সোমবাৰে ককৰোচ জনতা পাৰ্টিয়ে ৰাজধানী দিল্লীত নীট পৰীক্ষাৰ প্ৰশ্নকাকত ফাদিল হোৱাৰ অভিযোগত ‘চলো সংসদ’ অভিযানৰ কাৰ্যসূচীৰ গ্ৰহণ কৰিছে। কিন্তু দিল্লী আৰক্ষীৰ পৰা অনুমতি পোৱা ‘চিজেপি’য়ে। অৱশ্যে প্ৰায় তিনি সপ্তাহ ধৰি অনশন কৰি থকা সমাজ কৰ্মী সোণম ৱাংচুকে এইবাৰ অনশন প্ৰত্যাহাৰ কৰিবলৈ সন্মত হৈছে। অৱশ্যে ই চৰ্তহীন নহয়।
সংসদত শিক্ষা ব্যৱস্থাৰ ত্ৰুটি আৰু প্ৰশাসনিক দায়বদ্ধতাৰ বিষয়টো উত্থাপন কৰিব লাগিব বুলি ৰাজনৈতিক দলসমূহৰ পৰা দৃঢ় আশ্বাস পালেহে তেওঁ অনশন ভংগ কৰিব। সোণম ৱাংচুকৰ পত্নী গীতাঞ্জলি আংমোৱে দেওবাৰে নিশা যন্তৰ মন্তৰত প্ৰতিবাদকাৰীৰ আগত দিয়া ভাষণত স্বামীৰ এই ডাঙৰ বাৰ্তাৰ কথা ৰাজহুৱা কৰে।
দেওবাৰে দিল্লীৰ যন্তৰ মন্তৰত চিজেপিৰ ধৰ্ণা মঞ্চত ভাষণ দি গীতাঞ্জলি আংমোৱে কয় যে সোমবাৰৰ পৰা সংসদৰ অধিৱেশন আৰম্ভ হ’ব। এনে পৰিস্থিতিত ৰাজনৈতিক দলসমূহৰ শীৰ্ষ নেতাসকলে ছফদৰজং চিকিৎসালয়ত উপস্থিত হৈ সোণম ৱাংচুকক সাক্ষাৎ কৰি এই সংসদৰ অধিৱেশনত শিক্ষা খণ্ডত দায়বদ্ধতাৰ বিষয়টো উত্থাপন কৰাৰ সুনিৰ্দিষ্ট আশ্বাস দিলেহে সোমবাৰে ৱাংচুকে অনশন প্ৰত্যাহাৰ কৰিব।
গীতাঞ্জলিয়ে স্পষ্ট কৰি দিয়ে, “সোনমে মোক কৈছে যে এই অনশন তেওঁৰ বাবে শেষ কথা নহয়, বৰঞ্চ দেশৰ শিক্ষা ব্যৱস্থাত স্বচ্ছতা আৰু দায়বদ্ধতা পুনৰ ঘূৰাই অনাৰ এক শক্তিশালী উপায় মাথোঁ। যদি নেতাসকলে চিকিৎসালয়লৈ আহি সংসদত এই দাবী উঠাব বুলি প্ৰতিশ্ৰুতি দিয়ে, তেন্তে কাইলৈ সোণমে অনশন ভংগ কৰিব।”
আনহাতে, ৱাংচুকৰ এই বাৰ্তা চিকিৎসালয়ৰ পৰা অহাৰ সময়তে আনফালে সোমবাৰে পুৱা ৯ বজাত ‘চলো সংসদ’ অভিযানক সফল কৰি তুলিবলৈ আক্ষৰিক অৰ্থত যন্তৰ মন্তৰত মানুহৰ ঢল বৈছে। নীট পৰীক্ষাৰ প্ৰশ্নকাকত ফাদিল আৰু শিক্ষা ব্যৱস্থাৰ আমূল সংস্কাৰৰ দাবীৰ বিৰুদ্ধে দেশজোৰা ক্ষোভ যেন দেওবাৰে নিশা দিল্লীৰ ৰাজপথত উপচি পৰে।
সমদলত নাম পঞ্জীয়নৰ বাবে চিজেপিয়ে আৰম্ভ কৰা ‘মিছড কল’ অভিযানে ইতিমধ্যে ১ লাখ ৩০ হাজাৰৰো অধিক সমৰ্থকে যোগ দিৰিছে। আৰু ইয়াৰ প্ৰতিফলন মাটিৰ যুঁজতো দেখা গৈছে। দেওবাৰে নিশাৰ পৰা দেশৰ বিভিন্ন প্ৰান্তৰ লোকে যন্তৰ মন্তৰ ভিৰ কৰিছে।
চিজেপিৰ মূল মুখপাত্ৰ সৌৰভ দাসে ছ’চিয়েল মিডিয়াত দাবী কৰি কয় যে, “যন্তৰ মন্তৰ আৰু ইয়াৰ আশে-পাশে থকা অঞ্চলত ইতিমধ্যে ২০ হাজাৰতকৈ অধিক লোক সমবেত হৈছে। কিন্তু ২০ জুলাইলৈ এতিয়াও কেইঘণ্টামান বাকী! ধৰ্মেন্দ্ৰ প্ৰধান – আপোনাৰ হিচাপ দিয়াৰ দিনটো আহি পৰিছে।” প্ৰতিবাদস্থলীত উফন্দি উঠা জনসমাগমৰ ছবি আৰু ভিডিঅ’ এতিয়া নেটত ভাইৰেল হৈ পৰিছে।
