চলিত বাজেট অধিৱেশনত ১০০ দিনৰ কামৰ আৱন্টনক লৈ বিৰোধীসকলে সৰৱ হৈ পৰাৰ মাজতে শনিবাৰে কেন্দ্ৰীয় বিত্তমন্ত্ৰী নিৰ্মলা সীতাৰমনে জনায় যে প্ৰয়োজন হ’লে আগলৈ এমএনৰেগা আঁচনিত ধন আৱন্টন বৃদ্ধি কৰিবলৈ কেন্দ্ৰীয় চৰকাৰ সাজু আছে।
বাজেট বিতৰ্কৰ উত্তৰ দি সীতাৰমনে দাবী কৰে যে কৰ’না পৰিস্থিতি সত্ত্বেও দীৰ্ঘকালীন সময় দেশৰ লক্ষ্য পূৰণৰ বাবে একাধিক সংস্কাৰমূলক পদক্ষেপ গ্ৰহণ কৰা হৈছে।
ইয়াৰ ফলত ভাৰতৰ বিশ্বৰ অন্যতম দ্ৰুতগামী অৰ্থনীতি হোৱাৰ বাট মুকলি হ’ব।
আনহাতে, ১০০ দিনৰ কামৰ আৱন্টন হ্ৰাস কৰাকলৈ কংগ্ৰেছৰ আক্ৰমণৰ প্ৰত্যুত্তৰত বিত্তমন্ত্ৰীয়ে আশ্বাস দিয়ে যে বাজেটত ৭৩,০০০কোটি টকা আৱন্টন দিয়া হৈছে যদিও ভৱিষ্যতে প্ৰয়োজন হ’লে এই আঁচনিত কেন্দ্ৰীয় চৰকাৰ আৰু ধন আৱন্টন দিব।
কংগ্ৰেছক লক্ষ্য কৰি সীতাৰমনে কয় যে কংগ্ৰেছে এমএনৰেগাকলৈ নিজৰ কৃতিত্ব দাবী কৰে। এই আঁচনি আৰম্ভ কৰাৰ চিন্তা অৱশ্যে তেওঁলোকৰ। কিন্তু কংগ্ৰেছৰ শাসনত আঁচনি ৰূপায়নৰ নামত প্ৰচুৰ বিসংগতি ঘটিছিল। মোদী চৰকাৰে সেয়া দূৰ কৰিছে।
