৩ অক্টোবৰৰ লখিমপুৰ খেৰী হিংসাত নিহত হোৱা এজন বিজেপি কৰ্মীৰ পৰিয়ালক সাক্ষাৎ কৰাৰ বাবে বৃহস্পতিবাৰে সংযুক্তা কিষাণ মৰ্চাই সমাজকৰ্মী তথা স্বৰাজ ভাৰতৰ নেতা যোগেন্দ্ৰ যাদৱক এমাহৰ বাবে নিলম্বন কৰে।
উল্লেখ্য যে যোগেন্দ্ৰ যাদৱ সংযুক্ত কিষাণ মৰ্চাৰ মূল সমিতিৰ সদস্য আছিল।
এজন জ্যেষ্ঠ কৃষক নেতাই কয় যে কেন্দ্ৰৰ কৃষি আইনৰ বিৰুদ্ধে দেশজুৰি প্ৰতিবাদৰ নেতৃত্ব দি অহা SKMৰ এখন সাধাৰণ সভাত এই সিদ্ধান্ত লোৱা হৈছিল।
তেওঁ কয়, “SKM ৰ সাধাৰণ বৈঠকত যোগেন্দ্ৰ যাদৱে উত্তৰ প্ৰদেশৰ লখিমপুৰ খেৰীত মৃত্যু হোৱা এজন বিজেপি কৰ্মীৰ পৰিয়ালৰ ঘৰ ভ্ৰমণ কৰাৰ বাবে তেওঁক সংযুক্ত কিষাণ মৰ্চাই নিলম্বন কৰে।”
যাদৱে এতিয়া সংযুক্ত কিষাণ মৰ্চাৰ সভা আৰু অন্যান্য কাৰ্যকলাপত অংশগ্ৰহণ কৰিব নোৱাৰিব বুলি কৃষক নেতাজনে লগতে কয়।
বৃহস্পতিবাৰে অনুষ্ঠিত সংযুক্ত কিষাণ মৰ্চাৰ সাধাৰণ সভাত যোগেন্দ্ৰ যাদৱো উপস্থিত আছিল।
স্মৰ্তব্য যে ৩ অক্টোবৰত উত্তৰ প্ৰদেশৰ লখিমপুৰ খেৰীৰ হিংসাত্মক ঘটনাত আঠজন লোক নিহত হৈছিল।
কেন্দ্ৰীয় গৃহ ৰাজ্য মন্ত্ৰী অজয় মিশ্ৰৰ পুত্ৰ আশীষ মিশ্ৰৰ কনভয়ে ৪ জন প্ৰতিবাদকাৰী কৃষকক গাড়ীৰে মহতীয়াই হত্যা কৰাৰ পিছত ক্ষুব্ধ কৃষকসকলে প্ৰতি আক্ৰমণ কৰে আৰু এই আক্ৰমণত আন চাৰিজন ব্যক্তি নিহত হৈছিল।