কৃষক মুক্তি সংগ্ৰাম সমিতিৰ উপদেষ্টা অখিল গগৈসহ সকলো ‘কা’ বিৰোধী কাৰাবন্দীৰ মুক্তিৰ দাবীত কেইবাটাও জাতীয় সংগঠনে আজি মুখ্য মন্ত্ৰী সৰ্বানন্দ সোণোৱাললৈ এখন স্মাৰকপত্ৰ প্ৰেৰণ কৰে।
স্মাৰকপত্ৰৰ জৰিয়তে সংগঠনকেইটাই ক’ৰ’না ভাইৰাছে মানুহৰ জীৱনলৈ কঢ়িয়াই অনা গভীৰ সংকটৰ সময়ত ‘মানৱীয় দৃষ্টিকোণেৰে আৰু স্বাভিমানী জনতাৰ দাবীক সন্মান জনাই’ ‘কা’ বিৰোধী সকলো কাৰাৰুদ্ধ নেতাক শীঘ্ৰে মুকলি কৰি দিবলৈ দাবী জনায়।
পত্ৰখনত তেওঁলোকে উচ্চতম ন্যায়ালয়ে ‘ক’ৰ’নাৰ ভয়াৱহতাৰ প্ৰতি লক্ষ্য কৰি বহু ৰাজনৈতিক তথা ক্ষমাৰ যোগ্য বন্দীক কাৰাগাৰৰ পৰা জামিনত মুক্তি দিয়াৰ পোষকতা’ কৰাৰ কথা উল্লেখ কৰে।
উল্লেখযোগ্য যে ‘কেব’ আৰু পৰৱৰ্তী সময়ত ‘কা’ বিৰোধী আন্দোলনক সন্মুখৰ পৰা নেতৃত্ব দিয়া অখিল গগৈক ২০১৯ চনৰ ১২ ডিচেম্বৰত যোৰহাট আৰক্ষী আৰু পৰৱৰ্তী সময়ত নিয়া আৰু বিভিন্ন জিলাৰ আৰক্ষীয়ে তেওঁৰ লগতে কৃষক মুক্তি, ছাত্ৰ মুক্তি আৰু অন্যান্য সংগঠনৰ বহু ‘কা’ বিৰোধী নেতাক কাৰাৰুদ্ধ কৰি ৰাখে।
‘ভাৰতীয় সংবিধানৰ প্ৰতি সন্মান প্ৰদৰ্শন কৰি গণতান্ত্ৰিকভাৱে আন্দোলন কৰা প্ৰতিবাদীক চৰকাৰে এনে দমনমূলক নীতিৰে কাৰাগৰতে আৱদ্ধ কৰি ৰখাটো এক অন্যায় হৈছে। গণতান্ত্ৰিক দেশ এখনত ৰাইজৰ হকে মাত মতাটো অপৰাধ নহয়।‘ স্মাৰকপত্ৰত তেওঁলোকে কয়।
আজি মুখ্য মন্ত্ৰীলৈ স্মাৰকপত্ৰ প্ৰেৰণ কৰা সংগঠন কেইটা হৈছে টাই আহোম যুৱ পৰিষদ, অসম জাতীয়তাবাদী যুৱ পৰিষদ, স্বৰাজ অসম, অনুসূচিত জাতি যুৱ ছাত্ৰ পৰিষদ, টাই আহোম মহিলা পৰিষদ, সদৌ অসম কৃষক-শ্ৰমিক উন্নয়ন পৰিষদ, দুৰ্নীতি বিৰোধী মানৱ অধিকাৰ সুৰক্ষা মঞ্চ, বৃহত্তৰ অসমীয়া যুৱ মঞ্চ, সদৌ অসম নাথ যোগী ছাত্ৰ সন্থা, গৰিয়া-মৰীয়া দেশী জনগোষ্ঠীয় পৰিষদ, সদৌ অসম উন্নয়ন পৰিষদ আৰু সদৌ অসম একত্ৰিত যৱু পৰিষদ।
আনহাতে কালি অৰ্থাৎ ২২ এপ্ৰিলত অখিল গগৈ আৰু সকলো ‘কা’ বিৰোধী কাৰাবন্দীক বিনা চৰ্তে মুকলি কৰি দিয়াৰ দাবীত অসম নাগৰিক সমাজে মুখ্য মন্ত্ৰী সোণোৱালক সাক্ষাৎ কৰি এখন স্মাৰকপত্ৰ প্ৰদান কৰিছিল।
পঢ়ক : অখিল গগৈসহ সকলো ‘কা’ বিৰোধী নেতাৰ মুক্তিৰ দাবীত অসম নাগৰিক সমাজৰ মুখ্য মন্ত্ৰীলৈ স্মাৰকপত্ৰ
ইপিনে গুৱাহাটী চান্দমাৰিস্থিত NIA আদালতে আজি অখিল গগৈ তেওঁৰ সতীৰ্থ ধৈৰ্য কোঁৱৰ আৰু বিতু সোণোৱালক পুনৰ গুৱাহাটী কেন্দ্ৰীয় কাৰাগাৰলৈ প্ৰেৰণ কৰে। অহা ১৩ মে’ত তিনিওকে পুনৰ NIA আদালতত হাজিৰ কৰোৱা হ’ব।
লগতে পঢ়ক : NIAৰ আদালতে পুনৰ গুৱাহাটী কেন্দ্ৰীয় কাৰাগাৰলৈ প্ৰেৰণ কৰিলে অখিল গগৈক