সৈতে যুঁজিবলৈ বাধ্য হৈছিল। বিগত এবছৰত প্ৰায় ১০০ জন ভাৰতীয়ক ৰাছিয়ান সেনাই নিযুক্তি দিছে বুলি সূত্ৰই দাবী কৰিছে।