ভিৰ বাঢ়ি অহাৰ লগে লগে আৰক্ষীৰ দমনৰ আশংকা বাঢ়ি গৈছে। ককৰোচ জনতা পাৰ্টিৰ প্ৰতিষ্ঠাপক অভিষেক দীপকেই ভিডিঅ’ বাৰ্তাৰ জৰিয়তে সকলো সমৰ্থকক আহ্বান জনাইছে যে সোমবাৰৰ সংসদ অভিযান শান্তিপূৰ্ণভাৱে সফল কৰিবলৈ এই সমাৱেশ অক্ষুন্ন ৰাখিব লাগিব। তেওঁ প্ৰতিবাদকাৰীসকলক যিকোনো মূল্যৰ বিনিময়ত দেওবাৰে সভাস্থলীতে নিশা জাগি থকাৰ আহ্বান জনাইছে।
দীপকেই কয়, “আমাৰ আন্দোলন চলি আছে। অনুগ্ৰহ কৰি বৃহৎ সংখ্যক ইয়ালৈ আহক। ইয়াতে ৰাতিটো কটাওক। এতিয়াই গুচি গ’লে আৰক্ষী আহি এই আন্দোলনক বলপূৰ্বকভাৱে চেপি ধৰিবলৈ চেষ্টা কৰিব।” অৱশ্যে একে সময়তে সমৰ্থকসকলক সম্পূৰ্ণ অহিংস হৈ থাকিবলৈ আৰু আৰক্ষীৰ নিৰ্দেশনা মানি চলিবলৈও অনুৰোধ জনায়। তেওঁ লগতে স্পষ্ট কৰি দিয়ে যে আৰক্ষীয়ে তেওঁক যন্তৰ মন্তৰৰ পৰা বলপূৰ্বকভাৱে লৈ চিকিৎসালয়ত আবদ্ধ কৰি ৰাখিলেও এতিয়াও চিকিৎসালয়ৰ ভিতৰতে সোণম ৱাংচুকৰ অনশন অব্যাহত আছে।
ইয়াৰ মাজতে চিজেপিয়ে নিজৰ ‘এক্স’ হেণ্ডেলত কিছু চাঞ্চল্যকৰ পোষ্ট কৰিছে। এই আন্দোলন বিফল কৰিবলৈ আৰক্ষীয়ে ইতিমধ্যে অঞ্চলটোত কন্দুৱা গেছৰ সামগ্ৰী মজুত কৰিবলৈ আৰম্ভ কৰিছে বুলি অভিযোগ উত্থাপন কৰিছে। আনকি একাংশ অসামাজিকচক্ৰই আন্দোলনক কলংকিত কৰিবলৈ সমাৱেশত অনুপ্ৰৱেশ কৰিবলৈ চেষ্টা কৰা বুলিও আশংকা প্ৰকাশ কৰে।
ইফালে দেওবাৰে বিয়লি দিল্লী আৰক্ষীয়ে স্পষ্টকৈ উল্লেখ কৰিছে যে এই ‘চলো সংসদ’ অভিযানৰ বাবে কোনো অনুমতি দিয়া হোৱা নাই। বৰ্ষাকালীন অধিৱেশনৰ বাবে সমগ্ৰ নতুন দিল্লী জিলাত ভাৰতীয় নাগৰিক সুৰক্ষা আইনৰ ১৬৩ ধাৰা জাৰি কৰা হৈছে। ফলত পূৰ্বৰ অনুমতি অবিহনে পাঁচজন বা তাতকৈ অধিক লোকৰ সমাগম বা শোভাযাত্ৰা সম্পূৰ্ণ নিষিদ্ধ। এই আইন উলংঘা হ’লে বিএনএছৰ ২২৩ ধাৰাত অপৰাধমূলক গোচৰ ৰুজু কৰা হ’ব বুলি কঠোৰ সকীয়নি জাৰি কৰিছে আৰক্ষীয়ে। পাৰ্লিয়ামেণ্ট ষ্ট্ৰীট, চেণ্ট্ৰেল ভিষ্টা, কন’ট প্লেচকে ধৰি সমগ্ৰ অঞ্চলটোক আৰক্ষীৰ দুৰ্গলৈ ৰূপান্তৰিত কৰা হৈছে।
দেওবাৰে নিশা ছফদৰজং হাস্পতাল কৰ্তৃপক্ষই জাৰি কৰা শেষৰ বুলেটিন অনুসৰি সোণম ৱাংচুকৰ ভাইটেল পেৰামিটাৰ সুস্থিৰ যদিও তেজৰ উপাদানৰ তাৰতম্য এতিয়াও সম্পূৰ্ণৰূপে সমাধান হোৱা নাই। দীৰ্ঘদিনীয়া উপবাসৰ বাবে শাৰীৰিক মানসিক চাপৰ সৈতে মোকাবিলা কৰিবলৈ বহুবিষয়ক চিকিৎসকৰ এটা দলে তেওঁৰ ওপৰত তীক্ষ্ণ দৃষ্টি ৰাখিছে। অৱশ্যে ৱাংচুকে এতিয়াও একো খাবলৈ অস্বীকাৰ কৰিছে। চিকিৎসালয়খনৰ প্ৰতি অনাস্থা প্ৰকাশ কৰি ব্যক্তিগত চিকিৎসালয়লৈ বদলি বিচাৰি তেওঁৰ পৰিয়ালে জনোৱা আবেদন দিল্লী উচ্চ ন্যায়ালয়ে নাকচ কৰিছে।
